Ranveer Singh: కాంతారా సినిమా వల్ల.. కర్ణాటక హైకోర్టును ఆశ్రయించిన రణవీర్ సింగ్

Ranveer Singh: దురంధర్ సినిమా ద్వారా బ్లాక్ బస్టర్ అందుకున్న..బాలీవుడ్ నటుడు రణవీర్ సింగ్ పేరు మరోసారి వార్తల్లో నిలిచింది. తనపై నమోదైన ఒక కేసు విషయంలో ఆయన కర్ణాటక హైకోర్టును ఆశ్రయించారు. బెంగళూరులో నమోదైన ఎఫ్ఐఆర్‌ను రద్దు చేయాలని కోరుతూ ఆయన హైకోర్టులో పిటిషన్ వేశారు. ఈ విషయం ఇప్పుడు సినీ వర్గాలతో పాటు ప్రజల్లో కూడా చర్చకు దారి తీసింది.

అసలు ఈ కేసు ఏమిటంటే..!

ఈ కేసు ఎలా మొదలైంది అంటే, 2025 నవంబర్ 28న గోవాలో జరిగిన ఇంటర్నేషనల్ ఫిల్మ్ ఫెస్టివల్ ఆఫ్ ఇండియా (ఐఎఫ్ఎఫ్ఐ) ముగింపు వేడుకల్లో రణవీర్ సింగ్ ఒక స్టేజ్ ప్రదర్శన చేశారు. ఆ సమయంలో ఆయన చేసిన కొన్ని హావభావాలు, మాటలు కర్ణాటక తీర ప్రాంతాల్లో పూజించే దైవ సంప్రదాయాలను అవమానించినట్లుగా ఉన్నాయని ఆరోపణలు వచ్చాయి. ముఖ్యంగా సినిమా కాంతారా 2లో చూపించిన దైవ సంప్రదాయాలకు సంబంధించిన హావభావాలను అనుకరించారని ఫిర్యాదు నమోదైంది.

ఈ విషయంపై బెంగళూరుకు చెందిన న్యాయవాది ప్రశాంత్ మేతల్ పోలీసులకు ఫిర్యాదు చేశారు. ఆయన చెప్పిన ప్రకారం, రణవీర్ సింగ్ ప్రదర్శనకు సంబంధించిన వీడియోను డిసెంబర్ 2, 2025న ఇన్‌స్టాగ్రామ్‌లో చూసినట్లు తెలిపారు. ఆ వీడియో చూసిన తర్వాత తనతో పాటు అనేక మంది భక్తులకు తీవ్ర మనోవేదన కలిగిందని ఫిర్యాదులో పేర్కొన్నారు.

ఫిర్యాదు ప్రకారం.. రణవీర్ సింగ్ పంజుర్లీ, గులిగా దైవాలకు సంబంధించిన హావభావాలను అవమానకరంగా అనుకరించారని ఆరోపించారు. అంతేకాకుండా, చాముండి దైవాన్ని “స్త్రీ భూతం”గా పేర్కొన్నట్లుగా ఉన్న మాటలు చాలా బాధ కలిగించాయని తెలిపారు. చాముండి దైవం కర్ణాటక తీర ప్రాంతాల్లో రక్షక దేవతగా, దైవ శక్తి స్వరూపంగా పూజించబడుతుందని ఫిర్యాదులో స్పష్టం చేశారు.

ఈ వ్యాఖ్యల వల్ల భక్తుల మత భావాలు దెబ్బతిన్నాయని, సమాజంలో విభేదాలు కలిగే అవకాశం ఉందని ఫిర్యాదుదారు పేర్కొన్నారు. దీనిపై పోలీసులు భారతీయ న్యాయ సంహిత (బీఎన్‌ఎస్)లోని 196, 299, 302 సెక్షన్ల కింద కేసు నమోదు చేశారు.

ఈ కేసు ప్రస్తుతం బెంగళూరులోని ఫస్ట్ అడిషనల్ చీఫ్ మెట్రోపాలిటన్ మేజిస్ట్రేట్ కోర్టుకు పంపబడింది. ఈ వ్యవహారంపై ఏప్రిల్ 8న విచారణ జరగాల్సి ఉంది. అయితే, అంతకుముందే రణవీర్ సింగ్ హైకోర్టును ఆశ్రయించి, తనపై నమోదైన ఎఫ్ఐఆర్‌ను రద్దు చేయాలని కోరారు.

ఇప్పుడు ఈ అంశం పూర్తిగా న్యాయస్థానం పరిధిలో ఉంది. కోర్టు ఏ నిర్ణయం తీసుకుంటుందోనన్న ఆసక్తి అందరిలో ఉంది. సినిమాలు, సంప్రదాయాలు, మత భావాలు కలిసే సమయంలో ఎంత జాగ్రత్త అవసరమో ఈ ఘటన మరోసారి గుర్తు చేస్తోంది.

ALSO READ: Dhurandhar 2: ధురంధర్ 2లో కొత్త పాత్రలు.. ఆ ఇద్దరు స్టార్ నటులు ఎంట్రీ..!