సమ్మర్ డ్రై ఐస్ సమస్య.. మీ కళ్లను కాపాడుకోవడానికి ఈ చిట్కాలు పాటించండి

Dry Eyes in Summer: సమ్మర్‌లో ఎండల కారణం వల్ల మన శరీరం డీహైడ్రేషన్‌కు గురవుతుంది. కేవలం చర్మం, గొంతు మాత్రమే కాదు. ఈ సమయంలో మన కళ్లు కూడా తేమను కోల్పోయి పొడిబారుతుంటాయి. దీనినే ‘డ్రై ఐ సిండ్రోమ్’ అంటారు. గాలిలో తేమ శాతం తగ్గడం, ఏసీల వాడకం పెరగడంతో పాటు తీవ్రమైన వేడి వల్ల కంటిలోని కన్నీటి పొర త్వరగా ఆవిరైపోతుంది. దీని వల్ల కళ్లలో మంటలు, ఎరుపు రావడం వంటి ఇబ్బందులు తలెత్తుతాయి. ఈ సమస్యను ప్రారంభంలోనే గుర్తించి తగిన జాగ్రత్తలు తీసుకోవడం ద్వారా కంటి చూపును కాపాడుకోవచ్చు.

వేసవిలో కళ్లు పొడిబారడానికి ప్రధాన కారణాలు:
తీవ్రమైన వేడి గాలి: బయట ఉండే వేడి గాలి కళ్లలోని సహజమైన తేమను త్వరగా ఆవిరి చేస్తుంది. దీనివల్ల కళ్లు పొడిబారతాయి.

ఏసీల వాడకం: వేసవిలో మనం ఆఫీసుల్లో.. ఇళ్లలో ఏసీలను ఎక్కువగా వాడుతుంటాం. ఏసీ గాలిలోని తేమను లాగేస్తుంది. ఇది కళ్లకు హానికరంగా మారుతుంది.

డీహైడ్రేషన్: శరీరంలో నీటి శాతం తగ్గినప్పుడు కన్నీళ్ల ఉత్పత్తి కూడా తగ్గుతుంది. తగినంత నీరు తాగకపోవడం డ్రై ఐస్‌కు ప్రధాన కారణం.

స్క్రీన్ టైమ్: వేసవి సెలవుల్లో ఫోన్లు, లాప్‌ టాప్‌లు ఎక్కువగా చూడటం వల్ల కనురెప్పలు వేయడం మర్చిపోతాం. ఇది సమస్యను మరింత తీవ్రం చేస్తుంది.

యూవీ కిరణాలు : సూర్యుడి నుంచి వచ్చే అతినీలలోహిత కిరణాలు నేరుగా కంటిపై పడటం వల్ల కంటి ఉపరితలం దెబ్బతింటుంది.

డ్రై ఐస్ లక్షణాలు:
మీరు డ్రై ఐస్ సమస్యతో.. బాధపడుతున్నారని ఈ కింది లక్షణాల ద్వారా గుర్తించవచ్చు.

కళ్లలో ఏదో నలుసు పడినట్లుగా ఉండటం.

కళ్లు ఎర్రబడటం, దురద రావడం.

వెలుతురును చూడలేకపోవడం .

కళ్ల నుంచి నీరు కారడం (ఇది వినడానికి వింతగా ఉన్నా, కళ్లు పొడిబారినప్పుడు శరీరం రక్షణ కోసం ఎక్కువ నీటిని ఉత్పత్తి చేయడానికి ప్రయత్నిస్తుంది).

మసకగా కనిపించడం.

నివారణ చర్యలు, జాగ్రత్తలు :
హైడ్రేటెడ్ గా ఉండండి: రోజుకు కనీసం 3-4 లీటర్ల నీరు తాగాలి. కొబ్బరి నీళ్లు, ఫ్రూట్ జ్యూస్ తీసుకోవడం వల్ల కళ్లకు తేమ అందుతుంది.

సన్‌గ్లాసెస్ వాడండి: బయటకు వెళ్లేటప్పుడు యూవీ ప్రొటెక్షన్ ఉన్న సన్‌గ్లాసెస్ వాడటం వల్ల వేడి గాలి, ఎండ నుంచి కళ్లను రక్షించుకోవచ్చు.

ఏసీ గాలి నేరుగా పడకుండా చూడండి: ఏసీ లేదా ఫ్యాన్ గాలి నేరుగా మీ ముఖంపై పడకుండా చూసుకోండి.

20-20-20 రూల్ పాటించండి: స్క్రీన్ చూసేటప్పుడు ప్రతి 20 నిమిషాలకు ఒకసారి.. 20 అడుగుల దూరంలో ఉన్న వస్తువును 20 సెకన్ల పాటు చూడాలి.

కళ్లను శుభ్రంగా ఉంచుకోండి: చల్లని నీటితో కళ్లను అప్పుడప్పుడు శుభ్రం చేస్తూ ఉండాలి. డాక్టర్ సలహాతో ‘లూబ్రికేటింగ్ ఐ డ్రాప్స్’ వాడొచ్చు.

కళ్లు మన శరీరంలో అత్యంత సున్నితమైన అవయవాలు. వేసవిలో వచ్చే డ్రై ఐస్ సమస్యను కేవలం చిన్న చిన్న జాగ్రత్తలతోనే దూరం చేసుకోవచ్చు. అయితే.. లక్షణాలు తీవ్రంగా ఉంటే లేదా కంటి చూపులో మార్పులు కనిపిస్తే వెంటనే డాక్టర్ ని సంప్రదించడం బెస్ట్. ఆరోగ్యకరమైన ఆహారం, సరైన లైఫ్ స్టైల్ తో ఈ వేసవిలో మీ కళ్లను జాగ్రత్తగా ఉంచుకోండి.