JDU MLA Anant Singh: ఆస్పత్రిలో సిగరెట్ తాగుతూ చిక్కిన ఎమ్మెల్యే.. వీడియో వైరల్

JDU MLA Anant Singh: బీహార్‌లోని జేడీయూ (JD-U) ఎమ్మెల్యే అనంత్ సింగ్ ఆసుపత్రిలో సిగరెట్ తాగుతూ కనిపించిన వీడియో ప్రస్తుతం రాజకీయ వర్గాల్లో తీవ్ర దుమారం రేపుతోంది. అయతే పట్నాలోని ప్రతిష్టాత్మక ఇందిరా గాంధీ ఇన్‌స్టిట్యూట్ ఆఫ్ మెడికల్ సైన్సెస్ (IGIMS) లో ఈ ఘటన చోటుచేసుకుంది. ప్రస్తుతం జైలులో ఉన్న అనంత్ సింగ్‌ను వైద్య పరీక్షల నిమిత్తం ఆసుపత్రికి తీసుకువచ్చిన సమయంలో, ఆయన ఏమాత్రం భయం లేకుండా అధికారుల ముందే సిగరెట్ తాగుతూ కనిపించారు. ఆసుపత్రి వంటి బహిరంగ, సున్నితమైన ప్రదేశంలో నిబంధనలను అతిక్రమిస్తూ ఒక ప్రజాప్రతినిధి ఇలా ప్రవర్తించడం పట్ల సర్వత్రా విమర్శలు వ్యక్తమవుతున్నాయి.

ఆర్జేడీ తీవ్ర విమర్శలు
ఈ వీడియోను ఆర్జేడీ (RJD) అధికార ప్రతినిధి ప్రియాంక భారతి సోషల్ మీడియాలో షేర్ చేస్తూ ముఖ్యమంత్రి నితీశ్ కుమార్ ప్రభుత్వంపై విమర్శలు గుప్పించారు. “అనంత్ సింగ్ సిగరెట్ పొగతో బీహార్‌లోని సుపరిపాలనను గాలికి ఊదేస్తున్నాడు” అని ఆమె ఎద్దేవా చేశారు. జైలు శిక్ష అనుభవిస్తున్న నేతలకు ప్రభుత్వ అండదండలతో ఆసుపత్రుల్లో ప్రత్యేక మర్యాదలు అందుతున్నాయని, నితీశ్ గారికి అత్యంత ప్రియమైన నేత కావడమే ఇందుకు కారణమని ఆమె ఆరోపించారు.

దులార్ చంద్ యాదవ్ హత్య కేసు
అనంత్ సింగ్ గత కొంతకాలంగా అనేక వివాదాల్లో చిక్కుకున్నారు. ముఖ్యంగా గతేడాది నవంబర్ 2025లో, ప్రశాంత్ కిశోర్ స్థాపించిన జన్ సురాజ్ పార్టీ మద్దతుదారు దులార్ చంద్ యాదవ్ హత్య కేసులో అనంత్ సింగ్ ప్రధాన నిందితుడిగా అరెస్టయ్యారు. ఈ హత్య మోకామా నియోజకవర్గంలో ఎన్నికల ప్రచార సమయంలో తీవ్ర ఉద్రిక్తతలకు దారితీసింది. ఆ సమయంలోనే ఆయనను పోలీసులు అదుపులోకి తీసుకుని జైలుకు పంపారు.

జైలులో ఉండి కూడా అనంత్ సింగ్ తన పట్టును నిరూపించుకున్నారు. 2025 బీహార్ అసెంబ్లీ ఎన్నికల్లో మొకామా నియోజకవర్గం నుంచి జేడీయూ టిక్కెట్‌పై పోటీ చేసి, తన సమీప ప్రత్యర్థిపై భారీ మెజారిటీతో విజయం సాధించారు. అయితే, ఆయనపై ఉన్న నేర చరిత్ర మాత్రం ఆందోళన కలిగిస్తోంది. తాజా ఎన్నికల అఫిడవిట్ ప్రకారం, ఆయనపై హత్య, కిడ్నాప్, దౌర్జన్యం వంటి సెక్షన్ల కింద దాదాపు 28కి పైగా క్రిమినల్ కేసులు నమోదై ఉన్నాయి.

Also Read: కబ్జాదారులకు హైడ్రా షాక్.. మేడ్చల్‌లో 6 ఎకరాల సర్కారు భూమి రక్షణ

ఒకవైపు బీహార్ ప్రభుత్వం సుపరిపాలన (Sushasan) గురించి మాట్లాడుతుంటే, మరోవైపు అధికార పార్టీ ఎమ్మెల్యే ఇలా బాధ్యతారాహిత్యంగా వ్యవహరించడం ప్రజల్లో చర్చకు దారితీసింది. ఆసుపత్రి ప్రాంగణంలో స్మోకింగ్ నిషేధం ఉన్నప్పటికీ, భద్రతా సిబ్బంది సమక్షంలోనే ఆయన సిగరెట్ కాల్చడం వ్యవస్థల వైఫల్యానికి నిదర్శనమని ప్రతిపక్షాలు మండిపడుతున్నాయి. ఈ ఘటనపై అధికారులు ఎలాంటి చర్యలు తీసుకుంటారో వేచి చూడాలి.

VIDEO: ఆస్పత్రిలో సిగరెట్ తాగిన ఎమ్మెల్యే

బీహార్‌లోని ఓ ఆస్పత్రిలో సిగరెట్ తాగిన జేడీయూ ఎమ్మెల్యే అనంత్ సింగ్

తీవ్ర స్థాయిలో విమర్శలు గుప్పిస్తున్న ప్రతిపక్షాలు

సోషల్ మీడియాలో వీడియో వైరల్ pic.twitter.com/0fHsrhpNYB

— BIG TV Breaking News (@bigtvtelugu) January 19, 2026

Share

• 
• 
• 
• 
• 
•