Credit Card Rules: క్రెడిట్ కార్డు ఉంది కదా అని చాలా మంది అవసరం లేకున్నా ఏది పడితే అది కొనుగోలు చేస్తుంటారు. నెల పూర్తయ్యే సరికి దానికి ఇంట్రస్ట్ చెల్లించలేక ఇబ్బంది ఎదుర్కొంటూ ఉంటారు. అయితే కొందరు ఏకంగా ఈ క్రెడిట్ కార్డును ఉపయోగించి.. విదేశాల్లో ఆస్తులను సైతం కొనుగోలు చేస్తున్నట్లు ఎన్‌ఫోర్స్‌మెంట్ డైరెక్టరేట్ (ED) దృష్టికి వెళ్లింది. దీంతో దుబాయ్‌లో ఆస్తులు కొన్న పలువురికి ఈడీ నోటీసులు జారీ చేసినట్లు తెలుస్తోంది.
చాలా మంది భారతీయులు దుబాయ్ వంటి నగరాల్లో ఇళ్లు లేదా ప్లాట్లు బుక్ చేసుకునేటప్పుడు టోకెన్ అమౌంట్ లేదా ఇన్‌స్టాల్‌మెంట్లను తమ ఇంటర్నేషనల్ క్రెడిట్ కార్డుల ద్వారా చెల్లిస్తున్నారు. విదేశీ మారక ద్రవ్య నిర్వహణ చట్టం (FEMA) ప్రకారం ఇది నిబంధనలకు విరుద్దం. మరోవైపు రిజర్వ్ బ్యాంక్ (RBI) నిబంధనల ప్రకారం కూడా క్రెడిట్ కార్డు వాడకంపై కొన్ని స్పష్టమైన పరిమితులు ఉన్నాయి. ఈ రూల్స్ ప్రకారం.. క్రెడిట్ కార్డులను కేవలం వ్యక్తిగత అవసరాలు (షాపింగ్, హోటల్ బిల్లులు, విదేశీ ప్రయాణాలు) వంటి ‘కరెంట్ అకౌంట్’ లావాదేవీలకే వాడాల్సి ఉంటుంది.
విదేశాల్లో ఆస్తులు కొనడం అనేది ఒక పెట్టుబడికి కిందకు వస్తుందని రిజర్వ్ బ్యాంక్ గైడ్ లైన్స్ స్పష్టం చేస్తున్నాయి. దీనిని కేవలం సొంత డబ్బుతో లేదా బ్యాంకు ద్వారా మాత్రమే కొనుగోలు చేయాలని పేర్కొంటున్నాయి. అప్పుగా భావించే క్రెడిట్ కార్డును ఉపయోగించి.. విదేశాల్లో స్థిరాస్తులు కొనడం చట్టవిరుద్దమని తెలియజేస్తున్నాయి. ప్రస్తుతం ఈడీ రంగంలోకి దిగిన నేపథ్యంలో దుబాయి సహా ఇతర దేశాల్లో ఆస్తులు కొన్నవారికి ఆందోళన మెుదలైనట్లు సమాచారం.
ఎల్ఆర్ఎస్ (Liberalised Remittance Scheme) పథకం కింద ఒక భారతీయుడు ఏడాదికి 2,50,000 డాలర్ల వరకు విదేశాలకు పంపేందుకు వీలుంది. అయితే ఈ డబ్బును కేవలం బ్యాంకు ద్వారానే సరైన పత్రాలు సమర్పించి పంపాల్సి ఉంటుంది. ఆ తర్వాత సంబంధిత డబ్బుతో విదేశాల్లో మీరు కోరుకున్న ఆస్తులను కొనుగోలు చేయవచ్చని రిజర్వ్ బ్యాంకు నిబంధనలు తెలియజేస్తున్నాయి. కాబట్టి ఎవరైనా తెలియక క్రెడిట్ కార్డు ద్వారా విదేశాల్లో ఆస్తులు కొనుగోలు చేసి ఉంటే వెంటనే ఆర్బీఐని సంప్రదించి.. సమస్యను పరిష్కరించుకోవాలని బ్యాంకింగ్ నిపుణులు సూచిస్తున్నారు.
Also Read: Jio Cheapest Plans: రోజుకు 3GB డేటా.. కేవలం రూ.39 మాత్రమే.. జియో సూపర్ చీప్ ప్లాన్స్!
సాధారణంగా క్రెడిట్ కార్డుతో కొన్ని పనులు అస్సలు చేయకూడదని రిజర్వ్ బ్యాంక్ నిబంధనలు స్పష్టం చేస్తున్నాయి. విదేశాల్లో స్థిరాస్తులు కొనడంతో పాటు షేర్లు, బాండ్లు, డిబేంచర్లు, మ్యూచువల్ ఫండ్లలో పెట్టుబడులు వంటివి చేయడం విరుద్దం. అలాగే విదేశీ లాటరీ, ఫారెన్ వెబ్‌సైట్లలో క్రెడిట్ కార్డు ద్వారా జూదం ఆడటం కూడా నేరమని బ్యాంకింగ్ చట్టాలు స్పష్టం చేస్తున్నాయి. విదేశీ కరెన్సీ కొనుగోలు వంటివి కూడా క్రెడిట్ కార్డును ఉపయోగించి చేయకూడదని నిపుణులు స్పష్టం చేస్తున్నారు.
Share
Rakasa Trailer: ఊరుని వణికించే బ్రహ్మరాక్షసుడు.. ‘రాకాస’ ట్రైలర్ ఎలా ఉందంటే?
Railway Kodur: ఎమ్మెల్యే అరవ శ్రీధర్ కేసు వ్యవహారం.. రెండు నెలల తర్వాత.. విధులకు హాజరైన హర్షవీణ
