LG Xboom Speakers: ప్రపంచ ప్రఖ్యాత గ్యాడ్జెట్ తయారీ సంస్థ LG మరోసారి మ్యూజిక్ లవర్స్ను ఆకట్టుకునేలా ముందడుగు వేసింది. CES 2026 ప్రారంభానికి ముందే, తన కొత్త Xboom పోర్టబుల్ స్పీకర్ల సిరీస్ను అధికారికంగా ప్రకటించింది. ప్రముఖ అమెరికన్ ర్యాపర్, మ్యూజిక్ ప్రొడ్యూసర్ Will.i.amతో కొనసాగుతున్న భాగస్వామ్యంలో భాగంగా ఈసారి మొత్తం నాలుగు కొత్త స్పీకర్ మోడల్స్ను మార్కెట్కు పరిచయం చేసింది.
Xboom Stage 501, Blast, Mini, Rock అనే పేర్లతో వచ్చిన ఈ స్పీకర్లు హోమ్ ఎంటర్టైన్మెంట్, పార్టీలతో పాటు అవుట్డోర్ వినియోగాన్ని దృష్టిలో పెట్టుకుని డిజైన్ చేశారు.
ఈ Xboom సిరీస్లోని అన్ని మోడల్స్లోనూ AI ఆధారిత సౌండ్ టెక్నాలజీ ఉండటం ప్రధాన ఆకర్షణ. ప్లే అవుతున్న మ్యూజిక్, పరిసర వాతావరణాన్ని గుర్తించి, స్పీకర్లు ఆటోమేటిక్గా ఈక్వలైజర్ సెట్టింగ్స్, లైటింగ్ ఎఫెక్ట్స్ను సర్దుబాటు చేస్తాయని LG వెల్లడించింది.
ఈ సిరీస్లో అత్యంత పవర్ఫుల్ మోడల్గా Xboom Stage 501 నిలుస్తోంది. ఇది ముఖ్యంగా ఇండోర్ పార్టీలు, కరాఒకే వినియోగానికి అనుకూలంగా రూపొందించారు. AI ఆధారిత కరాఒకే మోడ్ ద్వారా పాటల్లోని వోకల్స్ను తగ్గించడం లేదా పూర్తిగా తొలగించడం, పిచ్ను మార్చుకోవడం వంటి ఫీచర్లు అందుబాటులో ఉంటాయి. ప్లగ్ ఇన్ చేసినప్పుడు 220W, బ్యాటరీపై 160W అవుట్పుట్ ఇస్తూ, సుమారు 25 గంటల బ్యాటరీ ప్లేబ్యాక్ అందిస్తుంది.
Xboom Blast: బలమైన డిజైన్తో అవుట్డోర్ వినియోగానికి సరిపడేలా రూపొందించారు. ఇది ఒకే చార్జ్తో 35 గంటల బ్యాటరీ లైఫ్ ఇస్తుంది.
Xboom Mini: తేలికగా తీసుకెళ్లే కాంపాక్ట్ డిజైన్తో పాటు IP67 రేటింగ్ కలిగి ఉండటంతో నీరు, దుమ్ము నుంచి రక్షణ లభిస్తుంది.
Xboom Rock: ఈ సిరీస్లో అత్యంత చిన్న మోడల్. అయినా మిలిటరీ గ్రేడ్ డ్యూరబిలిటీతో పాటు 6W అవుట్పుట్ అందిస్తుంది.
ఈ నాలుగు మోడల్స్లోనూ FYI.RAiDiO అనే AI ఫీచర్ ఉండటం విశేషం. ఇది యూజర్ అభిరుచుల ఆధారంగా స్మార్ట్ మ్యూజిక్ డిస్కవరీని అందిస్తుంది.
CES 2026 (Consumer Electronics Show 2026) ప్రపంచంలోనే అతిపెద్ద టెక్నాలజీ ఈవెంట్లలో ఒకటి. ఇది 2026 జనవరి 6 నుంచి 9 వరకు లాస్ వెగాస్లో జరగనుంది. ఈ ఈవెంట్లో AI, రోబోట్లు, కొత్త చిప్ టెక్నాలజీ, స్మార్ట్ హోమ్ గాడ్జెట్లు, అత్యాధునిక టీవీలు సహా భవిష్యత్ టెక్నాలజీలను ప్రదర్శిస్తారు. టెక్ ఆవిష్కరణలు, గ్లోబల్ బిజినెస్ అవకాశాలకు ఇది ఒక కీలక వేదికగా నిలుస్తుంది.
Share
Telangana Government: ప్రభుత్వ ఉద్యోగులకు ఊరట.. ఎట్టకేలకు రూ.713 కోట్ల పెండింగ్ బిల్లులు విడుదల
Hanamkonda Crime: హనుమకొండలో విషాదం.. ఆర్టీసీ బస్సు ఢీకొని వృద్ధురాలి మృతి
