Arati Puvvu benefits: అరటి పువ్వు తినడం వల్ల లాభాలేంటి? ఎందుకు తినాలి?

అరటి చెట్టుకు కాసే పండ్లు మాత్రమే కాదు ఆకు, తొక్క, పువ్వు అన్నీ ఉపయోగపడతాయి. వాటిలో అరటి పువ్వు (Banana Flower) ఆరోగ్యానికి అద్భుతమైన ఔషధం లాంటిది. దక్షిణ భారతదేశంలో ఇది వంటల్లో ఎక్కువగా వాడుతారు. కానీ చాలా మందికి దీని ఆరోగ్య ప్రయోజనాల గురించి అంతగా తెలియదు. అరటి పువ్వు తినడం వల్ల శరీరానికి ఎలాంటి లాభాలు కలుగుతాయో తెలుసుకోండి.

రక్తహీనత తగ్గిస్తుంది
అరటి పువ్వులో ఇనుము (Iron) సమృద్ధిగా ఉంటుంది. ఇది రక్తంలో హీమోగ్లోబిన్ స్థాయిని పెంచుతుంది. కాబట్టి రక్తహీనత ఉన్నవారు దీన్ని తరచూ తింటే శరీరానికి బలం వస్తుంది. అలసట తగ్గుతుంది. ముఖ్యంగా మహిళలకు ఇది చాలా మంచిది. దీనిని తినడం వల్ల నెలసరి సమయంలో వచ్చే నొప్పి, ఒత్తిడి తగ్గుతాయి. ఇది హార్మోన్ల సమతుల్యతను కాపాడుతుంది. గర్భిణీలకు కూడా అవసరమైన పోషకాలు అందిస్తుంది.

మధుమేహం తగ్గిస్తుంది
అరటి పువ్వులో సహజంగానే ఫైబర్ ఎక్కువగా ఉంటుంది. ఇది రక్తంలో చక్కెర స్థాయిని నియంత్రిస్తుంది. మధుమేహం ఉన్నవారు తమ ఆహారంలో దీనిని చేర్చుకుంటే షుగర్ లెవెల్స్ స్థిరంగా ఉంటాయి. అరటి పువ్వు తేలికగా జీర్ణమయ్యే ఆహారం. ఇందులో ఉండే ఫైబర్ జీర్ణక్రియ సరిగా ఉండేలా చేస్తుంది. మలబద్ధకం, గ్యాస్, కడుపు నొప్పి వంటి సమస్యలు తగ్గుతాయి. అరటి పువ్వులో విటమిన్ C, యాంటీ ఆక్సిడెంట్లు ఎక్కువగా ఉంటాయి. ఇవి శరీరాన్ని బ్యాక్టీరియా, వైరస్‌ల నుంచి రక్షిస్తాయి. శీతాకాలంలో లేదా వాతావరణ మార్పుల సమయంలో దీన్ని తినడం వల్ల జలుబు, దగ్గు వంటి సమస్యలు దూరమవుతాయి.

బరువు తగ్గిస్తుంది
బరువు తగ్గాలనుకునేవారికి అరటి పువ్వు మంచి ఆహారం. ఇది తక్కువ కేలరీలతో పాటు అధిక ఫైబర్ కలిగి ఉంటుంది. దీన్ని తిన్న తర్వాత పొట్ట నిండిన భావన కలిగిస్తుంది, అలా అధికంగా తినకుండా నియంత్రిస్తుంది. అరటి పువ్వు గుండెకు ఎంతో మేలు చేస్తుంది. ఇందులో పొటాషియం, యాంటీ ఆక్సిడెంట్లు ఉండటం వల్ల రక్తపోటు స్థాయిని నియంత్రిస్తుంది. కొలెస్ట్రాల్ తగ్గిస్తుంది. దీని వల్ల గుండెపోటు ప్రమాదం తగ్గుతుంది. అరటి పువ్వు మూత్రపిండాల పనితీరును మెరుగుపరుస్తుంది. ఇది శరీరంలో ఉన్న విషపదార్థాలను బయటకు పంపడంలో సహాయపడుతుంది. తరచూ మూత్ర ఇన్‌ఫెక్షన్లు వచ్చే వారికి ఇది సహజమైన మందులా పనిచేస్తుంది.

గర్భిణీలు అరటి పువ్వు తింటే శరీరానికి కావాల్సిన ఇనుము, కాల్షియం, ఫైబర్ అందుతాయి. ఇది గర్భస్రావం ప్రమాదాన్ని తగ్గించడంలో కూడా సహాయపడుతుందని నిపుణులు చెబుతున్నారు.

అరటి పువ్వు ఎలా తినాలి?
అరటి పువ్వుతో కూరలు, వడలు, వేపుడు, పచ్చడి వంటి వంటకాలు చేసుకోవచ్చు. పువ్వు లోపలి ముల్లు లాంటి భాగాలను తీసేసి వంటకు వాడాలి. కొద్దిగా పుల్లగా, చేదుగా ఉన్న రుచిని కలిగి ఉంటుంది. కానీ మసాలాలు వేసి వండితే చాలా రుచిగా ఉంటుంది.