ఓవెన్ అవసరం లేదు.. కుక్కర్‌లోనే మెత్తటి చాక్లెట్ కేక్ ఇలా తయారు చేసేయండి!

Chocolate Cake in Cooker: చాక్లెట్ కేక్ తినాలనిపించినప్పుడు బేకరీకి వెళ్లాల్సిన అవసరం లేదు. ఇంట్లోనే సులభంగా తయారు చేసుకోవచ్చు. అయితే కేక్ చేయాలంటే ఓవెన్ తప్పనిసరిగా ఉండాలని చాలామంది అనుకుంటారు. కానీ మన ఇంట్లో ఉండే సాధారణ ప్రెషర్ కుక్కర్‌తోనే మెత్తగా, రుచిగా ఉండే చాక్లెట్ కేక్‌ను తయారు చేసుకోవచ్చు. పిల్లలకు సాయంత్రం స్నాక్‌గా ఇవ్వడానికి, పుట్టినరోజు వేడుకలకు లేదా ఇంటికి అతిథులు వచ్చినప్పుడు అందించడానికి ఇది చక్కని ఎంపిక. ఈ నేపథ్యంలో ఇంట్లో సులభంగా దొరికే పదార్థాలతో కుక్కర్‌లో చాక్లెట్ కేక్ ఎలా తయారు చేయాలో చూద్దాం రండి..

కావాల్సిన పదార్థాలు:

మైదా – ఒక కప్పు
చక్కెర పొడి – అర కప్పు
కోకో పౌడర్ – పావు కప్పు
పాలు – అర కప్పు
నూనె – పావు కప్పు
పెరుగు – పావు కప్పు
బేకింగ్ పౌడర్ – ఒక టీస్పూన్
బేకింగ్ సోడా – అర టీస్పూన్
వెనిల్లా ఎసెన్స్ – ఒక టీస్పూన్
ఉప్పు – చిటికెడు
చాక్లెట్ ముక్కలు – రెండు టేబుల్ స్పూన్లు (ఆప్షనల్)

తయారీ విధానం ఇలా:

ఒక గిన్నెలో మైదా, కోకో పౌడర్, బేకింగ్ పౌడర్, బేకింగ్ సోడా, ఉప్పు వేసి బాగా కలపాలి. ఈ మిశ్రమాన్ని జల్లెడ పట్టుకుంటే పిండి మెత్తగా తయారవుతుంది. మరో గిన్నెలో చక్కెర పొడి, పెరుగు, నూనె, వెనిల్లా ఎసెన్స్ వేసి చక్కెర కరిగే వరకు కలపాలి. ఇప్పుడు ఇందులో పాలను కొద్దికొద్దిగా పోస్తూ ముందుగా సిద్ధం చేసుకున్న పొడి పదార్థాలను కలపాలి. ఉండలు లేకుండా మిశ్రమాన్ని నెమ్మదిగా కలపాలి. పిండి మరీ చిక్కగా ఉంటే కొద్దిగా పాలు కలుపుకోవచ్చు.

ఇప్పుడు కేక్ తయారు చేసే గిన్నెకు లోపల నూనె రాసి, కొద్దిగా మైదా చల్లాలి. అందులో కేక్ మిశ్రమాన్ని పోసి పైన చాక్లెట్ ముక్కలు చల్లుకోవచ్చు.

తర్వాత ప్రెషర్ కుక్కర్‌లో రబ్బరు పట్టీ, విజిల్ తీసివేయాలి. కుక్కర్ అడుగున ఒక స్టాండ్ పెట్టి, మూత లేకుండా తక్కువ మంటపై ఐదు నిమిషాలు వేడి చేయాలి. వేడెక్కిన కుక్కర్‌లో కేక్ గిన్నెను జాగ్రత్తగా ఉంచి మూత పెట్టాలి. విజిల్ లేకుండా, తక్కువ మంటపై 35 నుంచి 45 నిమిషాల పాటు ఉడికించాలి.

కేక్ ఉడికిందో లేదో తెలుసుకోవడానికి మధ్యలో టూత్‌పిక్ గుచ్చాలి. దానికి పిండి అంటుకోకుండా బయటకు వస్తే కేక్ సిద్ధమైనట్లే. కాసేపు చల్లారిన తర్వాత గిన్నె నుంచి బయటకు తీసి ముక్కలుగా కట్ చేసుకుంటే సరి.