అమ్మాయిలకు 8-10 ఏళ్లలోనే పీరియడ్స్.. తక్కువ వయసులోనే రుతుక్రమం ప్రారంభానికి ఇవే కారణాలు

ఈ రోజుల్లో అమ్మాయిలకు రుతుక్రమం (పీరియడ్స్) మునుపటి తరాల కంటే ముందే ప్రారంభం అవుతోంది. ఈ విషయం చాలా మంది తల్లిదండ్రులు ఆందోళన పెడుతోంది. కొందరికి 8 నుంచి 10 ఏళ్ల వయసులోనే పీరియడ్స్ ప్రారంభమవుతున్నాయి. నిపుణుల ప్రకారం.. దీనికి జీవనశైలి, పర్యావరణ కారణాలు ఉండవచ్చు.

ముందస్తు రుతుక్రమం అంటే ఏమిటి?

సాధారణంగా అమ్మాయిలకు 11 నుంచి 13 ఏళ్ల మధ్య పీరియడ్స్ వస్తాయి. కానీ ఇప్పుడు అంతకుముందే వస్తున్నాయి. దీన్ని వైద్యులు “ప్రికోషియస్ ప్యూబర్టీ” (ముందస్తు ప్రాయం) అంటారు. అంటే హార్మోన్ల మార్పులు ఊహించిన వయసు కంటే ముందే ప్రారంభమవుతాయి.

బరువు ప్రభావం

నిపుణుల ప్రకారం.. ఊబకాయం, తప్పుడు ఆహారపు అలవాట్లు హార్మోన్లను ప్రభావితం చేస్తాయి. ఈ రోజు పిల్లలు ఎక్కువగా జంక్ ఫుడ్, షుగర్ డ్రింక్స్, ప్రాసెస్ చేసిన ఆహారాలు తింటున్నారు. అధిక శరీర కొవ్వు ఈస్ట్రోజెన్ హార్మోన్ ఉత్పత్తిని పెంచుతుంది. దీని వల్ల రుతుక్రమం ముందుగా ప్రారంభం కావొచ్చు.

స్క్రీన్ టైమ్, నిద్ర లోపం

ఆధునిక జీవనశైలిలో పిల్లలు ఎక్కువ సేపు మొబైల్, టీవీ చూస్తున్నారు. బయట ఆడుకునే అలవాటు తగ్గిపోయింది. నిద్ర లోపం కూడా హార్మోన్ల సమతుల్యతను దెబ్బతీస్తుంది. ఆరోగ్యకరమైన దినచర్య పిల్లల ఎదుగుదలకు చాలా ముఖ్యం.

ఒత్తిడి ప్రభావం

చదువు ఒత్తిడి, భావోద్వేగ సమస్యలు కూడా హార్మోన్లపై ప్రభావం చూపిస్తాయి. ఒత్తిడి హార్మోన్లు శారీరక ఎదుగుదలను ముందే ప్రారంభించవచ్చు. ఇలాంటి సమయంలో తల్లిదండ్రులు.. పిల్లల పట్ల మరింత శ్రద్ధ చూపాలి.

పర్యావరణ కారణాలు

కాలుష్యం, ప్లాస్టిక్లలోని కొన్ని రసాయనాలు, కాస్మెటిక్స్ లోని పదార్థాలు హార్మోన్లపై ప్రభావం చూపిస్తాయని కొన్ని అధ్యయనాలు చెబుతున్నాయి. తల్లిదండ్రులు అనవసర కెమికల్స్ బారినుంచి పిల్లలను కాపాడటం మంచిది.

కుటుంబ చరిత్ర

జన్యుపరమైన కారణాలు కూడా పాత్ర పోషిస్తాయి. తల్లి, అక్క, లేదా దగ్గరి బంధువులకు ముందుగా పీరియడ్స్ వచ్చినట్లయితే, ఆ అమ్మాయికి కూడా అలాగే వచ్చే అవకాశం ఉంటుంది. దీన్ని నియంత్రించలేం.

Also Read: సమాజంలో అందరూ మిమ్మల్ని అవమానిస్తున్నారా? చాణక్య నీతిలో దీనికి కారణాలు ఇవే

ముందస్తు రుతుక్రమం వల్ల ఇబ్బందులు

చిన్న వయసులోనే శారీరక మార్పులు రావడం వల్ల పిల్లలు గందరగోళం, అయోమయం, సిగ్గు, భావోద్వేగ ఒత్తిడికి గురవుతారు. కొన్నిసార్లు స్నేహితుల నుంచి ఎగతాళి కూడా ఎదుర్కోవాల్సి రావచ్చు. తల్లిదండ్రులు ఓపెన్‌గా మాట్లాడటం, ధైర్యం చెప్పటం చాలా అవసరం.

ఆరోగ్యకరమైన అలవాట్లు

తాజా కూరగాయలు, పండ్లు, ప్రోటీన్లు, తృణధాన్యాలు పిల్లల ఆహారంలో ఉండేలా చూసుకోవాలి. ప్రాసెస్ చేసిన ఆహారాలు, జంక్ ఫుడ్ ను తగ్గించాలి. క్రమం తప్పకుండా వ్యాయామం, బయట ఆటలు హార్మోన్ల సమతుల్యతకు తోడ్పడతాయి.

వైద్య సహాయం ఎప్పుడు తీసుకోవాలి?

8 ఏళ్లలోపే పీరియడ్స్ వచ్చినట్లయితే, లేదా శరీరంలో మార్పులు చాలా ముందుగా కనిపిస్తే వైద్యులను సంప్రదించడం మంచిది. ముందస్తు ప్రాయానికి హార్మోన్ల పరీక్షలు చేయించుకోవడం అవసరం. తల్లిదండ్రులు భయపడకుండా, వైద్యుల సలహా తీసుకోవాలి.

అమ్మాయిలకు ముందుగా పీరియడ్స్ రావడానికి జీవనశైలి, ఆహారం, ఒత్తిడి, పర్యావరణం, జన్యుపరమైన కారణాలు ఉండవచ్చు. ఆరోగ్యకరమైన ఆహారం, వ్యాయామం, మంచి నిద్ర, మానసిక మద్దతు చాలా ముఖ్యం. తల్లిదండ్రులు.. పిల్లలకు అవగాహన, ప్రేమ, మద్దతు ఇవ్వాలి.