సమ్మర్ హెయిర్ కేర్.. జుట్టు ఆరోగ్యాన్ని రెట్టింపు చేసే 9 మార్గాలు!

summer hair care: వేసవి కాలం రాగానే చర్మంతో పాటు జుట్టు కూడా అనేక సమస్యలను ఎదుర్కొంటుంది. సూర్యుడి నుంచి వచ్చే అతినీలలోహిత కిరణాలు జుట్టులోని తేమను హరించి, దానిని పొడిగా ,నిర్జీవంగా మారుస్తాయి. దీనికి తోడు విపరీతమైన చెమట వల్ల జుట్టు కుదుళ్లలో మురికి పేరుకుపోయి జుట్టు రాలడం మొదలవుతుంది. అయితే.. సరైన జాగ్రత్తలు తీసుకుంటే వేసవిలో కూడా మీ జుట్టును అందంగా.. ఆరోగ్యంగా ఉంచుకోవచ్చు. మీ హెయిర్ కేర్ కోసం 9 సులభమైన మార్గాలను ఇప్పుడు తెలుసుకుందాం.

1. జుట్టును కప్పి ఉంచండి:
ఎండలోకి వెళ్లేటప్పుడు క్యాప్ లేదా స్కార్ఫ్ వాడటం వల్ల సూర్యకిరణాలు నేరుగా జుట్టుపై పడకుండా ఉంటాయి. ఇది జుట్టు రంగు మారకుండా , తేమ కోల్పోకుండా కాపాడుతుంది.

2. క్రమం తప్పకుండా తలస్నానం:
వేసవిలో చెమట వల్ల తలలో మురికి చేరుతుంది. కాబట్టి వారానికి కనీసం రెండు లేదా మూడు సార్లు షాంపూతో తలస్నానం చేయడం వల్ల కుదుళ్లు శుభ్రంగా ఉంటాయి.

3. కండిషనర్ వాడకం:
ఎండ వల్ల జుట్టు పొడిగా మారుతుంది. తలస్నానం చేసిన ప్రతిసారీ కండిషనర్ వాడటం వల్ల జుట్టుకు తగినంత తేమ అందుతుంది. జుట్టు చివర్ల వరకు కండిషనర్‌ను అప్లై చేయడం మర్చిపోకండి.

4. వేడి పరికరాలకు దూరం:
వేసవిలో సహజంగానే వాతావరణం వేడిగా ఉంటుంది. కాబట్టి ఈ సమయంలో హెయిర్ డ్రైయర్లు లేదా స్ట్రెయిటెనింగ్ మిషన్లు వాడటం వల్ల జుట్టు మరింత బలహీనపడి విరిగిపోతుంది. జుట్టును సహజ గాలికి ఆరనివ్వండి.

5. ఈత కొట్టే ముందు జాగ్రత్త:
వేసవిలో స్విమ్మింగ్ పూల్‌కు వెళ్లేవారు జుట్టుకు ముందుగా నూనె పట్టించడం లేదా స్విమ్మింగ్ క్యాప్ వాడటం మంచిది. పూల్‌లోని క్లోరిన్ నీరు జుట్టును తీవ్రంగా దెబ్బతీస్తుంది.

6. జుట్టు చివర్లను కత్తిరించడం:
వేసవిలో జుట్టు చివర్లు చిట్లిపోవడం సాధారణం. కాబట్టి 2-3 నెలలకోసారి కొద్దిగా జుట్టు చివర్లను కత్తిరించడం వల్ల జుట్టు పెరుగుదల బాగుంటుంది.

7. సహజమైన హెయిర్ మాస్క్:
వారానికి ఒకసారి కలబంద లేదా పెరుగుతో చేసిన హెయిర్ మాస్క్ వేసుకోవడం వల్ల తలకు చలువ చేస్తుంది. అంతే కాకుండా జుట్టుకు పోషణ అందుతుంది.

8. నూనెతో మసాజ్:
వేసవిలో నూనె వద్దు అనుకోకండి. కొబ్బరి నూనె లేదా బాదం నూనెను గోరు వెచ్చగా చేసి వారానికి ఒకసారి మసాజ్ చేయడం వల్ల రక్త ప్రసరణ మెరుగుపడి జుట్టు బలంగా మారుతుంది.

9. సరైన ఆహారం, నీరు:
జుట్టు ఆరోగ్యం లోపల నుంచి మొదలవుతుంది. రోజుకు 3-4 లీటర్ల నీరు తాగడం, తాజా పండ్లు, కూరగాయలు తీసుకోవడం వల్ల జుట్టుకు అవసరమైన విటమిన్లు అందుతాయి.

వేసవిలో జుట్టు రాలడం అనేది పెద్ద సమస్యే అయినప్పటికీ.. పైన పేర్కొన్న 9 చిట్కాలను క్రమం తప్పకుండా పాటిస్తే మీ జుట్టును ఆరోగ్యంగా ఉంచుకోవచ్చు.