వేసవిలో ఎండలో ఎక్కువసేపు నిలిపిన కారులోకి ఎక్కాలంటే చాలా ఇబ్బందిగా ఉంటుంది. కారు లోపలి ఉష్ణోగ్రత చాలా ఎక్కువగా ఉంటుంది. సీట్లు వేడెక్కిపోవడం, స్టీరింగ్ పట్టుకోలేని పరిస్థితి ఉంటుంది. చిన్నపిల్లలు, వృద్ధులు, పెంపుడు జంతువులతో ప్రయాణించే సమయంలో ఈ వేడి మరింత ప్రమాదకరంగా మారుతుంది. అలాంటి పరిస్థితుల్లో ఏసీపై ఎక్కువ భారం పడకుండా కారును ఈజీగా చల్లబరచడానికి కొన్ని సులభమైన మార్గాలు ఉన్నాయి. అవేంటో ఇప్పుడు తెలుసుకునే ప్రయత్నం చేద్దాం..
⦿ లోపలి గాలిని బయటకు పంపాలి!
కారులోకి ఎక్కిన వెంటనే ఏసీని ఫుల్ స్పీడ్‌ లో ఆన్ చేయడం కంటే, ముందుగా లోపల ఉన్న వేడి గాలిని బయటకు పంపడం మంచిది. ఇందుకోసం కారుకు ఒక వైపు ఉన్న కిటికీని పూర్తిగా కిందికి దించాలి. ఆ తర్వాత ఎదురు వైపు డోర్ ను ముందుకు వెనుకకు కదపాలి. ఇలా చేయడం వల్ల కారులోని వేడి గాలి బయటకు వెళ్లి, బయట ఉన్న కొంచెం చల్లటి గాలి లోపలికి వస్తుంది. ఈ పద్ధతి త్వరగా వేడిని తగ్గించడంలో సాయపడుతుంది.
కొంత వేడి బయటకు వెళ్లిన తర్వాత కారులో కూర్చొని మిగతా కిటికీలను కూడా కొద్దిసేపు కిందికి దించాలి. తర్వాత ఏసీని ఆన్ చేసి డ్రైవింగ్ మొదలుపెట్టాలి. కారు కదులుతున్నప్పుడు ఏసీ మరింత బాగా పని చేస్తుంది. వేడి గాలి పైకి లేస్తుండటంతో, ఓపెన్ చేసిన విండోస్ ద్వారా ఈజీగా బయటకు వెళ్తుంది.
చాలా మంది చేసే సాధారణ తప్పు ఏమిటంటే, కారులోకి ఎక్కిన వెంటనే ఎయిర్ రీసర్క్యులేషన్ మోడ్‌ను ఆన్ చేస్తారు. అలా చేయకూడదు. ఎందుకంటే కారులో ఉన్న గాలి ఇప్పటికే చాలా వేడిగా ఉంటుంది. ఏసీ అదే వేడి గాలిని మళ్లీ మళ్లీ చల్లబరచడానికి ప్రయత్నిస్తుంది. అందుకే మొదట బయటి గాలిని ఉపయోగించే మోడ్ లో ఏసీని నడపడం మంచిది. దీంతో కారు త్వరగా చల్లబడుతుంది.
ఎయిర్ రీసర్క్యులేషన్ బటన్‌పై సాధారణంగా గుండ్రని బాణం గుర్తుతో కార్ సింబల్ ఉంటుంది. చాలామంది మ్యాక్స్ కూల్ సెట్టింగ్ ఉపయోగిస్తారు. కానీ, కొన్ని కార్లలో అది ఆటోమేటిక్‌గా రీసర్క్యులేషన్ ను ఆన్ చేస్తుంది. అందుకే మొదట సాధారణ కూలింగ్ మోడ్‌లో ఏసీని నడపడం మంచిది.
కారు లోపలి ఉష్ణోగ్రత కొంతవరకు తగ్గి, బయట ఉష్ణోగ్రతకు దగ్గరగా వచ్చిన తర్వాత కిటికీలను మూసేయాలి. ఇప్పుడు ఏసీ నుంచి వచ్చే చల్లటి గాలి బయటకు పోకుండా ఉంటుంది. ఆ తర్వాత అవసరమైతే ఎయిర్ రీసర్క్యులేషన్ మోడ్ ను ఆన్ చేయవచ్చు. అలా చేస్తే త్వరగా క్యాబిన్‌ ను చల్లబరచడంలో సహాయపడుతుంది.
Read Also: AMT vs CVT vs DCT vs DSG.. వామ్మో.. ఆటోమేటిక్ గేర్‌ బాక్స్ లో ఇన్ని రకాలున్నాయా?
Share
మద్రాస్ హైకోర్టు కీలక వ్యాఖ్యలు.. టెంపుల్స్లో వీఐపీ దర్శనాలెందుకు? దేవుడి ముందు అందరూ సమానమే
సర్పై ముందే తేరుకున్న తెలంగాణ! ఓటుబ్యాంకు రక్షించుకునే పనిలో పకడ్బందీ వ్యూహం!
