టాటా ఈవీలపై భారీ డిస్కౌంట్లు.. ఆ మోడల్ పై ఏకంగా రూ.3.45 లక్షల తగ్గింపు!

Tata EV Discounts in May 2026: టాటా మోటార్స్ తన ఈవీ మోడళ్లపై భారీగా డిస్కౌంట్లు అందిస్తోంది. మే 2026కు సంబంధించి పెద్ద మొత్తంలో తగ్గింపు ప్రకటించింది పాత స్టాక్ ను క్లియర్ చేయడం, కొత్త కొనుగోలుదారులను ఆకర్షించడం లక్ష్యంగా కంపెనీ ఈ ప్రత్యేక ఆఫర్లను అందిస్తోంది. కొన్ని మోడళ్లపై మొత్తం ప్రయోజనాలు రూ.3.45 లక్షల వరకు ఇస్తోంది. ఈ ఆఫర్లలో గ్రీన్ బోనస్, ఎక్స్ఛేంజ్ బెనిఫిట్, లాయల్టీ ఆఫర్, స్క్రాపేజ్ సపోర్ట్ లాంటి ప్రయోజనాలు ఉన్నాయి. టాటా ఎలక్ట్రిక్ వాహనాలను కొనాలని భావిస్తున్న వారికి ఇది మంచి అవకాశం అని ఆటో నిపుణులు చెబుతున్నారు. ఇంతకీ ఈ నెలలో టాటా అందిస్తున్న డిస్కౌంట్లు ఎలా ఉన్నాయనేది ఇప్పుడు తెలుసుకుందాం..

⦿ టాటా కర్వ్.ev

ప్రస్తుతం ఈ మోడల్ పై అత్యధిక ఆఫర్లు అందుబాటులో ఉన్నాయి. 2025 మోడల్ స్టాక్‌ పై కంపెనీ భారీ తగ్గింపులు ఇస్తోంది. ఈ కారుపై మొత్తం ప్రయోజనాలు రూ.3 లక్షల నుంచి రూ.3.45 లక్షల వరకు ఉన్నాయి. కొత్తగా వచ్చిన 2026 కర్వ్.ev మోడళ్ల ధరలు రూ.16.99 లక్షల నుంచి ప్రారంభమవుతున్నాయి. వీటిపై సాధారణ సీజనల్ ఆఫర్లతో పాటు ఎక్స్ఛేంజ్ బోనస్ కూడా అందిస్తోంది.

⦿ టాటా హారియర్ EV

ఈ SUVపై సుమారు రూ.1.5 లక్షల వరకు బెనిఫిట్స్ అందిస్తోంది. ఇందులో రూ.1 లక్ష వరకు లాయల్టీ బోనస్, మరో రూ.50 వేల ఎక్స్ఛేంజ్ ఆఫర్ ఉన్నాయి. ఇప్పటికే టాటా వాహనం ఉపయోగిస్తున్న వారు కొత్త EVకి మారితే అదనపు ప్రయోజనాలు అందిస్తోంది.

⦿ టాటా నెక్సాన్.ev

ఈ మోడల్ పైనా ప్రత్యేక ఆఫర్లు కొనసాగుతున్నాయి. ఈ కారుపై మొత్తం రూ.1.41 లక్షల వరకు తగ్గింపు అందిస్తోంది. ఇందులో క్యాష్ బ్యాక్, ఎక్స్ఛేంజ్ బోనస్, గ్రీన్ బోనస్ లాంటి పలు ఆఫర్లు ఉన్నాయి. నెక్సాన్ ఇప్పటికీ మంచి డిమాండ్‌లో ఉన్న ఈవీ మోడల్‌ గా గుర్తింపు తెచ్చుకుంది.

⦿ టాటా పంచ్.ev

ఈ కారుపై భారీ తగ్గింపులు అందిస్తున్నారు. ముఖ్యంగా ఫేస్‌ లిఫ్ట్‌ కు ముందు వచ్చిన మోడళ్లపై రూ.1.55 లక్షల వరకు ఆఫర్లు లభిస్తున్నాయి. కొత్త మోడళ్లపై కూడా రూ.1.20 లక్షల వరకు బెనిఫిట్స్ ఉన్నాయి. కంపెనీ బ్యాటరీ యాజ్ ఎ సర్వీస్ అనే కొత్త ఆప్షన్‌ను కూడా అందిస్తోంది. ఈ విధానంలో కారు ప్రారంభ ధర తక్కువగా ఉంటుంది. బ్యాటరీ కోసం వినియోగం ఆధారంగా కిలోమీటరుకు ఛార్జీలు చెల్లించాలి. కొనుగోలు ఖర్చు తగ్గే అవకాశం ఉంటుంది.

⦿ టాటా టియాగో.ev

ఎంట్రీ లెవల్ EV కొనాలనుకునే వారికి టాటా టియాగో.evపై కూడా మంచి ఆఫర్లు ఉన్నాయి. ఈ కారుపై మొత్తం ప్రయోజనాలు రూ.1.30 లక్షల నుంచి రూ.1.35 లక్షల వరకు ఉండొచ్చు. ఇందులో గ్రీన్ బోనస్, ఎక్స్ఛేంజ్ సపోర్ట్ ఉన్నాయి. తక్కువ ధరలో ఎలక్ట్రిక్ కార్ కొనాలనుకునేవారికి ఈ మోడల్ బెస్ట్ ఆప్షన్ గా చెప్పుకోవచ్చు.