HYDRA Operation: హైదరాబాద్ పరిసరాల్లో అక్రమ నిర్మాణాల గుండెల్లో రైళ్లు పరిగెత్తిస్తున్న హైడ్రా (HYDRA) తాజాగా అమీన్పూర్లో భారీ ఆపరేషన్ చేపట్టింది. అమీన్పూర్ మండలం ఐలాపురం గ్రామంలో వెలిసిన అక్రమ కట్టడాలపై అధికారులు విరుచుకుపడ్డారు. కోర్టు స్టే ఆర్డర్లు ఉన్నప్పటికీ, నిబంధనలను బేఖాతరు చేస్తూ నిర్మించిన ఒక ఆరు అంతస్తుల భారీ భవనాన్ని, అలాగే ఒక విలాసవంతమైన గెస్ట్ హౌస్ను హైడ్రా బృందం నేలమట్టం చేసింది. ప్రభుత్వ భూములను ఆక్రమిస్తే ఉపేక్షించేది లేదని ఈ చర్య ద్వారా మరోసారి స్పష్టమైన హెచ్చరికలు జారీ చేసింది.
నిబంధనల ఉల్లంఘన.. స్టే ఆర్డర్ ఉన్నా ఆగని నిర్మాణాలు!
ఐలాపురం గ్రామ పరిధిలో అక్రమంగా నిర్మించిన గెస్ట్ హౌస్ వ్యవహారం ఇప్పుడు చర్చనీయాంశంగా మారింది. సదరు నిర్మాణానికి సంబంధించి కోర్టు స్టే ఆర్డర్ ఉన్నప్పటికీ, దానిని లెక్కచేయకుండా యజమానులు పనులు కొనసాగించినట్లు అధికారులు గుర్తించారు. నిబంధనలను గాలికొదిలేసి ప్రభుత్వ స్థలాల్లో విలాసవంతమైన సౌకర్యాలతో ఈ భవనాలు నిర్మించారు. ఈ క్రమంలో భారీ పోలీసు బందోబస్తు మధ్య కూల్చివేత యంత్రాలతో (JCBs) రంగంలోకి దిగిన హైడ్రా అధికారులు, కొద్ది గంటల్లోనే ఆ భారీ కట్టడాలను మట్టిమట్టం చేశారు.
1263 ఎకరాల ప్రభుత్వ భూమి.. సర్కార్ క్లియర్ కట్ ప్లాన్!
అమీన్పూర్ మండలం ఐలాపురం గ్రామంలో మొత్తం 1263 ఎకరాల భారీ ప్రభుత్వ భూమి విస్తరించి ఉంది. అయితే, ఈ భూమిలో ఇప్పటికే చాలా చోట్ల నివాస గృహాలు వెలిశాయి. ప్రభుత్వం మానవీయ కోణంలో ఆలోచించి, ఇప్పటికే నివసిస్తున్న ఇళ్ల జోలికి వెళ్లకుండా ఒక కీలక నిర్ణయం తీసుకుంది. ప్రస్తుతం ఖాళీగా ఉన్న సుమారు 860 ఎకరాల భూమిని ఎట్టి పరిస్థితుల్లోనూ అక్రమార్కుల పాలు కాకుండా రక్షించాలని హైడ్రా సంకల్పించింది. ఈ మిగిలిన భూమిని కాపాడటమే లక్ష్యంగా తాజా ఆపరేషన్ నిర్వహించారు.
రూ. 15,000 కోట్ల విలువైన ఆస్తుల పరిరక్షణ
ఐలాపురంలోని ఈ 860 ఎకరాల ప్రభుత్వ భూమి విలువ బహిరంగ మార్కెట్లో సుమారు రూ. 15,000 కోట్లకు పైగానే ఉంటుందని ప్రాథమిక అంచనా. ఇంతటి విలువైన ప్రభుత్వ సంపదను కాపాడేందుకు ప్రభుత్వం పక్కా వ్యూహంతో ముందుకు వెళ్తోంది. భూ మాఫియా కన్ను పడకుండా, ఫెన్సింగ్ ఏర్పాటు చేయడంతో పాటు నిరంతరం పర్యవేక్షించేందుకు ప్రత్యేక చర్యలు చేపడుతున్నారు. అక్రమ కట్టడాల కూల్చివేత ద్వారా భూ ఆక్రమణదారులకు గట్టి సందేశాన్ని పంపినట్లయింది.
Also Read: చికెన్ ప్రియులకు హెచ్చరిక.. కుళ్లిన మాంసాన్ని మార్కెట్లోకి వదులుతున్న కేటుగాళ్లు.. ఇదిగో వీడియో!
మున్ముందు మరిన్ని చర్యలు.. ఆక్రమణదారుల్లో గుబులు!
హైడ్రా దూకుడు చూస్తుంటే రానున్న రోజుల్లో మరిన్ని కీలక ఆపరేషన్లు జరిగే అవకాశం ఉన్నట్లు కనిపిస్తోంది. కేవలం అమీన్పూర్ మాత్రమే కాకుండా, చెరువుల పరివాహక ప్రాంతాలు, ఎఫ్.టి.ఎల్ (FTL) పరిధిలో ఉన్న నిర్మాణాల జాబితాను కూడా అధికారులు సిద్ధం చేసినట్లు సమాచారం. సామాన్యుల ఇళ్ల జోలికి వెళ్లడం లేదని ప్రభుత్వం చెబుతున్నప్పటికీ, భారీ వాణిజ్య సముదాయాలు మరియ, గెస్ట్ హౌస్ల యజమానుల్లో మాత్రం హైడ్రా చర్యలు కలకలం రేపుతున్నాయి. ప్రభుత్వ భూమిని కాపాడటంలో రాజీ పడే ప్రసక్తే లేదని అధికారులు తేల్చి చెబుతున్నారు.
ఆరంతస్తుల భవనం,ఓ గెస్ట్ హౌస్ కూల్చేసిన హైడ్రా
కోర్టు స్టే ఆర్డర్ ఉన్నా.. నిర్మాణాలు జరిపిన ఓ గెస్ట్ హౌస్తో పాటు..
ఆరు అంతస్తుల భవనాన్ని నేలమట్టం చేసిన హైడ్రాఅమీన్పూర్లో హైడ్రా భారీ ఆపరేషన్..
అమీన్పూర్ మండలం ఐలాపురం గ్రామంలో మొత్తం 1263 ఎకరాల ప్రభుత్వ భూమి
ప్రభుత్వ… pic.twitter.com/iEEGiLAWNA
— BIG TV Breaking News (@bigtvtelugu) April 11, 2026
Share
Elinati Shani: ఏలినాటి శని ప్రభావం తగ్గించుకోవాలంటే శనివారం రావి చెట్టు దగ్గర ఇలా చేయండి
మీడియా రంగంలోకి ఎంట్రీ.. మాజీ ఎంపీ విజయసాయి రెడ్డి సంచలన ప్రకటన
