చిక్కుల జుట్టుతో విసిగిపోయారా? ఈ సమ్మర్ హెయిర్ కేర్ సీక్రెట్స్ మీకోసమే!

Frizzy Hair Tips: వేసవి కాలం కేవలం చర్మానికే కాదు, జుట్టుకు కూడా పెద్ద సవాలు. గాలిలో ఉండే తేమ జుట్టులోని సహజ నూనెలను దెబ్బతీసి.. జుట్టును చిక్కులుగా మారుస్తుంది. దీని వల్ల జుట్టు చూడటానికి గడ్డిలా, నిర్జీవంగా కనిపిస్తుంది. సరైన జాగ్రత్తలు తీసుకోకపోతే జుట్టు రాలడం కూడా మొదలవుతుంది. ఈ సమస్యను అధిగమించడానికి ఖరీదైన ట్రీట్‌మెంట్లు అవసరం లేదు. సరైన అలవాట్లు, సహజమైన పద్ధతులు పాటిస్తే చాలు. మీ జుట్టును వేసవి తాపం నుంచి కాపాడుకుని, సిల్కీగా ఉంచుకునే మార్గాలను ఇప్పుడు చూద్దాం.

వేసవిలో జుట్టు సంరక్షణ అనేది చాలా మందికి తలనొప్పిగా మారుతుంది. ముఖ్యంగా చెమట వల్ల జుట్టు జిడ్డుగా మారడం, ఎండ వల్ల చిక్కులు పడటం సాధారణం. వీటిని నివారించడానికి కింది చిట్కాలు పాటించండి.

1. సల్ఫేట్ లేని షాంపూలను వాడండి:
వేసవిలో జుట్టును తరచుగా కడగాల్సి వస్తుంది. కాబట్టి కెమికల్స్ తక్కువగా ఉండే, సల్ఫేట్ లేని షాంపూలను వాడండి. ఇవి జుట్టులోని తేమను కోల్పోకుండా చేస్తాయి. అలాగే.. తలస్నానానికి వేడి నీటిని అస్సలు వాడకండి. కేవలం గోరు వెచ్చని లేదా చల్లని నీటిని మాత్రమే వాడండి.

2. కండిషనింగ్ తప్పనిసరి:
షాంపూ చేసిన ప్రతిసారీ కండిషనర్ వాడటం మర్చిపోవద్దు. ఇది జుట్టు పొరలపై ఒక రక్షణ కవచంలా పని చేస్తుంది. చిక్కులను తగ్గించడానికి ‘లీవ్-ఇన్ కండిషనర్’ వాడటం ఈ సీజన్‌లో చాలా మంచిది. ఇది గాలిలోని తేమ వల్ల జుట్టు ఉబ్బిపోకుండా చూస్తుంది.

3. సహజమైన హెయిర్ మాస్క్‌లు:
వారానికి ఒకసారి ఇంట్లోనే తయారు చేసుకున్న హెయిర్ మాస్క్‌లు వేయండి.

పెరుగు , తేనె: పెరుగు జుట్టును చల్లబరుస్తుంది. అంతే కాకుండా తేనె తేమను అందిస్తుంది.

అలోవెరా జెల్: ఇది జుట్టును హైడ్రేట్ చేసి చిక్కులను తగ్గిస్తుంది. అలోవెరా జెల్‌ను జుట్టుకు పట్టించి 20 నిమిషాల తర్వాత కడిగేయండి.

4. హీట్ స్టైలింగ్ టూల్స్‌కు దూరంగా ఉండండి:
వేసవిలో ఇప్పటికే ఎండ వేడి ఎక్కువగా ఉంటుంది. దీనికి తోడు హెయిర్ డ్రైయర్లు, స్ట్రెయిటనర్లు వాడితే జుట్టు మరింత డ్యామేజ్ అవుతుంది. వీలైనంత వరకు జుట్టును సహజంగా ఆరనివ్వండి. తప్పని సరి అయితే.. ‘హీట్ ప్రొటెక్టెంట్’ స్ప్రే వాడండి.

5. జుట్టును కవర్ చేయండి:
ఎండలో బయటకు వెళ్లేటప్పుడు హ్యాట్ వాడటం లేదా స్కార్ఫ్‌తో జుట్టును కవర్ చేయడం చాలా ముఖ్యం. సూర్యరశ్మిలోని UV కిరణాలు జుట్టులోని ప్రోటీన్‌ను దెబ్బతీస్తాయి. జుట్టును వదిలేయకుండా.. వదులుగా ఉండే జడలు లేదా బన్ వేసుకోవడం వల్ల చిక్కులు పడకుండా ఉంటాయి.

6. సరైన దువ్వెన వాడటం:
తడి జుట్టు మీద చిన్న పళ్లున్న దువ్వెన వాడకండి. జుట్టు చిక్కులు తీయడానికి వెడల్పాటి పళ్లున్న దువ్వెన వాడటం వల్ల జుట్టు తెగకుండా ఉంటుంది.

జుట్టు ఆరోగ్యం మనం తీసుకునే ఆహారం మీద కూడా ఆధారపడి ఉంటుంది. వేసవిలో జుట్టుకు లోపలి నుంచి బలం చేకూరాలంటే తగినంత నీరు తాగడం, ప్రొటీన్ కలిగిన ఆహారం తీసుకోవడం అవసరం. పైన చెప్పిన చిట్కాలు పాటిస్తే.. ఈ వేసవిలో కూడా మీ జుట్టు మెరుస్తూ, అందంగా ఉంటుంది.