Virosh: పెళ్లి అనౌన్స్ చేసిన రష్మిక, విజయ్ దేవరకొండ.. ది వెడ్డింగ్ ఆఫ్ విరోష్ అంటూ..!

Virosh: ప్రముఖ నటులు రష్మిక మందన్న మరియు విజయ్ దేవరకొండ తమ పెళ్లి విషయాన్ని అధికారికంగా ప్రకటించారు. చాలా రోజులుగా వీరి వివాహంపై వస్తున్న వార్తలకు ఇక ముగింపు పలికారు. సోషల్ మీడియాలో ఒక భావోద్వేగ పోస్టుతో తమ పెళ్లి ప్రకటనను వెల్లడించారు. ఈ పెళ్లికి వారు పెట్టిన పేరు అందరినీ ఆకట్టుకుంది. అదే “ది వెడ్డింగ్ ఆఫ్ విరోష్”.

పెళ్లి పేరు అదే..!

విజయ్, రష్మిక తమ పోస్టులో “విరోష్” అనే పేరు ఎలా వచ్చిందో వివరించారు. ఈ పేరు పెళ్లి ప్లానర్లు పెట్టింది కాదు, కుటుంబ సభ్యులు సూచించినదీ కాదు. సంవత్సరాల క్రితమే అభిమానులు విజయ్, రష్మిక పేర్లను కలిపి ప్రేమతో “విరోష్” అని పిలవడం మొదలుపెట్టారు. ఆ పేరు తమకు ఎంతో ప్రత్యేకంగా మారిందని వారు చెప్పారు.

తాము పెళ్లి గురించి ఆలోచించకముందే అభిమానులు తమను ప్రేమతో ఆదరించారని, తమ బంధానికి ఒక గుర్తింపు ఇచ్చారని చెప్పారు. అందుకే తమ పెళ్లినే అభిమానుల పేరుతో “ది వెడ్డింగ్ ఆఫ్ విరోష్”గా పిలవాలని నిర్ణయించుకున్నామని తెలిపారు. ఇది అభిమానులపై తమ ప్రేమకు, కృతజ్ఞతకు గుర్తుగా ఉంటుందని చెప్పారు.

వారు షేర్ చేసిన లేఖలో, “మేము ఏ నిర్ణయం తీసుకునే ముందే మీరు మాతో ఉన్నారు. ఎంతో ప్రేమతో మాకు ఒక పేరు ఇచ్చారు. ఈ రోజు మా జీవితాల కలయికను మీ గౌరవార్థంగా ‘ది వెడ్డింగ్ ఆఫ్ విరోష్’గా పేరు పెడుతున్నాం” అని రాశారు. ఈ మాటలు అభిమానులను చాలా భావోద్వేగానికి గురి చేశాయి.

ఇదిలా ఉండగా, ఇటీవల వీరి పెళ్లి ఆహ్వాన పత్రం సోషల్ మీడియాలో వైరల్‌గా మారింది. అందులో ఫిబ్రవరి 26, 2026న పెళ్లి జరగనున్నట్లు పేర్కొన్నారు. ఇది కుటుంబ సభ్యులు, సన్నిహిత మిత్రుల మధ్య సింపుల్‌గా జరుగుతుందని సమాచారం. మార్చి 4న హైదరాబాద్‌లో రిసెప్షన్ నిర్వహించనున్నట్లు ప్రచారం జరుగుతోంది.

గీత గోవిందం సినిమా ద్వారా మొదలైన వీరి ప్రయాణం ఇప్పుడు పెళ్లితో కొత్త అధ్యాయానికి చేరింది. అభిమానుల ప్రేమతో “విరోష్”గా మారిన ఈ జంటకు సోషల్ మీడియాలో శుభాకాంక్షలు వెల్లువెత్తుతున్నాయి.