ఆన్లైన్ డేటింగ్ ప్రస్తుతం చాలా మందికి కొత్త సంబంధాలను ఏర్పరచుకునే ప్రధాన మార్గంగా మారింది. డేటింగ్ యాప్స్, సోషల్ మీడియా ద్వారా మనుషులు ప్రేమ, స్నేహం, జీవిత భాగస్వామిని వెతుకుతున్నారు. అయితే ఈ వేదికలు ఎంత ఉపయోగకరంగా ఉన్నాయో, అంతే స్థాయిలో ప్రమాదకరం కూడా. ఎందుకంటే ఈ యాప్స్, సోషల్ మీడియా ద్వారా కొందరు తమ గురించి తప్పుదారి పట్టించే సమాచారాన్ని కూడా చూపిస్తున్నారు. ఇటీవల ఎక్కువగా వినిపిస్తున్న అలాంటి ఒక డేటింగ్ ట్రెండ్ ‘పఫర్ ఫిషింగ్’.
‘పఫర్ ఫిషింగ్’ అనే పదం పఫర్ చేప నుంచి వచ్చింది. ప్రమాదం ఎదురైనప్పుడు పఫర్ చేప తన శరీరాన్ని ఒక బెలూన్లాగా ఉబ్బించుకుని చూపిస్తుంది. అదే విధంగా కొంతమంది వ్యక్తులు ఆన్లైన్లో తమ గురించి ఉన్న నిజం కంటే గొప్పలు చెబుతారు. తాము చాలా గొప్పవారిగా చూపించడానికి ప్రయత్నిస్తారు. ఇలాంటి వ్యక్తులు మరీ పూర్తిగా నకిలీ వ్యక్తిత్వాన్ని సృష్టించరు. కానీ తమలోని మంచి లక్షణాలను అతిగా చూపిస్తూ, లోపాలను దాచిపెడతారు. దీనివల్ల ఎదుటివారికి వారి గురించి తప్పుడు అభిప్రాయం ఏర్పడుతుంది.
చాలామంది పఫర్ ఫిషింగ్ను క్యాట్ఫిషింగ్తో కలిపి చూస్తారు. కానీ ఈ రెండూ వేర్వేరు. క్యాట్ఫిషింగ్లో వ్యక్తి పూర్తిగా తన గురించి నకిలీ గుర్తింపును సృష్టిస్తాడు. ఇతరుల ఫోటోలు, వివరాలు ఉపయోగించి మోసం చేస్తాడు. పఫర్ ఫిషింగ్లో మాత్రం వ్యక్తి తన అసలు గుర్తింపునే ఉపయోగిస్తాడు. కానీ తన అందం, సంపద, ఉద్యోగం లేదా విజయాలను అతిగా చూపిస్తాడు. అందువల్ల దీన్ని గుర్తించడం మరింత కష్టంగా ఉంటుంది.
ఎక్కువ మంది దృష్టిని ఆకర్షించాలనే కోరిక దీనికి ప్రధాన కారణం. తన కోసం ఎక్కువ మ్యాచ్లు, మెసేజ్లు రావాలని వారు భావిస్తారు. కొందరు తిరస్కరణకు భయపడతారు. మరికొందరు తాము అంత ఆసక్తికరంగా కనిపించమని అనుకుంటారు. అందుకే తమను మరింత ఆకర్షణీయంగా చూపించే ప్రయత్నం చేస్తారు. అయితే ఇది తర్వాత నిరాశకు దారి తీస్తుంది.
పఫర్ ఫిషింగ్కు కొన్ని సాధారణ సంకేతాలు ఉంటాయి. వారి ఫోటోలు ఎక్కువగా ఫిల్టర్లతో ఉండవచ్చు. ప్రతి ఫోటో అసాధారణంగా పరిపూర్ణంగా కనిపించవచ్చు. అలాంటి వ్యక్తులు ఎప్పుడూ తమ విజయాల గురించే మాట్లాడవచ్చు. వారి ప్రొఫైల్లో జీవితంలోని ప్రతి అంశం అద్భుతంగా కనిపించవచ్చు. వ్యక్తిగత విషయాలపై ప్రశ్నలు అడిగితే సమాధానాలను తప్పించుకునే అవకాశం ఉంటుంది. అలాగే సాధారణ సంఘటనలను కూడా పెద్ద విజయాలుగా చెప్పే అలవాటు ఉండవచ్చు.
ప్రారంభంలో ఇది చిన్న విషయంగా అనిపించవచ్చు. కానీ తర్వాత నమ్మకాన్ని దెబ్బతీస్తుంది. ఆన్లైన్లో కనిపించిన వ్యక్తి నిజ జీవితంలో పూర్తిగా భిన్నంగా ఉంటే నిరాశ కలుగుతుంది. ఇద్దరి మధ్య సంబంధం ప్రారంభం నుంచే పూర్తిస్థాయి నిజాయితీ లేకపోవడం వల్ల అనుమానాలు పెరుగుతాయి. దీంతో బలమైన బంధం ఏర్పడటం కష్టమవుతుంది.
ఎవరినైనా వెంటనే పూర్తిగా నమ్మకూడదు. మాట్లాడేటప్పుడు ఆలోచించి ప్రశ్నలు అడగాలి. వారి మాటల్లో స్థిరత్వం ఉందా? లేదా? గమనించాలి. భావోద్వేగ నిర్ణయాలను త్వరగా తీసుకోకూడదు. సరైన సమయం వచ్చినప్పుడు ప్రత్యక్షంగా కలవడం మంచిది. ఆన్లైన్లో చూపించిన వ్యక్తిత్వం, నిజ జీవిత వ్యక్తిత్వంతో సరిపోతుందా లేదా పరిశీలించాలి.
పఫర్ ఫిషింగ్ ప్రస్తుతం వేగంగా పెరుగుతున్న డేటింగ్ ట్రెండ్. ఇది పూర్తిగా మోసం కాకపోయినా, తప్పుడు అంచనాలను సృష్టిస్తుంది. ఈ సంకేతాలను ముందుగానే గుర్తించడం ద్వారా మోసపోకుండా జాగ్రత్త పడవచ్చు. నిజాయితీ, పారదర్శకత, నమ్మకమే మంచి సంబంధాలకు పునాది అని గుర్తుంచుకోవాలి.
Share
వానాకాలం ముంపునకు హైడ్రా శాశ్వత పరిష్కారం.. కమిషనర్ రంగనాథ్ సంచలన నిర్ణయం!
తల్లి మరణించిన కొన్ని రోజులకే రేసింగ్ హెల్మెట్ పట్టిన అజిత్.. సోషల్ మీడియాను షేక్ చేస్తున్న ‘తలా’ లుక్!
