ఫ్రిజ్ కొంటున్నారా? ఈ ఒక్క విషయం తెలియకపోతే కరెంట్ బిల్లు డబుల్

Frost free vs direct cool refrigerator: ఈ రోజుల్లో ప్రతి ఇంట్లోనూ ఫ్రిజ్ అనేది ఒక ముఖ్యమైన భాగమైపోయింది. అయితే మార్కెట్‌లోకి వెళ్లినప్పుడు మనకు ప్రధానంగా రెండు టెక్నాలజీలు కనిపిస్తాయి. ఒకటి డైరెక్ట్ కూల్, రెండోది ఫ్రాస్ట్-ఫ్రీ. చాలా మంది కేవలం లుక్స్, బడ్జెట్ చూసి ఫ్రిజ్ కొనేస్తుంటారు. కానీ లాంగ్ రన్‌లో మనకు వచ్చే కరెంట్ బిల్లును డిసైడ్ చేసేది అందులోని టెక్నాలజీ మాత్రమే. ముఖ్యంగా ఎనర్జీ ఎఫిషియన్సీ విషయానికి వస్తే ఈ రెండింటికీ చాలా తేడా ఉంది. మరి ఈ రెండింటిలో ఏది తక్కువ కరెంట్ వినియోగించుకుంటుంది? ఏది ఎక్కువ కాలం మన్నుతుంది? అనే ఆసక్తికరమైన విషయాలను ఇప్పుడు వివరంగా తెలుసుకుందాం.

డైరెక్ట్ కూల్, ఫ్రాస్ట్-ఫ్రీల మధ్య అసలు తేడా ఏంటి?
మనం ఎనర్జీ ఎఫిషియన్సీ గురించి మాట్లాడే ముందు.. ఈ రెండు టెక్నాలజీలు ఎలా పని చేస్తాయో ప్రాథమికంగా తెలుసుకోవడం ముఖ్యం.

1. డైరెక్ట్ కూల్ రిఫ్రిజిరేటర్స్:
ఈ టెక్నాలజీలో సహజమైన పద్ధతిలో కూలింగ్ జరుగుతుంది. ఇందులో ఎలాంటి ఫ్యాన్లు ఉండవు. ఫ్రిజ్ లోపల ఉండే కాయిల్స్ నేరుగా లోపలి భాగాన్ని చల్లబరుస్తాయి. దీని వల్ల ఫ్రీజర్ భాగంలో ఐస్ (మంచు) గడ్డకడుతుంది. దీనిని మనం వారానికి ఒకసారి లేదా రెండుసార్లు మాన్యువల్‌గా ‘Defrost’ బటన్ నొక్కి కరిగించాల్సి ఉంటుంది. ఇవి సాధారణంగా సింగిల్ డోర్ మోడల్స్‌లో వస్తాయి.

2. ఫ్రాస్ట్-ఫ్రీ రిఫ్రిజిరేటర్స్ :
ఈ లేటెస్ట్ టెక్నాలజీలో ఫ్రిజ్ లోపల ఎక్కడా ఐస్ గడ్డకట్టదు. ఇందులో ఉండే చిన్న ఎలక్ట్రిక్ ఫ్యాన్లు చల్లటి గాలిని ఫ్రిజ్ అంతటా సమానంగా సర్క్యులేట్ చేస్తాయి. అలాగే.. ఇందులో ఒక ఆటోమేటిక్ టైమర్ , హీటింగ్ ఎలిమెంట్ ఉంటాయి. ఇవి ఫ్రీజర్‌లో అదనంగా పేరుకుపోయే మంచును మన ప్రమేయం లేకుండానే ఎప్పటికప్పుడు కరిగించేస్తాయి. ఇవి డబుల్ డోర్, ట్రిపుల్ డోర్ లేదా సైడ్-బై-సైడ్ మోడల్స్‌లో లభిస్తాయి.

కరెంట్ పొదుపు : ఏది బెస్ట్?
ఖచ్చితమైన విశ్లేషణ ప్రకారం చూస్తే.. “డైరెక్ట్ కూల్ ఫ్రిజ్” ఎనర్జీ ఎఫిషియన్సీ విషయంలో స్పష్టమైన విజేతగా నిలుస్తాయి. దీనికి గల ప్రధాన కారణాలు ఇవే..

ఫ్యాన్లు లేకపోవడం: డైరెక్ట్ కూల్ ఫ్రిజ్‌లలో గాలిని తిప్పడానికి ఎలాంటి అదనపు ఫ్యాన్లు ఉండవు. కేవలం కంప్రెసర్ మాత్రమే రన్ అవుతుంది. తద్వారా కరెంట్ ఆదా అవుతుంది.

హీటర్లు ఉండవు: ఫ్రాస్ట్-ఫ్రీ ఫ్రిజ్‌లలో ఐస్ కరిగించడానికి అంతర్గతంగా చిన్న హీటర్లు. ఈ హీటర్లు ఆన్ అయినప్పుడు ఎక్కువ కరెంట్ ఖర్చు అవుతుంది. డైరెక్ట్ కూల్‌లో ఈ హీటర్ల అవసరం ఉండదు.

చిన్న సైజ్ కంప్రెసర్స్: సాధారణంగా డైరెక్ట్ కూల్ ఫ్రిజ్‌లు తక్కువ కెపాసిటీ (170 నుండి 250 లీటర్లు) కలిగి ఉంటాయి. కాబట్టి వీటి కంప్రెసర్‌కు తక్కువ పవర్ సరిపోతుంది.

