Narsaiah Biopic: ప్రజా నేత ‘గుమ్మడి నర్సయ్య’ బయోపిక్ నుంచి శివన్న ఇంటెన్స్ ఫస్ట్ లుక్ రిలీజ్..

Narsaiah Biopic: తెలుగు రాజకీయ యవనికపై నిరాడంబరతకు, నిజాయితీకి నిలువుటద్దంలా నిలిచిన నేత గుమ్మడి నర్సయ్య. ఐదుసార్లు ఎమ్మెల్యేగా గెలిచినా, సామాన్యుడిలా సైకిల్‌పై అసెంబ్లీకి వెళ్లిన ఆయన జీవితం ఎందరికో స్ఫూర్తిదాయకం. ఇప్పుడు ఈ మహోన్నత ప్రజా నాయకుడి జీవిత విశేషాలను వెండితెరపై ఆవిష్కరించేందుకు సిద్ధమవుతోంది చిత్ర బృందం. ప్రవల్లిక ఆర్ట్స్ క్రియేషన్స్ బ్యానర్‌పై నిర్మాత ఎన్. సురేష్ రెడ్డి (ఎన్ఎస్ఆర్) నిర్మిస్తున్న ఈ చిత్రానికి పరమేశ్వర్ హివ్రాలే దర్శకత్వం వహిస్తున్నారు. ఈ బయోపిక్‌లో గుమ్మడి నర్సయ్య పాత్రలో కన్నడ కంఠీరవ, కరుణాడ చక్రవర్తి శివ రాజ్ కుమార్ నటిస్తున్నారు. ఉగాది పర్వదినాన్ని పురస్కరించుకుని చిత్ర యూనిట్ విడుదల చేసిన ఫస్ట్ లుక్ పోస్టర్ ప్రస్తుతం సోషల్ మీడియాలో ప్రకంపనలు సృష్టిస్తోంది.

ఈ పోస్టర్‌లో శివన్న ఆహార్యం అచ్చం గుమ్మడి నర్సయ్యను తలపిస్తోంది. భుజంపై కండువా, బిగించిన పిడికిలి, కళ్ళలో కనిపిస్తున్న ఆ ఇంటెన్సిటీ చూస్తుంటే.. ఈ పాత్ర కోసం శివ రాజ్ కుమార్ ఎంతగా పరితపించారో అర్థమవుతోంది. కేవలం లుక్ మాత్రమే కాకుండా, ఒక ప్రజా పోరాట యోధుడి గాంభీర్యాన్ని ఆయన తన నటనతో అద్భుతంగా పలికిస్తున్నట్లు కనిపిస్తోంది. ఇప్పటికే విడుదలైన గ్లింప్స్ సౌత్ ఇండియన్ ఫిల్మ్ ఇండస్ట్రీలో భారీ అంచనాలను పెంచగా, తాజాగా వచ్చిన పోస్టర్ ఆ అంచనాలను ఆకాశానికి చేర్చింది.

ఈ సినిమాను సాంకేతికంగా అత్యున్నత ప్రమాణాలతో తెరకెక్కిస్తున్నారు. సురేష్ బొబ్బిలి తన వైవిధ్యమైన సంగీతంతో ప్రాణం పోస్తున్నారు. సతీష్ ముత్యాల విజువల్స్ సినిమాకు ప్రత్యేక ఆకర్షణగా నిలవనున్నాయి. సత్య గిడుటూరి బాధ్యతలు నిర్వహిస్తున్నారు. సిద్దగాని సాయి కిరణ్ గౌడ్, చింతకింది రూప డిజైన్ చేసిన వేషధారణ శివన్నను అచ్చం నర్సయ్యలా మార్చడంలో సఫలమయ్యాయి. గుమ్మడి నర్సయ్య జీవిత కథ కేవలం ఒక ప్రాంతానికో, భాషకో పరిమితం కాదు. అందుకే ఈ చిత్రాన్ని తెలుగు, కన్నడ, తమిళం, మలయాళం, మరియు హిందీ భాషల్లో భారీ ఎత్తున విడుదల చేసేందుకు నిర్మాతలు ప్లాన్ చేస్తున్నారు. రాజకీయాల్లో విలువలు కోరుకునే ప్రతి ఒక్కరూ చూడాల్సిన సినిమాగా ఇది నిలవబోతోంది. నిజాయితీకి మారుపేరైన ఒక నాయకుడి కథను, నటనలో శిఖర సమానమైన శివ రాజ్ కుమార్ పోషించడం సినిమాపై మరింత ఆసక్తిని కలిగిస్తోంది. త్వరలోనే ఈ చిత్రానికి సంబంధించిన మరిన్ని అప్‌డేట్స్ రానున్నాయి.