visakhapatnam: ఫొటోల కోసం, సోషల్ మీడియా రీల్స్ కోసం యువత పడుతున్న ఆరాటం వారి నూరేళ్ల జీవితాలను అర్ధాంతరంగా ముంచేస్తోంది. పోలీసులు, అధికారులు ఎన్ని హెచ్చరికలు చేస్తున్నా, అవగాహన సదస్సులు నిర్వహిస్తున్నా కొందరు యువకుల్లో మార్పు రావడం లేదు. తాజాగా విశాఖపట్నంలోని పెందుర్తి పరిధిలో ఉన్న చింతగట్ల సమీప మేఘాద్రి రిజర్వాయర్ వద్ద ఇలాంటి ఒక అనాలోచిత సరదానే ఇద్దరు ఇంటర్ విద్యార్థుల ప్రాణాలను బలితీసుకుంది. కంటికి రెప్పలా పెంచుకున్న కొడుకులు మృత్యువాత పడటంతో ఆయా కుటుంబాల్లో తీరని కడుపుకోత మిగిలింది.
ఫొటో షూట్‌కెళ్లిన స్నేహితులు.. క్షణాల్లో మారిన దృశ్యం
ఎన్ఏడీ కొత్తరోడ్డులోని ఒక ప్రైవేట్ కళాశాలలో ఇంటర్ ద్వితీయ సంవత్సరం చదువుతున్న గంటా దీపక్ (17), గన్నవరపు రామచంద్రరావు (17) అనే ఇద్దరు విద్యార్థులు తమ మరో నలుగురు స్నేహితులతో కలిసి ఆదివారం రోజు సరదాగా గడిపేందుకు మేఘాద్రి రిజర్వాయర్ పరివాహక ప్రాంతానికి వెళ్లారు. ప్రస్తుతం రిజర్వాయర్ లోపలి భాగం చాలావరకు ఎండిపోవడంతో, కిలోమీటరు దూరం బైక్‌లపై ప్రయాణించి నీరు ఉన్న ప్రాంతానికి చేరుకున్నారు. అక్కడ ప్రకృతి అందాల నడుమ ఫొటోలు తీసుకుంటుండగా ప్రమాదవశాత్తు దీపక్, రామచంద్రరావు అదుపుతప్పి నీటి గుంతలో పడిపోయారు. తోటి స్నేహితులు వారిని కాపాడటానికి శతవిధాలా ప్రయత్నించినప్పటికీ ఫలితం లేకపోయింది.
శోకసంద్రంలో బంధువులు
ప్రమాదాన్ని గమనించిన ఓ పశువుల కాపరి వెంటనే స్థానిక టీడీపీ నాయకుడు గనిశెట్టి కనకరాజుకు సమాచారం అందించారు. ఆయన హుటాహుటిన ఘటనా స్థలానికి చేరుకుని నీటిలోకి దిగి విద్యార్థుల కోసం గాలించినా వారి ఆచూకీ దొరకలేదు. అనంతరం సమాచారం అందుకున్న పెందుర్తి సీఐ సతీష్ కుమార్ తన సిబ్బందితో కలిసి అక్కడికి చేరుకుని మృతదేహాలను వెలికితీశారు. బ్లూకోట్స్ దేముడునాయుడు ఆధ్వర్యంలో మృతదేహాలను పోస్టుమార్టం నిమిత్తం కేజీహెచ్ ఆసుపత్రికి తరలించారు. సింహాచలం బాలాజీనగర్‌కు చెందిన దీపక్ తండ్రి అప్పలరాజు కొండపై పాన్ షాపు నడుపుతుండగా, మర్రిపాలేనికి చెందిన రామచంద్రరావు తండ్రి గణపతిశర్మ పురోహితుడిగా పనిచేస్తున్నారు. తమ ఆశల దీపాలు ఆరిపోవడంతో తల్లిదండ్రులు ఆసుపత్రి వద్ద రోదించిన తీరు అక్కడున్న వారిని కన్నీరు పెట్టించింది.
అక్రమ మట్టి తవ్వకాలే ముంచేసాయా?
ఈ ఘోర ప్రమాదానికి రిజర్వాయర్ పరిధిలో జరుగుతున్న అక్రమ మట్టి తవ్వకాలే ప్రధాన కారణమనే ఆరోపణలు స్థానికంగా బలంగా వినిపిస్తున్నాయి. నిబంధనలకు విరుద్ధంగా కొందరు అక్రమార్కులు ఇష్టానుసారంగా ఇక్కడి మట్టిని తవ్వేయడంతో భారీ గుంతలు ఏర్పడ్డాయి. ఇటీవల కురిసిన వర్షాలకు ఈ గుంతల్లో భారీగా నీరు చేరి ప్రమాదకరంగా మారాయి. పైకి మామూలుగానే కనిపిస్తున్నా, లోపల ఉన్న లోతు తెలియక యువత స్నానాలకని, ఫొటోలకని వెళ్లి ఇలా ప్రాణాల మీదకు తెచ్చుకుంటున్నారు. అధికారులు ఇప్పటికైనా స్పందించి ఇటువంటి ప్రమాదకర ప్రాంతాల వద్ద నిఘా పెంచాలని, అక్రమ తవ్వకాలపై కఠిన చర్యలు తీసుకోవాలని స్థానికులు కోరుతున్నారు.
Also Read: మరో అల్పపీడన గండం.. రాబోయే వారం రోజులు ఈ జిల్లాల ప్రజలు అప్రమత్తంగా ఉండాల్సిందే!
Share
జీవితంలో ఎప్పుడూ తప్పుడు నిర్ణయాలు తీసుకోరు, మోసపోరు.. చాణక్యుడు చెప్పిన ఈ నీతి సూత్రాలు పాటిస్తే
భోగాపురం ఎయిర్‌పోర్టు అంతా రెడీ.. 100 ఏసీ బస్సులు, విశాఖకు చేరుకున్న బస్సులు
