Holi Beauty Care: హోలీకి ముందు ముఖానికి ఈ నూనె రాస్తే రంగులు చర్మానికి అతుక్కోవు

రంగుల పండుగ హోలీ. ఈ పండుగంటే చిన్నా, పెద్దా అందరికీ ఎంతో ఇష్టం. రంగులు చల్లుకుంటూ కుటుంబం, స్నేహితులతో ఆనందంగా గడుపుతారు. అయితే హోలీ రోజు ఉపయోగించే రంగులు కొన్నిసార్లు చర్మానికి ఇబ్బంది కలిగిస్తాయి. రంగు ముఖానికి పట్టిన తర్వాత తొలగించుకోవడం కష్టం అవుతుంది. కొందరికి దురద, ఎర్రదనం, పొడిబారడం వంటి సమస్యలు వస్తాయి. ఈ సమస్యలను తగ్గించుకోవడానికి హోలీకి ముందు కొన్ని చిన్న జాగ్రత్తలు తీసుకోవాలి. ముఖ్యంగా ముఖానికి, శరీరానికి నూనె రాయడం చాలా ఉపయోగకరం.

నూనె రాస్తే ఏమి జరుగుతుంది?
హోలీ రంగుల్లో కొన్నిసార్లు రసాయనాలు ఉంటాయి. అవి చర్మంపై ఎక్కువసేపు ఉంటే చర్మంలోకి లోతుగా వెళ్లే అవకాశం ఉంటుంది. దీంతో అలర్జీ లేదా పొడిబారడం వంటి సమస్యలు వస్తాయి. కానీ హోలీకి వెళ్లే ముందు చర్మంపై నూనె రాస్తే అది ఒక రక్షణ పొరలా పనిచేస్తుంది. నూనె ఉండటం వల్ల రంగు నేరుగా చర్మంలోకి చేరకుండా అడ్డుకుంటుంది. అలాగే రంగు పడినా తర్వాత సులభంగా తొలగించుకోవచ్చు. అందుకే హోలీకి ముందు నూనె రాయడం మంచి అలవాటు అంటున్నారు.

ఏ నూనె రాయాలి?
హోలీకి ముందు ప్రత్యేకంగా ఖరీదైన క్రీములు అవసరం లేదు. ఇంట్లో ఉన్న సాధారణ నూనెలే సరిపోతాయి. ముఖానికి ఇంట్లో ఉన్న కొబ్బరినూనె రాసుకోవచ్చు. ఇది అందరికీ అందుబాటులో ఉంటుంది. చర్మాన్ని మృదువుగా ఉంచుతుంది. కొబ్బరి నూనె రాస్తే రంగు ఎక్కువగా అంటకుండా ఉండే అవకాశం ఉంటుంది. చర్మానికి పోషకాలు అందించే బాదం నూనె కూడా మంచి ఎంపిక. ఇది చర్మం పొడిబారకుండా కాపాడుతుంది. సెన్సిటివ్ స్కిన్ ఉన్నవారికి నువ్వుల నూనె ఉపయోగకరంగా ఉంటుంది. ఇది చర్మాన్ని రక్షిస్తుంది.ఈ మూడు నూనెల్లో ఏదైనా ఒకటి రాసినా సరిపోతుంది. ముఖ్యంగా కొంచెం ఎక్కువ రాయడం మంచిది.

ఎలా రాయాలి?
హోలీ ఆడటానికి కనీసం అరగంట ముందు నూనె రాయాలి. ముఖం, మెడ, చేతులు, కాళ్ల.. ఇలా బయట కనిపించే భాగాలన్నింటికీ రాయాలి. చెవుల వెనుక, ముక్కు పక్కలు, మోచేతులు వంటి భాగాలను కూడా మర్చిపోవద్దు. ఈ ప్రాంతాల్లో రంగు ఎక్కువగా నిలిచిపోతుంది. ముందుగానే నూనె రాస్తే తర్వాత ఇబ్బంది తక్కువగా ఉంటుంది.

జుట్టుకూ రక్షణ అవసరం
హోలీ రోజు చర్మం మాత్రమే కాదు జుట్టు కూడా దెబ్బతింటుంది. రంగులు జుట్టులో పడితే పొడిబారడం, రఫ్‌గా మారడం జరుగుతుంది. అందుకే జుట్టుకు కూడా నూనె రాయాలి. కొబ్బరి లేదా బాదం నూనె రాసి జడ వేసుకోవడం లేదా జుట్టును కట్టుకోవడం మంచిది. ఇలా చేస్తే రంగు వెంట్రుకల్లో ఎక్కువగా పట్టదు.హోలీ ముగిసిన వెంటనే బలంగా సబ్బుతో ముఖాన్ని రుద్దడం మంచిది కాదు. ముందుగా కొద్దిగా నూనె తీసుకుని ముఖం, చేతులకు మసాజ్ చేయాలి. ఇలా చేస్తే పైపై రంగు పోతుంది. తరువాత మృదువైన ఫేస్‌వాష్ లేదా సబ్బుతో కడిగితే చర్మానికి హాని కలగకుండా ఉంటుంది. అలాగే ఒకేసారి పూర్తిగా రంగు తొలగకపోతే ఆందోళన పడాల్సిన అవసరం లేదు. ఒకటి రెండు రోజుల్లో సహజంగా పోతుంది.