కత్తులు పదును లేక ఇబ్బంది పడుతున్నారా? ఈ ఇంటి చిట్కాలు ట్రై చేయండి

Knife sharpening tricks: వంటగదిలో కత్తులు పదును పోతే కూరగాయలు కోయడం పెద్ద సవాలుగా మారుతుంది. అలాంటి కత్తితో పని చేయడం వల్ల సమయం వృధా కావడమే కాకుండా.. చేతులు జారి గాయాలయ్యే ప్రమాదం కూడా ఉంది. అయితే.. ప్రతిసారీ కత్తులను పదును పెట్టడానికి మార్కెట్‌కు వెళ్లాల్సిన అవసరం లేదు. మన ఇంట్లో ఉండే వస్తువులతోనే సులభంగా.. తక్కువ సమయంలో కత్తులను కొత్త వాటిలా తయారు చేసుకోవచ్చు. ఇంట్లోనే కత్తులను పదును పెట్టే కొన్ని అద్భుతమైన, సింపుల్ చిట్కాలను గురించి వివరంగా తెలుసుకుందాం.

వంటగదిలో కత్తి పదునుగా ఉంటేనే పని వేగంగా పూర్తవుతుంది. కానీ నిరంతర వాడకం వల్ల కత్తులు తమ పదునును కోల్పోతాయి. కత్తులను పదును పెట్టే.. ప్రొఫెషనల్ పరికరాలు అందరి దగ్గర ఉండకపోవచ్చు. అలాంటి సమయంలో మన ఇంట్లో అందుబాటులో ఉండే వస్తువులతోనే అద్భుతమైన ఫలితాలను పొందవచ్చు. అవేంటో ఇప్పుడు చూద్దాం.

1. సెరామిక్ కప్పు లేదా ప్లేట్ ఉపయోగించడం:
ఇది అత్యంత ప్రాచుర్యం పొందిన, ప్రభావవంతమైన పద్ధతి. మన ఇంట్లో ఉండే సెరామిక్ టీ కప్పు లేదా కాఫీ మగ్‌ను తిరగేసి ఉంచండి. దాని అడుగు భాగంలో ఉండే గరుకుగా ఉండే కత్తిని పదును పెట్టడానికి గ్రైండింగ్ స్టోన్‌లా పని చేస్తుంది.

ఎలా : కత్తిని 20 డిగ్రీల కోణంలో ఉంచి, కప్పు అడుగు భాగంపై నెమ్మదిగా రెండు వైపులా రుద్దాలి. ఇలా కొన్ని నిమిషాలు చేయడం వల్ల కత్తి అంచులు తిరిగి పదునుగా మారుతాయి.

2. అల్యూమినియం ఫాయిల్ ట్రిక్:
కత్తులు లేదా కత్తెరలు కొంచెం మొద్దుబారినప్పుడు అల్యూమినియం ఫాయిల్ బాగా పని చేస్తుంది. ఇది కేవలం పదును పెట్టడమే కాకుండా కత్తిపై ఉన్న గరుకుదనాన్ని తొలగిస్తుంది.

ఎలా : అల్యూమినియం ఫాయిల్‌ను 7-8 పొరలుగా మడవండి. ఇప్పుడు మొద్దుబారిన కత్తితో ఆ ఫాయిల్‌ను చిన్న ముక్కలుగా కోయడానికి ప్రయత్నించండి. ఇలా పదే పదే చేయడం వల్ల కత్తి అంచు రాపిడికి గురై పదునుగా మారుతుంది.

3. మరో కత్తిని ఉపయోగించడం:
ఒకవేళ మీ దగ్గర రెండు కత్తులు ఉంటే.. ఒకదానితో ఒకటి రుద్దడం ద్వారా పదును పెట్టవచ్చు. అయితే.. ఈ పద్ధతిలో చాలా జాగ్రత్తగా ఉండాలి.

ఎలా : ఒక కత్తి అంచును మరొక కత్తి వెనక భాగంపై (మొద్దుగా ఉన్న వైపు) వేగంగా రుద్దాలి. ఇది అత్యవసర సమయాల్లో కత్తిని సిద్ధం చేయడానికి సులభమైన మార్గం.

4. నెయిల్ ఫైలర్ :
మీ దగ్గర మెటల్ నెయిల్ ఫైలర్ ఉంటే.. అది ఒక చిన్న షార్పెనింగ్ రాడ్‌లా పని చేస్తుంది. దీనిపై ఉండే గరుకుతనం మొద్దు బారిన కత్తి అంచులను సరి చేస్తుంది.

ఎలా : నెయిల్ ఫైలర్‌ను ఒక చోట స్థిరంగా ఉంచి.. కత్తిని దానిపై పైనుంచి కిందకు స్లైడ్ చేయండి. రెండు వైపులా సమానంగా చేయడం వల్ల పదును పెరుగుతుంది.

5. ఇసుక అట్ట :
ఇసుక అట్ట లేదా శాండ్‌ పేపర్ కత్తులను పదును పెట్టడానికి గొప్ప సాధనం. ఇది కత్తిపై ఉన్న తుప్పును కూడా వదిలిస్తుంది.

ఎలా : ఒక చెక్క ముక్కకు ఇసుక అట్టను చుట్టి, దానిపై కత్తిని ఒకే దిశలో రుద్దండి. ఇది ప్రొఫెషనల్ ఫినిషింగ్‌ను ఇస్తుంది.

Also Read: బాడీ హీట్‌ను పెంచే కూరగాయలు.. వేసవిలో వీటిని ఎందుకు తగ్గించాలి?

కత్తులు పదునుగా ఉండాలంటే తీసుకోవాల్సిన జాగ్రత్తలు:

గ్లాస్ బోర్డులు వాడకండి: గాజు లేదా మార్బుల్ బోర్డులపై కూరగాయలు కోయడం వల్ల కత్తులు త్వరగా మొద్దుబారుతాయి. వీటికి బదులుగా చెక్క లేదా ప్లాస్టిక్ కటింగ్ బోర్డులను వాడండి.

వెంటనే కడగాలి: కత్తిని వాడిన వెంటనే కడిగి, పొడి క్లాత్‌తో తుడవాలి. తేమ ఉంటే తుప్పు పట్టే అవకాశం ఉంటుంది.

సరైన నిల్వ: కత్తులను గందరగోళంగా.. ఒకే డబ్బాలో వేయకుండా.. నైఫ్ హోల్డర్‌లో ఉంచడం వల్ల వాటి అంచులు దెబ్బతినవు.

వంటగదిలో కత్తి పదునుగా ఉంటే.. వంట చేయడం ఒక ఆనందంగా మారుతుంది. పైన పేర్కొన్న చిట్కాలను ఉపయోగించి మీరు మీ కత్తులను ఎల్లప్పుడూ పదునుగా ఉంచుకోవచ్చు. అయితే.. ఈ పద్ధతులను పాటించేటప్పుడు వేళ్లు తెగకుండా.. తగిన జాగ్రత్తలు తీసుకోవడం మరవకండి.