ఇప్పటివరకు చాలా మంది మద్యం తాగితేనే లివర్ దెబ్బతింటుంది అని అనుకునేవారు. కానీ తాజాగా పెరుగుతున్న కేసుల ప్రకారం ఒక వ్యక్తి జీవితంలో ఎప్పుడూ మద్యం తాగకపోయినా, అతనికి తీవ్రమైన ఫ్యాటీ లివర్ సమస్య వస్తున్నట్టు వైద్యులు గుర్తించారు. దీంతో ఆధునిక జీవనశైలిపై ఎన్నో అనుమానాలు వస్తున్నాయి.
ఒక వ్యక్తి ఎప్పుడూ ఇంటి వంటనే తినేవాడు. బయట ఫాస్ట్ ఫుడ్ ఎక్కువగా తినేవాడు కాదు. మద్యం, పొగ త్రాగడం వంటి అలవాట్లు కూడా లేవు. అయినా అతని లివర్లో కొవ్వు ఎక్కువగా పేరుకుపోయింది. దీనిని వైద్యులు నాన్-ఆల్కహాలిక్ ఫ్యాటీ లివర్ డిసీజ్ (NAFLD) అని తేల్చారు. మద్యం కారణం కాకుండా ఇతర కారణాల వల్ల లివర్లో కొవ్వు పేరుకుపోవడం దీనికి కారణం. అయితే ఇది ఎందుకు జరుగుతోంది? డాక్టర్లు చెబుతున్న ప్రధాన కారణాలు మన ఆహారం, జీవనశైలిలో వచ్చిన మార్పులే. ముఖ్యంగా రిఫైన్ చేసిన ఆహారమైన మైదా, వైట్ బ్రెడ్, బేకరీ పదార్థాలు.. ఇవి ఎక్కువగా తీసుకోవడం లివర్కు హానికరం. అలాగే ప్యాకెట్ ఫుడ్స్, ప్రాసెస్డ్ స్నాక్స్, జంక్ ఫుడ్ కూడా పెద్ద సమస్యగా మారాయి. ఇవి శరీరంలో కొవ్వును పెంచి, అది లివర్లో చేరేలా చేస్తాయి.
పంచదార అధికంగా తినడం
మరొక ముఖ్య కారణం హిడెన్ షుగర్. అంటే మనం నేరుగా చక్కెర తినకపోయినా, సాస్లు, జ్యూస్లు, ప్యాకెట్ ఫుడ్స్లో ఉండే చక్కెర మనకు తెలియకుండానే శరీరంలోకి వెళ్తుంది. ఇది లివర్ పనితీరును నెమ్మదిగా దెబ్బతీస్తుంది. ఇవి మాత్రమే కాదు, ఈ రోజుల్లో చాలామంది ఎదుర్కొంటున్న పెద్ద సమస్య సెడెంటరీ లైఫ్స్టైల్. అంటే రోజంతా కూర్చునే అలవాటు. ఆఫీస్ పనులు, మొబైల్, టీవీ వల్ల శారీరక కదలికలు చాలా తగ్గిపోయాయి. వ్యాయామం లేకపోవడం వల్ల శరీరంలో కొవ్వు సరిగ్గా ఖర్చు కాక, అది లివర్లో నిల్వ అవుతుంది.
Also read: Painkillers: మీరు వాడే ఈ పెయిన్ కిల్లర్ మాత్రలు ఎంత ప్రమాదకరమో తెలుసా?
ఫ్యాటీ లివర్ సమస్యలో అత్యంత ప్రమాదకరమైన విషయం ఏమిటంటే, మొదట్లో ఎలాంటి లక్షణాలు కనిపించవు. అంటే మనకు ఏమీ అనిపించదు. అందుకే చాలా మంది ఈ సమస్యను పట్టించుకోరు. కానీ సంవత్సరాల తర్వాత ఇది తీవ్రమై, లివర్ ఇన్ఫ్లమేషన్, లివర్ డ్యామేజ్, ఇంకా కొన్ని సందర్భాల్లో లివర్ సిరోసిస్ వంటి ప్రమాదకర స్థితికి చేరుతుంది. ఇది కేవలం పెద్దవాళ్లకే కాదు, యువతలో కూడా పెరుగుతోంది. ముఖ్యంగా నగర జీవనశైలి ఉన్నవారిలో ఈ సమస్య ఎక్కువగా కనిపిస్తోంది. ఫిట్గా కనిపించినా, బరువు ఎక్కువగా లేకపోయినా కూడా ఫ్యాటీ లివర్ వచ్చే ప్రమాదం ఉంది. అందుకే దీనిని సైలెంట్ డిసీజ్ అని కూడా అంటున్నారు.
మనం తినే ఆహారం, మనం చేసే పనులే మన ఆరోగ్యాన్ని నిర్ణయిస్తాయి. అందుకే కొన్ని జాగ్రత్తలు తప్పనిసరిగా పాటించాలి. మొదటగా, ప్రాసెస్డ్ ఫుడ్స్, జంక్ ఫుడ్ తగ్గించాలి. ఇంటి వంట, తాజా ఆహారం తీసుకోవాలి. చక్కెర వినియోగాన్ని తగ్గించాలి. అలాగే ప్రతిరోజూ కనీసం 30 నిమిషాలు అయినా వ్యాయామం చేయడం చాలా ముఖ్యం. నడక, యోగా, సైక్లింగ్ వంటి సాధారణ వ్యాయామాలు కూడా లివర్ ఆరోగ్యాన్ని కాపాడతాయి. సరైన నిద్ర కూడా అవసరం. ఒత్తిడిని తగ్గించుకోవడం కూడా ముఖ్యమే.
Share
సైబర్ దొంగలతో బ్యాంకు సిబ్బంది కుమ్మక్కు.. 32 మంది అరెస్టు..!
Multani mitti: ముఖానికే కాదు జుట్టుకు కూడా ముల్తాని మిట్టి ఎంత అద్భుతంగా పనిచేస్తుందో తెలుసా?
