ఈ మూవీని చూశాక జన్మలో ఫుడ్ లవర్స్ జోలికెళ్లే సాహసం చేయరు… సినిమా 30 నిమిషాలే

Bengali Horror Short Film : కొన్ని హారర్ సినిమాలు చూస్తున్నప్పుడు భయపడతాం. సినిమా అయిపోయాక మర్చిపోతాం. కానీ కొన్ని కథలు అలా కావు. అవి మనతో పాటు ఇంటికి వస్తాయి. భోజనం చేస్తున్నప్పుడు గుర్తొస్తాయి. రాత్రి ఒంటరిగా కూర్చున్నప్పుడు మెదడులో తిరుగుతాయి. బెంగాలీ షార్ట్ ఫిల్మ్ అమిష్ అలాంటి అరుదైన అనుభవం. సుమారు 30 నిమిషాల నిడివితో రూపొందిన ఈ షార్ట్ ఫిల్మ్ ప్రస్తుతం ప్రేత్కథ(Pretkotha) యూట్యూబ్ ఛానల్ లో ఉచితంగా అందుబాటులో ఉంది. చిన్న రన్ టైమ్ ఉన్నప్పటికీ, పూర్తిస్థాయి ఫీచర్ ఫిల్మ్ కంటే ఎక్కువ అసౌకర్యాన్ని కలిగించే కథగా చాలా మంది హారర్ అభిమానులు దీన్ని ప్రస్తావిస్తుంటారు.

అందరికీ నచ్చే భిన్న కథ:

కథ ఒక సాధారణ భోజన ఆహ్వానంతో మొదలవుతుంది. బయటకు చూస్తే అంతా మామూలుగానే కనిపిస్తుంది. మంచి ఆతిథ్యం. రుచికరమైన వంటకాలు. ఆహారం గురించి అపారమైన ఆసక్తి ఉన్న వ్యక్తులు. కానీ ఆ భోజనం వెనుక దాగి ఉన్న రహస్యం ప్రేక్షకుడికి తెలియడం మొదలైన క్షణం నుంచి సినిమా పూర్తిగా రూపం మార్చుకుంటుంది. దర్శకుడు కథను చాలా తెలివిగా నడిపిస్తాడు. మొదటి పది నిమిషాల్లో అసలు సినిమా ఎటు వెళ్తుందో కూడా అర్థం కాదు. ఇది డ్రామానా, థ్రిల్లరా, హారరా అనే సందేహం కలుగుతుంది. కానీ ఒక్క చిన్న క్లూ బయటపడిన తర్వాత ప్రతి సంభాషణ, ప్రతి చూపు, ప్రతి ప్లేట్ మీద ఉన్న ఆహారం కూడా కొత్త అర్థాన్ని సంతరించుకుంటాయి.

ఈ షార్ట్ ఫిల్మ్ లో ఎక్కువ రక్తపాతం ఉండదు. పెద్ద హారర్ ఎఫెక్ట్స్ ఉండవు. అయినప్పటికీ ఇది కలిగించే అసౌకర్యం చాలా ఎక్కువ. ఎందుకంటే భయం ఎక్కడో చీకటి గదిలో ఉండదు. మనం ప్రతిరోజూ చేసే సాధారణ పనుల్లోనే దాగి ఉంటుంది. అమిష్ గురించి ఎక్కువ చెప్పడం అంటే కథలోని ప్రధాన షాక్ ను పాడు చేయడమే అవుతుంది. అందుకే స్పాయిలర్లకు దూరంగా ఉండటం మంచిది. కానీ ఒక విషయం మాత్రం చెప్పొచ్చు. ఈ కథలో అసలు భయం దెయ్యాల్లో లేదు. మనిషి కోరికల్లో ఉంది.

హారర్ అభిమానులు తరచూ ఒక ప్రశ్న అడుగుతుంటారు. నిజంగా కలవరపెట్టే సినిమా ఏది అని క్వశ్చన్ చేస్తుంటారు. ఆ జాబితాలో పెద్ద సినిమాల మధ్య ఈ చిన్న బెంగాలీ షార్ట్ ఫిల్మ్ పేరు కూడా కనిపిస్తుంటుంది. కారణం దాని బడ్జెట్ కాదు. దాని కాన్సెప్ట్. సినిమా ముగిసే సమయానికి మీకు భయం వేయకపోవచ్చు. కానీ మీ ముఖంలో ఉన్న నవ్వు మాత్రం మాయమై ఉంటుంది. అదే అమిష్ అసలు విజయం.