Jeanne Calment: ప్రస్తుత కాలంలో 100 ఏళ్లు జీవించడమనేది కఠినమైన ఆహార నియమాలు, జిమ్ వర్కవుట్ల వల్ల మాత్రమే సాధ్యం అని అనుకుంటాం.. కానీ 122 ఏళ్లు జీవించిన జీన్ కాల్మెంట్ ఈ అంచనాలను తలకిందులు చేశారు. చాక్లెట్లు తింటూ, ఆల్కహాల్ తీసుకుంటూనే ఆమె ప్రపంచ రికార్డు సృష్టించారు. దీర్ఘాయువు అనేది అద్భుతమైన జన్యువులు, ఒత్తిడి లేని మనస్తత్వానికి సంబంధించిన విషయమని ఆమె నిరూపించారు. కేవలం ఆహార నియమాలే కాకుండా.. జీవితం పట్ల సానుకూల దృక్పథం, ఆనందకరమైన జీవితంతో పాటు.. శారీరక శ్రమ వంటివి మనిషిని నిండు నూరేళ్లూ ఆరోగ్యంగా ఉంచుతాయని ఆమె జీవితం మనకు నేర్పుతోంది.
జీన్ కాల్మెంట్ నేర్పిన పాఠాలు:
నేటి కాలంలో ‘బయో-హ్యాకింగ్’ ‘వెల్నెస్ ట్రెండ్స్’ పేరిట మనం ఆరోగ్యం విషయంలో విపరీతమైన ఒత్తిడికి గురవుతున్నాం. అయితే.. 1875లో జన్మించి 1997 వరకు జీవించిన జీన్ కాల్మెంట్ జీవితం ఒక భిన్నమైన కోణాన్ని ఆవిష్కరిస్తుంది.
అలవాట్లు:
ఆరోగ్య నిపుణులు హెచ్చరించే కొన్ని అలవాట్లను ఆమె తన జీవితాంతం కొనసాగించారు. వారానికి దాదాపు రెండు పౌండ్ల చాక్లెట్ తినడం ఆమెకు అలవాటు. అలాగే. ఆహారంలో ఆలివ్ ఆయిల్ , పోర్ట్ వైన్ తప్పకుండా ఉండేవి. ఆశ్చర్యకరమైన విషయం ఏమిటంటే.. ఆమె 117 ఏళ్ల వయసు వరకు డ్రింక్ చేసేవారు. సాధారణంగా ఇలాంటి అలవాట్లు అనారోగ్యానికి దారితీస్తాయని భావిస్తాం. కానీ జీన్ విషయంలో అవి సంతోషానికి మార్గాలుగా నిలిచాయి.
సైన్స్ ఏం చెబుతోంది?
జీన్ అంత కాలం జీవించడానికి ప్రధానంగా రెండు కారణాలను పరిశోధకులు గుర్తించారు.
అద్భుతమైన జన్యువులు: ఆమె కుటుంబంలో చాలా మంది ఎక్కువ కాలం జీవించిన వారే. శాస్త్రీయంగా చెప్పాలంటే.. ఆమె శరీరంలో కణాల క్షీణత వేగం చాలా తక్కువగా ఉండేది.
ఒత్తిడి లేని జీవనం: ఆమె ఫ్రాన్స్లోని అర్లెస్ నగరంలో ఒక మధ్యతరగతి కుటుంబంలో ప్రశాంతమైన జీవితాన్ని గడిపారు. తీవ్రమైన పేదరికం లేదా జాబ్ ఒత్తిడి వంటివి ఆమెకు లేవు.
మనస్తత్వమే ప్రాణాధారం:
జీన్ కాల్మెంట్ కథ మనకు ఆల్కహాల్ చేయమని లేదా చాక్లెట్లు అతిగా తినమని చెప్పడం లేదు. ఆరోగ్యవంతులుగా ఉండాలనే తపనతో మనం పడే ‘ఒత్తిడి’ మన ఆరోగ్యాన్ని దెబ్బతీస్తుందని హెచ్చరిస్తోంది. ఆమె ఎప్పుడూ నవ్వుతూ.. చమత్కారంగా ఉండేవారు. “ఒకవేళ మీరు దేనినైనా మార్చలేకపోతే.. దాని గురించి చింతించకండి” అన్నదే ఆమె సూత్రం.
నేటి ప్రపంచానికి పాఠాలు:
ఆనందం ముఖ్యం: రోజువారీ జీవితంలో చిన్న చిన్న ఆనందాలను వెతుక్కోవడం వల్ల శరీరంలో హ్యాపీ హార్మోన్లు విడుదలవుతాయి.
శ్రమ: ఆమె వంద ఏళ్ల వయసు వరకు సైకిల్ తొక్కేవారు. అంటే ఎక్కువ సేపు వర్కవుట్లు చేయకపోయినా.. శరీరాన్ని నిరంతరం కదిలించడం అవసరమని ఆమె నిరూపించారు.
వృద్ధాప్యం ఒక వరం: వయసు పెరుగుతున్నప్పుడు భయపడకుండా.. దానిని ఒక గౌరవంగా భావించి నవ్వుతూ స్వీకరించడం ఆమె గొప్పతనం.
జీన్ కాల్మెంట్ జీవితం ఒక అద్భుతం. ఆమె కథ మనకు గుర్తు చేసేది ఒక్కటే.. మంచి ఆహారం ఎంత అవసరమో, అంతకంటే ఎక్కువ ప్రశాంతమైన మనస్సు, చిరునవ్వు, జీవితం పట్ల సానుకూల దృక్పథం అవసరం. కేవలం జీవించడానికి కాకుండా.. ఆనందంగా జీవించడమే దీర్ఘాయువుకు అసలైన రహస్యం.
Share
ఉమ్మడి మెదక్ జిల్లాలో కదం తొక్కిన ఆర్టీసీ కార్మికులు
షావోమీ కత్తిలాంటి టీవీ.. దీని ఫీచర్లు ఉన్నాయ్ భయ్యా.. చూస్తే ఇప్పుడే కొనేస్తారు!
