ఎండ దెబ్బ నుంచి తప్పించుకోవాలా? ఈ సూపర్ ఫుడ్స్‌తో.. మీ శరీరాన్ని ఐస్‌లా మార్చుకోండి

 Summer Health Foods:  ఎండలు మండిపోతున్నాయి. బయటకు వెళ్తే చాలు చెమటలు పట్టడం, నీరసం రావడం సర్వసాధారణం. ఈ సమయంలో మన శరీరం త్వరగా డీహైడ్రేషన్‌కు గురవుతుంది. చాలా మంది దాహం వేయగానే షుగర్ ఎక్కువగా ఉండే.. కూల్ డ్రింక్స్ లేదా ఐస్ క్రీముల వైపు మొగ్గు చూపుతారు. కానీ ఇవి తాత్కాలికంగా చల్లదనాన్ని ఇచ్చినా, లోపల శరీర వేడిని పెంచుతాయి. ఆరోగ్య నిపుణుల సూచనల ప్రకారం.. వేసవిలో మనం తీసుకునే జంక్ ఫుడ్ లేదా స్పైసీ ఫుడ్స్ కి బదులుగా కొన్ని హెల్తీ ఆల్టర్నేటివ్స్ ఎంచుకోవడం ద్వారా రోజంతా ఉల్లాసంగా ఉండవచ్చు. ఆ అద్భుతమైన ఆహార మార్పులు ఏంటో ఇప్పుడు వివరంగా చూద్దాం.

వేసవిలో బెస్ట్ ఫుడ్ ఆల్టర్నేటివ్స్ :

మనం రోజూ తినే కొన్ని పదార్థాలకు బదులుగా కింది వాటిని ఎంచుకుంటే వేసవిని సులభంగా జయించవచ్చు.

1. మసాలా టీ/కాఫీలకు బదులుగా.. మజ్జిగ లేదా కొబ్బరి నీళ్లు:
మనం అలవాటుగా తాగే వేడి టీ లేదా కాఫీలు శరీర వేడిని పెంచుతాయి.

ప్రత్యామ్నాయం: వీటికి బదులుగా పల్చని మజ్జిగలో కొంచెం అల్లం, పుదీనా కలిపి తీసుకోండి. ఇది శరీరానికి ప్రోబయోటిక్స్‌ను అందించి జీర్ణ క్రియను మెరుగు పరుస్తుంది. అలాగే కొబ్బరి నీళ్లు శరీరంలోని ఎలక్ట్రోలైట్లను సమతుల్యం చేస్తాయి.

2. చిప్స్, సమోసాలకు బదులుగా.. పుచ్చకాయ లేదా దోసకాయ:
సాయంత్రం పూట వేయించిన పదార్థాలు తింటే శరీరంలో సెగలు పుడతాయి.

ప్రత్యామ్నాయం: నీటి శాతం ఎక్కువగా ఉండే పుచ్చకాయ లేదా దోసకాయ ముక్కలను స్నాక్స్‌గా తీసుకోండి. ఇవి శరీరానికి కావాల్సిన హైడ్రేషన్‌ను అందిస్తాయి.

3. తెల్ల అన్నం లేదా రోటీకి బదులుగా.. సద్ది అన్నం లేదా రాగి జావ:

వేసవిలో భారీ భోజనం చేయడం వల్ల మలబద్ధకం, అజీర్తి సమస్యలు వస్తాయి.

ప్రత్యామ్నాయం: మన పూర్వీకులు తినే సద్ది అన్నం వేసవికి అమృతం లాంటిది. ఇది శరీరాన్ని చల్లబరచడంలో తిరుగులేనిది. ఒకవేళ అది ఇష్టం లేకపోతే, కాల్షియం అధికంగా ఉండే రాగి జావ తీసుకోవడం వల్ల రోజంతా శక్తివంతంగా ఉండవచ్చు.

4. చక్కెర డ్రింక్స్‌కు బదులుగా.. నిమ్మరసం లేదా సబ్జా గింజలు:
బయట దొరికే సాఫ్ట్ డ్రింక్స్ లో షుగర్ కంటెంట్ ఎక్కువగా ఉంటుంది.

ప్రత్యామ్నాయం: ఇంట్లోనే తయారు చేసుకున్న నిమ్మరసంలో చిటికెడు ఉప్పు వేసి తాగండి. ముఖ్యంగా సబ్జా గింజలను నీళ్లలో నానబెట్టి ఆ నీటిని తాగడం వల్ల శరీర వేడి తక్షణమే తగ్గుతుంది.

5. మసాలా కూరలకు బదులుగా.. ఆకుకూరలు, పెరుగు:
కారం,మసాలాలు ఎక్కువగా ఉండే నాన్ వెజ్ లేదా గ్రేవీ కూరలు వేసవిలో అస్సలు మంచిది కాదు.

ప్రత్యామ్నాయం: పాలకూర, తోటకూర వంటి ఆకుకూరలు, గుమ్మడికాయ, పొట్లకాయ వంటి నీటి శాతం ఉన్న కూరగాయలను వాడండి. భోజనం చివరలో కచ్చితంగా ఒక కప్పు పెరుగు తీసుకోవడం వల్ల కడుపులో మంట తగ్గుతుంది.

Also Read: ఇంకా పెళ్లి కాలేదా? అయితే ఈ రీసెర్చ్ రిపోర్ట్ మీ కోసమే.. క్యాన్సర్ రిస్క్‌పై సంచలన నిజాలు

వేసవిలో పాటించాల్సిన మరికొన్ని జాగ్రత్తలు:

నీటి వినియోగం: దాహం వేయకపోయినా.. గంటకు ఒకసారి నీళ్లు తాగుతూ ఉండాలి. మట్టి కుండలో నీళ్లు తాగడం వల్ల సహజమైన చల్లదనం లభిస్తుంది.

ఆల్కహాల్‌కు దూరం: మద్యం శరీరంలోని నీటిని బయటకు పంపి డీహైడ్రేషన్ కలిగిస్తుంది. దీనికి దూరంగా ఉండటం మంచిది.

చిన్న చిన్న భోజనాలు: ఒకే సారి కడుపు నిండా తినేయకుండా.. రోజులో 4-5 సార్లు కొద్ది కొద్దిగా ఆహారం తీసుకోవడం వల్ల జీర్ణ వ్యవస్థపై భారం తగ్గుతుంది.

వేసవి ఆరోగ్యం మన ప్లేటులో.. మనం పెట్టుకునే ఆహారంపైనే ఆధారపడి ఉంటుంది. పైన చెప్పిన ప్రత్యామ్నాయ ఆహారాలను.. మీ డైట్‌లో చేర్చుకోవడం ద్వారా ఎండల బారి నుంచి తప్పించుకోవడమే కాకుండా.. బరువు తగ్గడానికి, చర్మ సౌందర్యాన్ని కాపాడుకోవడానికి కూడా ఇవి సహాయ పడతాయి. కాబట్టి.. ఈ సమ్మర్‌లో ‘హెల్తీగా తినండి చల్లగా ఉండండి.

Share

• 
• 
• 
• 
• 
•