సమ్మర్‌లో వేడిని తగ్గించే.. అద్భుతమైన ఇండోర్ ప్లాంట్స్ ఇవే!

Best Cooling Indoor Plants: వేసవి కాలంలో ఎండల తీవ్రతకు ఇళ్లు నిప్పుల కొలిమిలా మారుతుంటాయి. ఉష్ణోగ్రతలు రోజురోజుకూ పెరిగిపోతుండటంతో ఏసీలు, కూలర్లు వేసినా ఉక్కపోత తగ్గని పరిస్థితి. అయితే.. ఎలాంటి కరెంట్ బిల్లు లేకుండా, పూర్తి సహజసిద్ధమైన పద్ధతిలో ఇంటి వేడిని తగ్గించుకోవడానికి ఇండోర్ ప్లాంట్స్ అద్భుతంగా సహాయపడతాయి. కొన్ని ప్రత్యేకమైన మొక్కలు గదిలోని వేడిని పీల్చుకుని, వాతావరణాన్ని చల్లబరుస్తాయని సైన్స్ చెబుతోంది. ప్రస్తుతం ఇల్లు చల్లగా ఉంచుకోవడానికి అందరూ ఎక్కువగా వెతుకుతున్న ఆ బెస్ట్ కూలింగ్ ఇండోర్ ప్లాంట్స్ ఏవో ఇప్పుడు తెలుసుకుందాం.

మొక్కలు గదిని ఎలా చల్లబరుస్తాయి?
మొక్కలు గది ఉష్ణోగ్రతను ఎలా తగ్గిస్తాయనే సందేహం చాలా మందికి రావచ్చు. వృక్షశాస్త్రం ప్రకారం, మొక్కలు ‘ట్రాన్స్‌పిరేషన్’ (Transpiration – బాష్పోత్సేకం) అనే ప్రక్రియను జరుపుతాయి. అంటే.. మొక్కలు తమ వేర్ల ద్వారా పీల్చుకున్న నీటిని ఆకుల ద్వారా చిన్న చిన్న ఆవిరి బిందువుల రూపంలో గాల్లోకి విడుదల చేస్తాయి.

ఈ తేమ గదిలో ఉన్న పొడి వేడిని లాగేసుకుని, వాతావరణాన్ని తక్షణమే చల్లబరుస్తుంది. అంతేకాకుండా ఇవి గదిలో పేరుకుపోయే కార్బన్ డై ఆక్సైడ్ వంటి టాక్సిన్స్‌ను పీల్చుకుని ప్యూర్ ఆక్సిజన్‌ను అందిస్తాయి. ఇంటి ఉష్ణోగ్రతను తగ్గించడంలో కీలక పాత్ర పోషించే ఆ టాప్ 5 మొక్కల వివరాలు ఇవే..

1. అలోవెరా (కలబంద):
అలోవెరా కేవలం చర్మానికి, ఆరోగ్యానికి మాత్రమే కాదు, ఇంటిని చల్లబరచడంలో కూడా నంబర్ వన్ అని చెప్పవచ్చు. ఈ మొక్క ఆకుల్లో అధిక మొత్తంలో నీరు జెల్ రూపంలో నిల్వ ఉంటుంది. ఇది గదిలోని వేడిని వేగంగా పీల్చుకుని ఆక్సిజన్ స్థాయిలను పెంచుతుంది. అలోవెరా మొక్క గదిలో ఉంటే ఉష్ణోగ్రత అదుపులో ఉంటుంది. దీనికి ఎక్కువ నీరు పోయాల్సిన అవసరం కూడా లేదు.. కాబట్టి దీని మెయింటెనెన్స్ చాలా ఈజీ.

