ఈ రోజుల్లో మహిళలు ప్రతి రంగంలో విజయాలు సాధిస్తున్నారు. చాలామంది వివాహిత మహిళలు తమ భర్తలతో సమానంగా లేదా అంతకంటే ఎక్కువ సంపాదిస్తున్నారు. మహిళ ఎక్కువ సంపాదించడం తప్పు కాదు. అయినప్పటికీ, సంప్రదాయ ఆలోచనలు ఇప్పటికీ చాలా కుటుంబాలపై ప్రభావం చూపుతున్నాయి. సమాజం వేగంగా మారుతున్నా, వ్యక్తిగత సంబంధాలు అంత వేగంగా మారడం లేదు. ఇటీవల ‘ది ఎకనామిస్ట్’ అనే అమెరికన్ వార్తా పత్రిక ఎక్కువ సంపాదన ఉన్న భార్యలు, వారి భర్తలపై ఒక అధ్యయనం చేసింది. ఈ అధ్యయనంలో వారి దాంపత్య జీవితంపై పడే ప్రభావమే కీలకం.
ది ఎకనామిస్ట్ విశ్లేషణలో ఉద్యోగాలు చేసే విభిన్న రకాల జంటలను పరిశీలించారు. గల 17 సంవత్సరాల డేటాను విశ్లేషించి, కుటుంబంలో ప్రధానంగా సంపాదించే వ్యక్తిగా భార్య మారినప్పుడు సంబంధాల్లో ఎలాంటి మార్పులు వస్తాయో అధ్యయనం చేశారు. ఈ ఫలితాలు ప్రతి జంటకు వర్తించవు. అయితే ఇవి కేవలం సాధారణ ధోరణులు మాత్రమే సూచిస్తున్నాయి.
అధ్యయనం ప్రకారం.. కేవలం సుమారు 30 శాతం జంటల్లో మాత్రమే భర్త కంటే భార్య ఎక్కువ సంపాదిస్తోంది. మహిళల ఆదాయం పెరుగుతున్నప్పటికీ, ఇలాంటి కుటుంబాలు ఇంకా చాలా తక్కువగా ఉన్నాయి. కుటుంబ ఆదాయంలో ఎక్కువ భాగం భార్య సంపాదించినప్పుడు కొన్ని భావోద్వేగ మార్పులు కనిపించాయని పరిశోధకులు గుర్తించారు.
కుటుంబ ఆదాయంలో భార్య 70 శాతం లేదా అంతకంటే ఎక్కువ సంపాదించే ఆ కుటుంబాల్లో కొంతమంది పురుషుల్లో మానసిక ఒత్తిడి ఎక్కువగా కనిపించింది. దీనికి తక్కువ సంపాదన మాత్రమే కారణం కాదు. కుటుంబానికి ప్రధాన ఆర్థిక ఆధారం పురుషుడే కావాలనే సంప్రదాయ భావనలు కూడా దీనికి కారణమవుతాయని పరిశోధకులు భావిస్తున్నారు.
కొంతమంది పురుషులు.. బంధువులు, స్నేహితులు లేదా సమాజం తమ కుటుంబాన్ని ఎలా చూస్తుందో అనే ఆందోళనలో ఉంటారు. భార్య విజయం పట్ల గర్వంగా ఉన్నప్పటికీ, లోపల ఒత్తిడి అనుభవించే పరిస్థితి కూడా రావచ్చు. సంప్రదాయ పాత్రల ప్రభావం ఇంకా పూర్తిగా తగ్గలేదని అధ్యయనం లో తేలింది.
పెళ్లి కాకుండా కలిసి నివసిస్తున్న జంటల్లో కూడా ఇలాంటి ఫలితాలే కనిపించాయి. మహిళ ఎక్కువ సంపాదించినప్పుడు కొంతమంది పురుషుల్లో ఒత్తిడి పెరిగినట్లు గుర్తించారు. వయసు, విద్య, మొత్తం కుటుంబ ఆదాయాన్ని పరిగణనలోకి తీసుకున్నప్పటికీ ఈ ధోరణి కొనసాగింది.
Also Read: డబ్బు, అందం కాదు.. మహిళలు తమ భర్తలో ఈ 3 గుణాలు ఉండాలని కోరుకుంటారు
ఎక్కువ సంపాదించడం వల్ల మహిళలు ఎప్పుడూ ఎక్కువ సంతోషంగా ఉంటారనే విషయం నిజం కాదని అధ్యయనం తెలిపింది. చాలామంది మహిళలు ఉద్యోగంతో పాటు ఇంటి పనులు, పిల్లల సంరక్షణ, కుటుంబ బాధ్యతలను కూడా నిర్వహిస్తున్నారు. దీనివల్ల శారీరకంగా, మానసికంగా అలసట పెరిగే అవకాశం ఉంటుంది.
ఉద్యోగం చేయడంతో పాటు ఇంటి పనుల బాధ్యత కూడా మహిళలపైనే ఎక్కువగా ఉండడం వల్ల ‘డబుల్ బర్డన్’ అంటే ‘రెట్టింపు భారం’ పరిస్థితి ఏర్పడుతుంది. ఎక్కువ ఆదాయం వచ్చినా బాధ్యతలు తగ్గకపోతే ఒత్తిడి పెరగవచ్చు. కుటుంబ సభ్యులు బాధ్యతలను సమానంగా పంచుకుంటే సంబంధాలు మరింత బలపడతాయి.
గత కొన్ని సంవత్సరాల్లో మహిళలు ఎక్కువ సంపాదించడాన్ని సమాజం మరింత సానుకూలంగా స్వీకరిస్తోంది. అయినప్పటికీ, వ్యక్తిగత సంబంధాల్లో ఈ మార్పు పట్ల సమాజం పూర్తిగా అలవాటు పడేందుకు ఇంకా సమయం పడవచ్చు. పరస్పర గౌరవం, స్పష్టమైన సంభాషణ, సమాన బాధ్యతలు ఆరోగ్యకరమైన దాంపత్యానికి ఎంతో అవసరం.
భర్త విలువ అతని జీతంతో నిర్ణయించబడదు. అలాగే భార్య విజయం భర్తను తక్కువ చేయదు. ఇద్దరూ ఒకరినొకరు గౌరవించుకుని, ఆర్థిక, కుటుంబ బాధ్యతలను సమానంగా పంచుకుంటే సంబంధం మరింత బలంగా ఉంటుంది. విజయవంతమైన దాంపత్యానికి ఆదాయం కంటే పరస్పర నమ్మకం, గౌరవమే అసలు బలం.
Share
పవర్ ఫుల్ ఇంజిన్.. అదిరిపోయే ఫీచర్లు.. కొత్త బ్రెజ్జా వచ్చేసింది!
మాజీ మంత్రి జోగి రమేష్ కుటుంబంలో కలకలం.. భర్త, అత్తమామలతో సహా 11 మందిపై మందిపై గృహ హింస కేసు
