Dengue Vaccine: ప్రతి ఏటా వర్షాకాలం మొదలైందంటే చాలు.. దేశవ్యాప్తంగా డెంగీ భయం అలుముకుంటుంది. వేలాది మంది ఈ జ్వరం బారిన పడి ఆస్పత్రుల పాలవుతుంటారు. ఇప్పటివరకు దీనికి ఎలాంటి నిర్దిష్టమైన వ్యాక్సిన్ అందుబాటులో లేదు. కానీ, ఆ నిరీక్షణకు ఇప్పుడు తెరపడింది. డెంగీ నివారణకు జపాన్కు చెందిన తకేడా ఫార్మాస్యూటికల్స్ తయారు చేసిన ‘క్యూడెంగా’ (QDENGA) వ్యాక్సిన్కు డ్రగ్స్ కంట్రోలర్ జనరల్ ఆఫ్ ఇండియా (DCGI) గ్రీన్ సిగ్నల్ ఇచ్చింది.
ఈ వ్యాక్సిన్ ప్రత్యేకత ఏమిటంటే.. గతంలో ఎవరికైనా డెంగీ వచ్చినా, రాకపోయినా నిర్భయంగా వేసుకోవచ్చు. సాధారణంగా కొన్ని వ్యాక్సిన్లు తీసుకునే ముందు రక్తం పరీక్షించి పాత ఇన్ఫెక్షన్లను చూడాల్సి వస్తుంది. కానీ క్యూడెంగాకు అలాంటి ముందస్తు టీకా పరీక్షలు (Pre-vaccination testing) ఏమీ అవసరం లేదని కంపెనీ స్పష్టం చేసింది. 4 సంవత్సరాల పిల్లల నుంచి 60 ఏళ్ల వయస్సు ఉన్న పెద్దల వరకు అందరూ దీనిని తీసుకోవచ్చు.
డెంగీలో నాలుగు రకాల వైరస్ సీరోటైప్లు ఉంటాయి. ఈ నాలుగు రకాల వల్ల కూడా వ్యాధి వ్యాపించే అవకాశం ఉంది. అయితే.. క్యూడెంగా లైవ్-అటెన్యుయేటెడ్ వ్యాక్సిన్ కావడం వల్ల ఇది నాలుగు రకాల వైరస్ల నుంచి రక్షణ కల్పిస్తుంది. సీజన్తో సంబంధం లేకుండా వేధించే డెంగీ నివారణలో ఇది కీలక పాత్ర పోషించనుంది.
Also Read: రక్తపోటు పెరగడానికి మౌత్ వాష్ కూడా ఒక కారణమేనా.. తాజా రీసెర్చ్ ఏం చెబుతోంది?
ఈ టీకాను రెండు డోసులుగా తీసుకోవాల్సి ఉంటుంది. చర్మం కింద (Subcutaneously) 0.5ml చొప్పున ఈ డోస్ ఇస్తారు. మొదటి డోస్ తీసుకున్న మూడు నెలల తర్వాత రెండో డోస్ వేసుకోవాల్సి ఉంటుంది. ప్రపంచ ఆరోగ్య సంస్థ (WHO) కూడా ఈ వ్యాక్సిన్ను ఆమోదించడంతో పాటు.. డెంగీ తీవ్రత ఎక్కువ ఉన్న ప్రాంతాల్లో ప్రీ-స్క్రీనింగ్ లేకుండా వాడవచ్చని సిఫార్సు చేసింది.
ఈ వ్యాక్సిన్ సురక్షితమైనదని నిరూపించడానికి తకేడా కంపెనీ గ్లోబల్ స్థాయిలో దాదాపు 28,000 మందిపై ప్రయోగాలు చేసింది. అందులో భాగంగా భారత్ తరపున పాల్గొన్న వారిపై చేసిన ప్రత్యేక ప్రయోగాల్లో కూడా ఇది చాలా సురక్షితమైనదని, శరీరంలో రోగనిరోధక శక్తిని సమర్థవంతంగా పెంచుతుందని తేలింది. ఏడేళ్ల పరిశోధనల డేటా ప్రకారం.. ఇది తీవ్రమైన డెంగీ బారిన పడకుండా, ఆస్పత్రిలో చేరాల్సిన అవసరం రాకుండా కాపాడుతుందని స్పష్టమైంది.
మన దేశంలో ప్రతీ ఏటా నమోదయ్యే డెంగీ కేసులు ఆరోగ్యంపైనే కాకుండా కుటుంబాల ఆర్థిక పరిస్థితిపై కూడా తీవ్ర ప్రభావం చూపుతాయి. దోమల నివారణ, పారిశుధ్యం లాంటి జాగ్రత్తలతో పాటు ఈ వ్యాక్సిన్ అందుబాటులోకి రావడం వల్ల భవిష్యత్తులో డెంగీ కేసుల సంఖ్య, మరణాల రేటు గణనీయంగా తగ్గే అవకాశం ఉంది.
Also Read: ఆలుగడ్డలు 5 నెలల పాటు తాజాగా ఉండాలా? అయితే ఆ ప్రదేశంలో పెట్టండి!
Share
‘విక్రమ్ 1’ ర్యాకెట్ ప్రయోగంలో జబర్దస్త్ సత్యశ్రీ చెల్లి కీలక పాత్ర.. ఆ ఫొటోలు షేర్ చేస్తూ నటి ఎమోషనల్!
Gym Trainer: అమరావతిలో ఘోరం.. యువతి పై జిమ్ ట్రైనర్ లైంగిక దాడి కలకం