2. స్నేక్ ప్లాంట్ :
ఇండోర్ ప్లాంట్స్‌లో స్నేక్ ప్లాంట్‌కు ప్రత్యేక స్థానం ఉంది. గది మూలల్లో తక్కువ వెలుతురు ఉన్న చోట కూడా ఇది హ్యాపీగా పెరుగుతుంది. ఈ మొక్క ప్రత్యేకత ఏంటంటే.. ఇది రాత్రిపూట కూడా భారీగా ఆక్సిజన్‌ను విడుదల చేస్తుంది. వేసవి రాత్రులలో బెడ్‌రూమ్ ఉక్కపోతగా అనిపించకుండా.. గది చల్లగా ప్రశాంతంగా ఉండాలంటే బెడ్ పక్కన ఒక స్నేక్ ప్లాంట్ ఉంచడం చాలా మంచిది.

3. అరెకా పామ్:
లివింగ్ రూమ్ లేదా హాల్‌లో పెట్టడానికి అరెకా పామ్ బెస్ట్ ఛాయిస్. దీని పొడవాటి ఆకులు చూడటానికి అందంగా ఉండటమే కాకుండా, ఇవి అద్భుతమైన ‘సహజసిద్ధమైన హ్యూమిడిఫైయర్ లా పనిచేస్తాయి. ఇది గదిలో ఉండే పొడి గాలిని నిరంతరం ఫిల్టర్ చేస్తూ.. తేమను విడుదల చేస్తుంది. దీనివల్ల గది ఉష్ణోగ్రత 1 నుంచి 2 డిగ్రీల వరకు తగ్గే అవకాశం ఉంది.

4. బోస్టన్ ఫెర్న్ :
బోస్టన్ ఫెర్న్ మొక్క ఆకులు ఎల్లప్పుడూ పచ్చగా, దట్టంగా బుష్ లాగా పెరుగుతాయి. గాలిలోని కాలుష్య కారకాలను క్లీన్ చేయడంలో ఇది దిట్ట. ఈ మొక్క గాలిలోని వేడిని వేగంగా గ్రహించి, చల్లదనాన్ని ఇస్తుంది. దీనిని హ్యాంగింగ్ పాట్స్ లో పెట్టి బాల్కనీలో లేదా కిటికీల దగ్గర వేలాడదీస్తే, బయటి నుంచి వచ్చే వేడి గాలిని ఇది చల్లని గాలిగా మారుస్తుంది.

5. పీస్ లిల్లీ :
తెల్లటి అందమైన పూలతో వికసించే పీస్ లిల్లీ మొక్క గదికి రిచ్ లుక్‌ను ఇస్తుంది. ఇది గాలిలోని తేమ శాతాన్ని సమతుల్యంగా ఉంచుతుంది. గదిలో ఉక్కపోత లేదా చెమట ఎక్కువగా పడుతున్నట్లు అనిపిస్తే.. పీస్ లిల్లీ ఆ తేమను కంట్రోల్ చేసి వాతావరణాన్ని ఆహ్లాదకరంగా మారుస్తుంది. వారానికి ఒక్కసారి నీళ్లు పోసినా ఈ మొక్క హ్యాపీగా తట్టుకోగలదు.

స్మార్ట్ సమ్మర్ టిప్స్:
ఈ ఇండోర్ మొక్కల ఆకులపై ఎండాకాలంలో వారానికి రెండు సార్లు నీటిని లైట్ గా స్ప్రే చేస్తుండాలి. ఆకులపై దుమ్ము లేకుండా క్లీన్ గా ఉంటేనే.. అవి వాతావరణంలో ఉన్న వేడిని బాగా పీల్చుకుని, ఇల్లును చల్లగా మార్చగలవు. ఆర్టిఫిషియల్ ఏసీల కంటే.. ప్రకృతి ప్రసాదించిన ఈ ఇండోర్ ప్లాంట్స్‌ను ఇంట్లోకి తెచ్చుకోవడం వల్ల ఆరోగ్యం మెరుగుపడటమే కాకుండా.. మీ ఇల్లు ప్రశాంతమైన నందనవనంలా మారుతుంది.