అక్షయ తృతీయ గోల్డ్ షాపింగ్.. బంగారం కొనే ముందు ఇవి తెలుసుకోండి !

Gold buying guide: అక్షయ తృతీయ అంటేనే లక్ష్మీదేవికి అత్యంత ప్రీతికరమైన రోజు. ఈ శుభ సందర్భంలో ఒక గ్రాము బంగారమైనా కొని ఇంటికి తెచ్చుకోవాలని ప్రతి ఒక్కరూ ఆరాటపడతారు. అయితే.. పండగ రద్దీని ఆసరాగా చేసుకుని కొన్నిచోట్ల కస్టమర్లు మోసపోయే అవకాశం ఉంది. కష్టపడి సంపాదించిన డబ్బుతో కొనే.. బంగారం స్వచ్ఛమైనదేనా? మనం చెల్లిస్తున్న ధర సరైనదేనా? అని ఆలోచించకపోతే ఆర్థికంగా నష్టపోయే ప్రమాదం ఉంది. అందుకే.. ఈ అక్షయ తృతీయ 2026 నాడు మీరు బంగారు ఆభరణాలు కొనే ముందు తప్పనిసరిగా చెక్ చేయాల్సిన 5 కీలకమైన విషయాల గురించి ఇప్పుడు తెలుసుకుందాం.

మన సంస్కృతిలో బంగారం కేవలం ఒక లోహం మాత్రమే కాదు. అది ఒక సెంటిమెంట్. ముఖ్యంగా అక్షయ తృతీయ రోజున బంగారం కొంటే.. ఐశ్వర్యం సిద్ధిస్తుందని మన నమ్మకం. కానీ.. ఆ ఉత్సాహంలో నాణ్యతను విస్మరిస్తే మన పెట్టుబడి వృధా అవుతుంది. మీ బంగారం కొనుగోలు లాభదాయకంగా ఉండాలంటే.. ఈ కింది 5 సూత్రాలను తప్పక పాటించండి.

1. బిఐఎస్ (BIS) హాల్‌మార్క్ ముద్ర:
బంగారం స్వచ్ఛతను ధృవీకరించే ఏకైక గుర్తు ‘బిఐఎస్ హాల్‌మార్క్’. మీరు కొనే ప్రతి నగపై తప్పనిసరిగా హాల్‌మార్క్ ముద్ర ఉందో లేదో చెక్ చేయండి. ప్రస్తుత నిబంధనల ప్రకారం.. హాల్‌మార్క్ గుర్తున్న నగలకు మాత్రమే అమ్మడానికి అనుమతి ఉంది. ఇందులో మూడు గుర్తులు ఉంటాయి.

బిఐఎస్ లోగో (BIS Logo):

స్వచ్ఛత (ఉదాహరణకు 22K916 అంటే 22 క్యారెట్ల బంగారం)

హెచ్‌యుఐడి (HUID – ఆరు అంకెల అల్ఫాన్యూమరిక్ కోడ్)
HUID కోడ్ ద్వారా మీరు ఆ నగ ఎక్కడ తయారైంది. దాని స్వచ్ఛత ఎంత అనే వివరాలను ‘BIS CARE’ యాప్ ద్వారా ఆన్‌లైన్‌లో సరిచూసుకోవచ్చు.

2. మేకింగ్ ఛార్జీలు (తరుగు, మజూరీ):
బంగారం ధర ఒకెత్తయితే, దాని తయారీకి అయ్యే ఖర్చు మరొక ఎత్తు. పండగ సీజన్‌లో చాలా జ్యువెలరీ షాపులు ‘తరుగులో తగ్గింపు’ అని ప్రకటనలు ఇస్తుంటాయి. కానీ.. అసలు తరుగు ఎంత వేస్తున్నారో ముందే అడగండి. సాధారణంగా మ్యాషీన్ మేడ్ నగలకు తక్కువ, చేత్తో చేసిన నగలకు ఎక్కువ తరుగు ఉంటుంది. ఈ ఛార్జీల విషయంలో షాపుల మధ్య బేరసారాలు ఆడే అవకాశం ఉంటుంది కాబట్టి.. రెండు మూడు షాపుల్లో రేట్లు కనుక్కుని బెస్ట్ డీల్ ఎంచుకోండి.

3. క్యారెట్ల మధ్య తేడా గమనించండి:
బంగారం కొనేటప్పుడు అది 24 క్యారెట్లా లేదా 22 క్యారెట్లా అనేది స్పష్టంగా తెలుసుకోండి.

24 క్యారెట్లు: 99.9% స్వచ్ఛమైన బంగారం. ఇది నాణాలు, బిస్కెట్ల రూపంలో ఉంటుంది.

22 క్యారెట్లు: 91.6% బంగారం ఉంటుంది. మిగిలింది ఇతర లోహాలు. ఆభరణాలు ఎప్పుడూ 22 లేదా 18 క్యారెట్లలోనే చేస్తారు.

మీరు కొనేది నగలు అయితే.. జ్యువెలరీ షాపు వారు 22 క్యారెట్ల ధరనే వసూలు చేస్తున్నారో లేదో బిల్లులో సరిచూసుకోండి.

4. రాళ్ల బరువును తీసివేయడం:
చాలా మంది చేసే పొరపాటు ఇది. మీరు కొనే నగలో విలువైన రాళ్లు, కుందన్లు లేదా పూసలు ఉంటే.. నగ బరువు చూసేటప్పుడు వాటి బరువును వేరుగా లెక్కించాలి. కొన్నిసార్లు రాళ్ల బరువును కూడా బంగారపు ధరకే కలిపి లెక్కించేస్తారు. కానీ.. మీరు భవిష్యత్తులో ఆ నగను తిరిగి అమ్మేటప్పుడు రాళ్ల బరువుకు బంగారం ధర రాదు. కాబట్టి.. కొనేప్పుడే రాళ్ల ఖర్చు ఎంత, బంగారం నికర బరువు ఎంతో బిల్లులో వేయించుకోండి.

5. బై-బ్యాక్ పాలసీ (తిరిగి అమ్మే నిబంధనలు):
మీరు కొన్న నగను భవిష్యత్తులో అత్యవసర పరిస్థితుల్లో తిరిగి అదే షాపులో అమ్మితే ఎంత ధర ఇస్తారు? లేదా వేరే నగకు ఎక్స్ఛేంజ్ చేస్తే ఎంత కట్ చేస్తారు? అనే ‘బై-బ్యాక్’ పాలసీ గురించి ముందే అడిగి తెలుసుకోండి. సాధారణంగా మీరు కొన్న షాపులోనే తిరిగి అమ్మితే ఎక్కువ విలువ వచ్చే అవకాశం ఉంటుంది. అందుకే.. పక్కాగా జీఎస్టీ (GST) బిల్లు తీసుకోండి. బిల్లుపై నగ బరువు, క్యారెట్లు, కొన్న తేదీ స్పష్టంగా ఉండాలి.

అక్షయ తృతీయ నాడు మీ బంగారం కొనుగోలు మీకు సంతోషాన్ని ఇవ్వాలి కానీ ఆర్థిక భారాన్ని కాదు. పైన చెప్పిన జాగ్రత్తలు తీసుకుంటే.. మీరు మోసపోకుండా స్వచ్ఛమైన బంగారాన్ని ఇంటికి తెచ్చుకోవచ్చు.

Share

• 
• 
• 
• 
• 
•