రెనాల్ట్ కార్లపై భారీ ఆఫర్లు.. ఆ మోడల్ పై ఏకంగా రూ.80 వేలు తగ్గింపు!

Renault June 2026 Offers: భారత మార్కెట్లో అమ్మకాలను మరింత పెంచేందుకు రెనాల్ట్ ఇండియా కీలక నిర్ణయం తీసుకుంది. ఈ జూన్ నెలకు సంబంధించి తన పాపులర్ మోడల్స్ అయిన కైగర్, ట్రైబర్, క్విడ్ కార్లపై క్రేజీ ఆఫర్లను ప్రకటించింది. జూన్ 15 వరకు అందుబాటులో ఉండే ఈ ఆఫర్లలో క్యాష్ డిస్కౌంట్లు, ఎక్స్ఛేంజ్ బోనస్‌లు, స్క్రాపేజ్ బెనిఫిట్స్, లాయల్టీ బెనిఫిట్స్ ఉన్నాయి. అయితే, ఇటీవలే భారత మార్కెట్లోకి వచ్చిన కొత్త రెనాల్ట్ డస్టర్‌పై మాత్రం ఎలాంటి డిస్కౌంట్లు ఇవ్వడం లేదు.

కైగర్ పై భారీగా తగ్గింపు

జూన్ 2026లో ఎక్కువ బెనిఫిట్స్ కైగర్ కొనుగోలుదారులకు లభిస్తున్నాయి. ఎంపిక చేసిన వేరియంట్లపై మొత్తం రూ.80,000 వరకు ప్రయోజనాలు పొందే అవకాశం ఉంది. ఇందులో రూ.40,000 వరకు క్యాష్ డిస్కౌంట్, రూ.25,000 వరకు ఎక్స్ఛేంజ్, స్క్రాపేజ్ బోనస్, అలాగే రూ.15,000 వరకు లాయల్టీ ప్రయోజనం ఉన్నాయి. దేశ వ్యాప్తంగా రూ.10,000 వరకు కార్పొరేట్ డిస్కౌంట్, రూ.4,000 వరకు గ్రామీణ ఆఫర్ కూడా అందుబాటులో ఉన్నాయి. తమిళనాడులో మాత్రం కార్పొరేట్ బెనిఫిట్ రూ.15,000 వరకు ఉంది. అయితే, కైగర్ బేస్ వేరియంట్లైన ఆథెంటిక్, ఎవల్యూషన్ మోడళ్లపై కొన్ని పరిమిత ప్రయోజనాలే లభిస్తాయి. ప్రస్తుతం రెనాల్ట్ కైగర్ ధరలు రూ.5.81 లక్షల నుంచి రూ.10.34 లక్షల వరకు ఉన్నాయి. ఈ కాంపాక్ట్ SUV మార్కెట్లో మారుతి బ్రెజ్జా, కియా సోనెట్, హ్యుందాయ్ వెన్యూ, టాటా నెక్సాన్ వంటి మోడళ్లకు పోటీగా నిలుస్తోంది.

ట్రైబర్‌పైనా అదిరిపోయే ఆఫర్లు

మరోవైపు, కుటుంబ అవసరాలకు అనుకూలంగా ఉండే ట్రైబర్‌పై కూడా మంచి ఆఫర్లు ఉన్నాయి. 2025 మోడల్ యూనిట్లపై రూ.60,000 వరకు బెనిఫిట్స్ లభిస్తున్నాయి. ఇందులో రూ.35,000 వరకు క్యాష్ డిస్కౌంట్, రూ.25,000 వరకు ఎక్స్ఛేంజ్ బోనస్ ఉన్నాయి. 2026 మోడల్ ట్రైబర్‌పై కూడా ఎక్స్ఛేంజ్ బోనస్ కొనసాగుతుండగా, క్యాష్ డిస్కౌంట్ కొంత తక్కువగా ఉంది. అదనంగా కార్పొరేట్, గ్రామీణ ప్రయోజనాలు కూడా వర్తిస్తాయి. ట్రైబర్ ధరలు రూ.5.81 లక్షల నుంచి రూ.8.48 లక్షల వరకు ఉన్నాయి. తక్కువ ధరలో ఎక్కువ సీటింగ్ సామర్థ్యం కోరుకునే వారికి ఇది మంచి ఎంపికగా భావిస్తారు.

రెనాల్ట్ క్విడ్ పై మరిన్ని బెనిఫిట్లు

రెనాల్ట్ క్విడ్ కొనుగోలు చేయాలనుకునే వారికి కూడా ఈ నెలలో మంచి డిస్కౌంట్లు లభిస్తున్నాయి. ఎంపిక చేసిన వేరియంట్లపై మొత్తం రూ.55,000 వరకు ప్రయోజనాలు అందుబాటులో ఉన్నాయి. ఇందులో రూ.20,000 వరకు క్యాష్ డిస్కౌంట్, రూ.25,000 వరకు ఎక్స్ఛేంజ్ బెనిఫిట్ ఉన్నాయి. అదనంగా కార్పొరేట్, గ్రామీణ ఆఫర్లు కూడా వర్తిస్తాయి. అయితే క్విడ్ బేస్ వేరియంట్‌ పై తక్కువ బెనిఫిట్స్ అందుబాటులో ఉన్నాయి. రూ.4.30 లక్షల నుంచి రూ.5.88 లక్షల వరకు ధర కలిగిన క్విడ్, మారుతి ఆల్టో K10, ఎస్-ప్రెస్సో వంటి చిన్న కార్లకు ప్రత్యర్థిగా ఉంది.