Vitamin D: విటమిన్-డి ట్యాబ్లెట్లు వాడుతున్నారా ? అయితే ఈ తప్పులు చేయకండి!

Vitamin D: నేటి కాలంలో విటమిన్-డి లోపం ఒక సాధారణ ఆరోగ్య సమస్యగా మారింది. ఎముకల బలం, రోగ నిరోధక శక్తి, మానసిక ఆరోగ్యానికి ఈ విటమిన్ అత్యవసరం. అయితే.. చాలా మంది విటమిన్-డి సప్లిమెంట్లను తీసుకుంటున్నప్పటికీ.. సరైన ఫలితాలు పొందలేకపోతున్నారు. దీనికి ప్రధాన కారణం దాన్ని తీసుకునే విధానం, సమయం తెలియకపోవడమే. విటమిన్-డి అనేది కొవ్వులో కరిగే విటమిన్, కాబట్టి దీనిని ఖాళీ కడుపుతో కాకుండా సరైన ఆహారంతో కలిపి తీసుకున్నప్పుడే శరీరం గ్రహించగలుగుతుంది. విటమిన్-డి తీసుకోవడానికి సరైన సమయం, పద్ధతుల గురించి తెలుసుకుందాం.

విటమిన్-డి ఎందుకు ముఖ్యం ?

విటమిన్-డి అనేది కేవలం ఒక విటమిన్ మాత్రమే కాదు. ఇది శరీరంలో ఒక హార్మోన్‌లా పనిచేస్తుంది. మన శరీరం కాల్షియంను గ్రహించాలంటే విటమిన్-డి తప్పనిసరి. ఇది లేకపోతే ఎముకలు బలహీనపడటం, కండరాల నొప్పులు, అలసట, డిప్రెషన్ వంటి సమస్యలు ఎదురవుతాయి. సూర్యరశ్మి ద్వారా ఇది సహజంగా లభించినప్పటికీ.. మారుతున్న లైఫ్ స్టైల్ వల్ల చాలా మంది సప్లిమెంట్లపై ఆధారపడుతున్నారు.

విటమిన్-డి తీసుకోవడానికి సరైన సమయం ఏది?
విటమిన్-డి తీసుకోవడానికి ‘ఉదయం లేదా మధ్యాహ్నం’ అత్యంత అనుకూలమైన సమయమని నిపుణులు సూచిస్తున్నారు.

బ్రేక్‌ఫాస్ట్ లేదా లంచ్ సమయంలో: విటమిన్-డి ని రోజులో అతిపెద్ద భోజనంతో పాటు తీసుకోవడం వల్ల దాని శోషణ 50 శాంతి వరకు పెరుగుతుంది.

రాత్రిపూట ఎందుకు వద్దు ?:
కొంతమంది రాత్రిపూట విటమిన్-డి తీసుకుంటారు, కానీ ఇది నిద్రపై ప్రభావం చూపుతుంది. విటమిన్-డి శరీరంలో ‘మెలటోనిన్’ (నిద్రను కలిగించే హార్మోన్) ఉత్పత్తిని అడ్డుకుంటుంది. దీని వల్ల నిద్రలేమి సమస్యలు తలెత్తవచ్చు.

కొవ్వు పదార్థాలతో కలిపి తీసుకోవడం తప్పనిసరి:
విటమిన్-డి అనేది ‘ఫ్యాట్ సొల్యూబుల్’ విటమిన్. అంటే ఇది నూనె లేదా కొవ్వు ఉన్నప్పుడే కరుగుతుంది. మీరు కేవలం నీళ్లతో విటమిన్-డి ట్యాబ్లెట్ వేసుకుంటే అది శరీరానికి పూర్తిగా అందదు.

ఆరోగ్యకరమైన కొవ్వులు ఉన్న ఆహారాలు: నెయ్యి, పెరుగు, గుడ్లు, బాదం, అవకాడో లేదా ఆలివ్ ఆయిల్ వంటి వాటితో కలిపి తీసుకోవడం వల్ల విటమిన్-డి రక్తంలో త్వరగా కలుస్తుంది.

Also Read:ఏఐ స్టెతస్కోప్‌తో గుండె జబ్బులను ముందే పసిగట్టవచ్చు తెలుసా ?

సూర్యరశ్మి – సహజ వనరు:
ట్యాబ్లెట్ల కంటే సూర్యరశ్మి ద్వారా వచ్చే విటమిన్-డి ఎప్పుడూ శ్రేష్ఠం. ఉదయం 10 గంటల నుంచి మధ్యాహ్నం 3 గంటల మధ్య కనీసం 15-20 నిమిషాల పాటు ఎండలో ఉండటం వల్ల శరీరం తగినంత విటమిన్-డి ని తయారు చేసుకుంటుంది.

అతిగా తీసుకోవద్దు:
విటమిన్-డి మంచిదే కదా అని మోతాదుకు మించి తీసుకోకూడదు. రక్తంలో విటమిన్-డి స్థాయిలు మరీ ఎక్కువగా ఉంటే , అది కిడ్నీలో రాళ్లు, గుండె సమస్యలకు దారితీయవచ్చు. అందుకే డాక్టర్ సలహా మేరకు నెలకు ఒకసారి లేదా వారానికి ఒకసారి తీసుకునే డోసేజ్ పాటించాలి.

విటమిన్-డి ని సరైన పద్ధతిలో తీసుకోవడం వల్ల శారీరక శక్తి పెరగడమే కాకుండా.. మానసిక ప్రశాంతత కూడా లభిస్తుంది. ఎప్పుడూ ఆరోగ్యకరమైన కొవ్వు ఉన్న ఆహారంతో పాటు.. ఉదయం పూట దీనిని తీసుకోవడం అలవాటు చేసుకోండి.