గమనిక: ఒకే స్టార్ రేటింగ్ (ఉదాహరణకు 3-స్టార్) ఉన్న డైరెక్ట్ కూల్ ఫ్రిజ్, ఫ్రాస్ట్-ఫ్రీ ఫ్రిజ్ లతో పోలిస్తే దాదాపు 30% నుంచి 40% తక్కువ కరెంట్‌ను వాడుకుంటుంది.

డైరెక్ట్ కూల్ vs ఫ్రాస్ట్-ఫ్రీ:
ఈ రెండు రకాల రిఫ్రిజిరేటర్ల మధ్య కూలింగ్ పద్ధతి, నిర్వహణ, ధర పరంగా స్పష్టమైన వ్యత్యాసాలు ఉన్నాయి. డైరెక్ట్ కూల్ రిఫ్రిజిరేటర్లు సహజసిద్ధమైన ఎయిర్ సర్క్యులేషన్ ద్వారా పనిచేస్తాయి. అంతే కాకుండా ఇందులో ఎలాంటి ఫ్యాన్లు ఉండవు. కాబట్టి వీటిలో ఐస్ గడ్డకట్టినప్పుడు మనం మాన్యువల్‌గా డిఫ్రాస్ట్ చేయాల్సి ఉంటుంది. ఇవి కేవలం 3 సభ్యులు ఉన్న చిన్న కుటుంబాలకు సరిపోతాయి. వీటి ధర కూడా చాలా తక్కువ (రూ. 10,000 నుంచి రూ. 20,000 లోపు) ఉంటుంది. అన్నింటికంటే ముఖ్యంగా ఇవి చాలా తక్కువ కరెంట్ వాడుకుంటూ అద్భుతమైన ఎనర్జీ ఎఫిషియన్సీని అందిస్తాయి.

మరోవైపు, ఫ్రాస్ట్-ఫ్రీ రిఫ్రిజిరేటర్లు ఫోర్స్డ్ ఎయిర్ టెక్నాలజీతో పనిచేస్తాయి. అంటే ఇందులో చల్లటి గాలిని సమానంగా పరచడానికి అంతర్గత ఫ్యాన్లు ఉంటాయి. ఇవి ఆటోమేటిక్ డిఫ్రాస్టింగ్ ఫీచర్‌తో వస్తాయి కాబట్టి మనం ఐస్ క్లీన్ చేయాల్సిన అవసరం అస్సలు ఉండదు. పెద్ద కుటుంబాలకు , ఎక్కువ సామాగ్రి దాచుకోవడానికి ఇవి పర్ఫెక్ట్ ఛాయిస్. వీటి ధర (రూ. 25,000 పైమాటే) కరెంట్ ఖర్చు కొంచెం ఎక్కువగా ఉన్నప్పటికీ, ఇవి లేటెస్ట్ ఫీచర్లతో వస్తాయి.

ఇన్వర్టర్ టెక్నాలజీ:
ఫ్రాస్ట్-ఫ్రీ ఫ్రిజ్‌లలో “డిజిటల్ ఇన్వర్టర్ కంప్రెసర్”టెక్నాలజీ అందుబాటులోకి వచ్చింది. సాంప్రదాయ కంప్రెసర్లు పదే పదే ఆన్/ఆఫ్ అవుతూ ఎక్కువ కరెంట్ లాగుతాయి. కానీ ఇన్వర్టర్ కంప్రెసర్ ఫ్రిజ్ లోపల ఉండే లోడ్‌ను బట్టి తన స్పీడ్‌ను అడ్జస్ట్ చేసుకుంటుంది. ఒకవేళ మీరు ఇన్వర్టర్ టెక్నాలజీ ఉన్న 4-స్టార్ లేదా 5-స్టార్ ఫ్రాస్ట్-ఫ్రీ ఫ్రిజ్ కొనుగోలు చేస్తే.. అది పాత కాలపు డైరెక్ట్ కూల్ ఫ్రిజ్ అంత తక్కువ కరెంట్ బిల్లును మాత్రమే ఇస్తుంది.

Also Read: బడ్జెట్ ధరలో బెస్ట్ కిచెన్ చిమ్నీల.. రూ. 10 వేలలోపు టాప్ 5 ఆటో క్లీన్ ఆప్షన్స్ ఇవే!

మీరు దేనిని ఎంచుకోవాలి?
మీ ప్రాధాన్యత కేవలం తక్కువ కరెంట్ బిల్లు, తక్కువ బడ్జెట్ , చిన్న కుటుంబం అయితే కళ్ళు మూసుకుని డైరెక్ట్ కూల్ ఫ్రిజ్ ఎంచుకోండి. మీకు ఎక్కువ స్టోరేజ్ స్పేస్ కావాలి, వంటగది మోడరన్‌గా ఉండాలి, ప్రతిసారీ మాన్యువల్‌గా ఐస్ క్లీన్ చేసే ఓపిక లేదు అనుకుంటే.. ఇన్వర్టర్ టెక్నాలజీ ఉన్న ఫ్రాస్ట్-ఫ్రీ ఫ్రిజ్‌ కొనడం బెస్ట్. కొనే ముందు ఎప్పుడూ బ్యూరో ఆఫ్ ఎనర్జీ ఎఫిషియన్సీ ఇచ్చే స్టార్ లేబుల్‌ను గమనించండి. ఎక్కువ స్టార్లు ఉంటే అంత ఎక్కువ కరెంట్ ఆదా అవుతుందని గుర్తుంచుకోండి.

Share

• 
• 
• 
• 
• 
•