‘ఉస్తాద్ భగత్ సింగ్’ నెగిటివ్ టాక్ ఎందుకు వచ్చింది.. హరీష్ శంకర్ చెప్పింది ఇదే..

Ustaad Bhagat Singh: పవర్ స్టార్ పవన్ కళ్యాణ్, మాస్ డైరెక్టర్ హరీష్ శంకర్ కాంబినేషన్‌లో వచ్చిన క్రేజీ ప్రాజెక్ట్ ‘ఉస్తాద్ భగత్ సింగ్’ బాక్సాఫీస్ వద్ద దూసుకుపోతోంది. ‘గబ్బర్ సింగ్’ తర్వాత ఈ ఇద్దరి కలయికలో వచ్చిన సినిమా కావడంతో అంచనాలు భారీగా ఉన్నాయి. అయితే, సోషల్ మీడియాలో వస్తున్న కొన్ని నెగిటివ్ రివ్యూలపై దర్శకుడు హరీష్ శంకర్ తాజాగా ఇచ్చిన ఇంటర్య్వూలో స్పందించారు. అసలు సినిమా చూసిన వారు ఎవరూ నెగిటివ్ గా చెప్పడంలేదు అని, చూడనివారే ఇలా ప్రచారం చేస్తున్నారని, అసలు ఏ సినిమా అయితే కొంతమంది నెగిటివ్ టాక్ నే ప్రచారం చేస్తున్నారని ఆయన చెప్పుకొచ్చారు.

ప్రేక్షకులు ఎంజాయ్ చేస్తున్నారు

సినిమా విడుదలైన తర్వాత అందుతున్న స్పందనపై హరీష్ శంకర్ ధీమా వ్యక్తం చేశారు. థియేటర్ల నుండి బయటకు వస్తున్న ప్రేక్షకులు చాలా హాయిగా, సరదాగా నవ్వుకుంటూ వస్తున్నారని ఆయన పేర్కొన్నారు. ఫ్యామిలీ ఆడియన్స్ ముఖ్యంగా వినోదాన్ని బాగా ఎంజాయ్ చేస్తున్నారని, అదే తమ సినిమాకు అసలైన విజయమని ఆయన అన్నారు. కొన్ని వర్గాల నుండి వస్తున్న నెగిటివ్ టాక్ గురించి ప్రస్తావిస్తూ.. “పళ్ళున్న చెట్టుకే రాళ్ళ దెబ్బలు తగులుతాయి” అంటూ హరీష్ శంకర్ తనదైన శైలిలో కౌంటర్ ఇచ్చారు. నెగిటివ్ రివ్యూల గురించి తాను పెద్దగా పట్టించుకోనని, ప్రతి సినిమాకు ఇలాంటి విమర్శలు సహజమేనని కొట్టిపారేశారు. సినిమా బాగున్నప్పుడు ఇలాంటి చిన్నపాటి అడ్డంకులు కామనే అని ఆయన అభిప్రాయపడ్డారు.

పవన్ కళ్యాణ్ మార్క్ మాస్ ఎంటర్టైనర్

కేవలం 50 రోజుల షూటింగ్ షెడ్యూల్‌లో ఇంతటి క్వాలిటీతో సినిమాను అందించడం చిన్న విషయం కాదని హరీష్ గుర్తుచేశారు. పవన్ కళ్యాణ్ గారిలోని ఎనర్జీని, ఆయన బాడీ లాంగ్వేజ్‌ను ఫ్యాన్స్‌కు నచ్చేలా వెండితెరపై ప్రెజెంట్ చేయడంలో తాను సక్సెస్ అయ్యానని ఆయన నమ్మకంగా చెప్పారు. ముఖ్యంగా సినిమాలో డైలాగులు, పవన్ కళ్యాణ్ డ్యాన్సులు థియేటర్లలో ఈలలు వేయిస్తున్నాయని, బాక్సాఫీస్ వద్ద కలెక్షన్ల వర్షం కురుస్తోందని చిత్ర యూనిట్ సంబరపడుతోంది. నెగిటివ్ కామెంట్స్ ఎన్ని వచ్చినా, ‘ఉస్తాద్’ రచ్చ మాత్రం ఆగడం లేదని ట్రేడ్ వర్గాలు విశ్లేషిస్తున్నాయి. ఇప్పటికే ఈ సినిమా విడుదలై మంచి టాక్ తెచ్చుకుంది.. దాదాపు రెండు వందల కోట్ల వైపు కలెక్షన్లు రాబడుతోంది. ఇక ఓటీటీలో ఏ రేంజ్ బజ్ క్రియేట్ చేస్తుందో చూడాలి మరి.