Black Magic: చేతబడి.. టీనేజ్ అమ్మాయి తలలో నుంచి 77 సూదులు తొలగించిన డాక్టర్లు

Black Magic| ఓ 19 ఏళ్ల అమ్మాయి తీవ్ర తలనొప్పి చికిత్స కోసం ఆస్పత్రికి వస్తే.. డాక్టర్లకు షాకింగ్ విషయం తెలిసింది. అమ్మాయి తల స్కానింగ్ చేస్తే.. తలలో 77 సూదులు ఉన్నాయని తెలిసింది. ఆ సూదులు తల నుంచి తొలగించడానికి డాక్టర్లు రెండు సార్లు ఆపరేషన్ చేయాల్సి వచ్చింది.

ఈ కేసుని విచారణ చేసిన పోలీసులు సైతం ఆశ్చర్యపోయారు. పోలీసులు తెలిపిన వివరాల ప్రకారం.. ఒడిశా లోని ఇచ్ గావ్ కు చెందిన రేష్మా బెహెరా అనే 19 ఏళ్ల అమ్మాయి.. భీమా భోయ్ మెడికల్ కాలేజీలో తనకు తీవ్ర తలనొప్పి ఉందని చికిత్స కోసం వచ్చింది. ఆమె మందులతో నయం కాకపోవడంతో డాక్టర్లు ఆమె తలకు స్కానింగ్ చేశారు. స్కానింగ్ రిపోర్టులో రేష్మా తల నిండా ఇనుప సూదలున్నట్లు డాక్టర్లు గుర్తించారు.

ఆమె తల లోపలి భాగంలో సూదులు గుచ్చుకోవడం వల్ల టిష్యూ డ్యామేజ్ అయిందని.. అయితే తలలోని ఎముకలకు ఎటువంటి హాని కలుగలేదని తెలిసింది. సూదులు తల లోపల కలిగించిన గాయల కారణంగా ఆమెకు ఈ నొప్పి ఉందని నిర్ధారించారు. అయితే ఆ సూదులు తొలగించడం నైపుణ్యం కలిగిన శస్త్ర చికిత్స డాక్టర్లు చేయాలని వీర్ సురేంద్ర సాయి మెడికల్ సైన్సెస్ అండ్ రీసెర్చ్(విమ్ సార్) ఆస్పత్రికి రేష్మా కేసుని బదిలీ చేశారు.

విమ్ సార్ ఆస్పత్రి డాక్టర్లు రేష్మా తలలో సూదులు తొలగించడానికి ఆపరేషన్ చేసి 70 సూదులు తొలగించారు. అన్ని సూదులు ఒకేసారి తొలగించడం కష్టంగా ఉండడంతో ఆమెకు రెండోసారి సర్జరీ చేసి మిగతా ఏడు సూదులు తొలగించారు.

Also Read: ముంచుకొస్తున్న మరో వైరస్.. గుజరాత్‌లో 16 మంది మృతి

ఈ కేసులో పోలీసులు విచారణ చేసి.. తల్లి చనిపోయిన తరువాత రేష్మా ఆమెనే తలుచుకుంటూ మానసికంగా బాధపడేది. అలా 2021లో రేష్మా మానసిక వ్యాధితో బాధపడుతుంటే.. ఆమెను కుటుంబ సభ్యులు ఒక తాంత్రిక బాబా వద్దకు తీసుకెళ్లారు. ఆ తాంత్రికుడు రేష్మాని ఆమె తల్లి ఆవహించిందని చెప్పి.. పరిష్కారం కోసం రేష్మా తలలో అప్పుడప్పుడూ సూదులు గుచ్చాడు. ఆ సూదులు ఉన్నంత వరకు రేష్మా నుంచి ఆమె తల్లి ఆత్మ దూరంగా ఉంటుందని చెప్పాడు.

కానీ రేష్మా తలలో సూదులు పెట్టుకొని తీవ్ర నొప్పితో బాధపడేది. ఈ కేసులో ఇప్పటికే తాంత్రికుడి శిష్యుడిని పోలీసులు అరెస్టు చేయగా.. ఆ తాంత్రిక బాబా పరారీలో ఉన్నట్లు సమాచారం.