Leafy Vegetables: ప్రోటీన్ కోసం నాన్ వెజ్ అక్కర్లేదు.. ఈ 7 ఆకుకూరలు చాలు!

Leafy Vegetables: సాధారణంగా ప్రొటీన్ అనగానే మనకు గుడ్లు, మాంసం లేదా పప్పు ధాన్యాలు గుర్తుకు వస్తాయి. కానీ.. ప్రకృతి ప్రసాదించిన ఆకుపచ్చని ఆకుకూరల్లో కూడా అద్భుతమైన స్థాయిలో ప్రొటీన్లు దాగి ఉన్నాయన్న విషయం చాలామందికి తెలియదు. ఆకుకూరలు కేవలం విటమిన్లు, ఖనిజ లవణాలకే పరిమితం కాకుండా.. కండరాల నిర్మాణానికి అంతే కాకుండా శరీర మరమ్మతులకు అవసరమైన ప్రొటీన్లను కూడా అందిస్తాయి. ముఖ్యంగా శాఖాహారులకు, బరువు తగ్గాలనుకునే వారికి ఇవి గొప్ప ప్రత్యామ్నాయం. అధిక ప్రొటీన్ కలిగిన ఆ 7 ఆకుకూరల గురించి ఇప్పుడు వివరంగా తెలుసుకుందాం.

ప్రొటీన్ పుష్కలంగా లభించే టాప్ 7 ఆకుకూరలు:
మన శరీర ఎదుగుదలకు, కణజాలాల మరమ్మత్తుకు ప్రొటీన్ ఎంతో అవసరం. ఆకుకూరలలో ప్రొటీన్‌తో పాటు ఫైబర్ కూడా ఉంటుంది. ఇది జీర్ణ క్రియకు సహాయ పడుతుంది. అత్యధిక ప్రొటీన్ కలిగిన 7 ఆకుకూరల వివరాలు..

1. పాలకూర:
పాలకూర ప్రొటీన్ నిధి. ఒక కప్పు ఉడికించిన పాలకూరలో దాదాపు 5 గ్రాముల ప్రొటీన్ ఉంటుంది. ఇందులో ప్రొటీన్‌తో పాటు ఐరన్, కాల్షియం ,విటమిన్-ఎ పుష్కలంగా ఉంటాయి. ఇది రక్తహీనతను తగ్గించడమే కాకుండా కండరాల శక్తిని పెంచుతుంది.

2. మెంతికూర:
మెంతికూరలో ప్రొటీన్ శాతం చాలా ఎక్కువ. ఇది కేవలం రుచికే కాదు. ఆరోగ్యానికి కూడా మేలు చేస్తుంది. ఇది రక్తంలో చక్కెర స్థాయిలను నియంత్రించడంతో పాటు శరీరానికి అవసరమైన అమైనో యాసిడ్లను అందిస్తుంది. 100 గ్రాముల మెంతికూరలో సుమారు 4.4 గ్రాముల ప్రొటీన్ లభిస్తుంది.

3. తోటకూర:
మన దేశంలో విరివిగా దొరికే తోటకూర ప్రొటీన్ల గని. ఇందులో లైసిన్ అనే అమైనో యాసిడ్ ఉంటుంది. ఇది సాధారణంగా ఇతర మొక్కల ఆధారిత ఆహారాలలో తక్కువగా ఉంటుంది. ఇది ఎముకల ఆరోగ్యానికి , రోగనిరోధక శక్తికి ఎంతో మేలు చేస్తుంది.

4. కాలే:
ప్రపంచవ్యాప్తంగా ‘సూపర్ ఫుడ్’గా పేరుగాంచిన కాలేలో ప్రొటీన్లు సమృద్ధిగా ఉంటాయి. ఒక కప్పు కాలేలో సుమారు 3 గ్రాముల ప్రొటీన్ ఉంటుంది. ఇందులో ఒమేగా-3 ఫ్యాటీ యాసిడ్స్ కూడా ఉండటం విశేషం. ఇవి గుండె ఆరోగ్యానికి తోడ్పడతాయి.

5. ఆవకూర:
ఆవ చెట్టు ఆకుల్లో ఘాటైన రుచితో పాటు అధిక ప్రొటీన్ ఉంటుంది. ఒక కప్పు ఆవకూరలో సుమారు 3.2 గ్రాముల ప్రొటీన్ ఉంటుంది. ఇవి శరీరంలోని విష తుల్యాలను బయటకు పంపడానికి బాగా సహాయ పడతాయి.

6. బ్రోకలీ :
బ్రోకలీని ఆకుకూరల వర్గంలోనే పరిగణించవచ్చు. ఇతర కూరగాయలతో పోలిస్తే బ్రోకలీలో ప్రొటీన్ శాతం చాలా ఎక్కువ. ఒక కప్పు బ్రోకలీలో సుమారు 2.6 గ్రాముల ప్రొటీన్ ఉంటుంది. ఇందులో ఉండే ఫైటోన్యూట్రియెంట్లు క్యాన్సర్ నిరోధకంగా పనిచేస్తాయి.

Also Read: సన్‌స్క్రీన్ వాడటం లేదా ? అయితే మీరు ప్రమాదంలో ఉన్నట్లే!

7. కోలార్డ్ గ్రీన్స్ :
ఇవి చూడటానికి క్యాబేజీ ఆకుల్లా ఉంటాయి. ఇందులో ప్రొటీన్‌తో పాటు విటమిన్-కె , కాల్షియం అధికంగా ఉంటాయి. ఇవి ఎముకలను దృఢంగా మార్చడానికి, శరీరానికి కావాల్సిన శక్తిని అందించడానికి ఉపయోగపడతాయి.

ఎందుకు ఆకుకూరలను ఎంచుకోవాలి ?

మాంసాహారంతో పోలిస్తే ఆకుకూరల్లో కేలరీలు చాలా తక్కువగా ఉంటాయి. కొలెస్ట్రాల్ ఉండదు. దీని వల్ల గుండె జబ్బులు వచ్చే ప్రమాదం తగ్గుతుంది. ప్రతి రోజూ మీ భోజనంలో కనీసం ఒక రకమైన ఆకుకూరను చేర్చుకోవడం ద్వారా సహజ పద్ధతిలో ప్రొటీన్ పొందవచ్చు.

ఆరోగ్యకరమైన జీవనశైలికి ప్రొటీన్ , పోషకాలు సమతుల్యంగా అందాలి. పైన పేర్కొన్న 7 ఆకుకూరలను మీ డైట్‌లో చేర్చుకోవడం ద్వారా మీరు శారీరక దృఢత్వాన్ని పొందడమే కాకుండా, దీర్ఘకాలిక వ్యాధుల నుంచి రక్షణ పొందవచ్చు. ఆకుకూరలను మరీ ఎక్కువగా ఉడికించకుండా తీసుకుంటే వాటిలోని పోషకాలు వృధా కాకుండా ఉంటాయి.