Stomach Pain: కడుపులో ‘సైలెంట్’ సమస్యలు.. ప్రాణాల మీదకు తెచ్చే 5 రకాల నొప్పులు

Stomach Pain: కడుపు నొప్పి అనేది మనలో చాలా మంది నిత్యం ఎదుర్కొనే సమస్య. గ్యాస్ లేదా అజీర్తి అని భావించి దీనిని పెయిన్ కిల్లర్స్‌తోనో లేదా సోడాతోనో సరిపెట్టుకోవడం మనకు అలవాటు. కానీ.. ప్రతి కడుపు నొప్పి సాధారణమైనది కాదు. కొన్నిసార్లు కడుపులో కలిగే స్వల్ప అసౌకర్యం వెనక ప్రాణాంతకమైన వ్యాధులు దాగి ఉండవచ్చు. డాక్టర్ల ప్రకారం, కడుపు నొప్పిని నిర్లక్ష్యం చేయడం వల్ల అది ప్రాణాల మీదకు వచ్చే ప్రమాదం ఉంది. మనం నిర్లక్ష్యం చేయకూడని కడుపు నొప్పులు, వాటి వెనుక ఉన్న సైలెంట్ కిల్లర్స్ గురించి తెలుసుకుందాం.

కడుపు నొప్పిని నిర్లక్ష్యం చేస్తున్నారా? జాగ్రత్త !

చాలా సందర్భాల్లో కడుపు నొప్పిని మనం “ఏదో తిని ఉంటాంలే” అని సరిపెట్టుకుంటాం. కానీ.. నిపుణుల అభిప్రాయం ప్రకారం, నొప్పి వచ్చే విధానం, అది వచ్చే స్థానాన్ని బట్టి దాని తీవ్రతను అంచనా వేయాలి. కడుపు నొప్పిని నిర్లక్ష్యం చేస్తే అవి ప్రాణాంతక పరిస్థితులకు దారి తీయవచ్చు.

1. అపెండిసైటిస్ :

కడుపుకు కుడివైపున కింద భాగంలో వచ్చే తీవ్రమైన నొప్పి అపెండిసైటిస్‌కు సంకేతం కావచ్చు. దీనిని సకాలంలో గుర్తించకపోతే.. అపెండిక్స్ పగిలిపోయి ఇన్ఫెక్షన్ శరీరం అంతా వ్యాపించే ప్రమాదం ఉంది. ఇది సెప్సిస్‌కు దారి తీసి ప్రాణాంతకంగా మారుతుంది.

2. ప్యాంక్రియాటిటిస్:
కడుపు పైభాగంలో మొదలై వెనక వీపు వరకు పాకే నొప్పి ప్యాంక్రియాస్ వాపును సూచిస్తుంది. అధిక మద్యపానం లేదా పిత్తాశయంలో రాళ్ల వల్ల ఇది సంభవిస్తుంది. ఇది అంతర్గత అవయవాలను దెబ్బతీసే “సైలెంట్ కండిషన్”.

3. పిత్తాశయ రాళ్లు:
కడుపుకు కుడివైపున పైభాగంలో నొప్పి వచ్చి, వాంతులు అవుతుంటే అది పిత్తాశయంలో రాళ్ల వల్ల కావచ్చు. ఈ రాళ్లు పిత్త వాహికను అడ్డుకున్నప్పుడు తీవ్రమైన ఇన్ఫెక్షన్ కలిగే అవకాశం ఉంది.

4. గ్యాస్ట్రిక్ లేదా పెప్టిక్ అల్సర్స్:

కడుపులో మంటగా అనిపించడం, ఖాళీ కడుపుతో ఉన్నప్పుడు నొప్పి పెరగడం అల్సర్ల లక్షణం. ఇవి తీవ్రమైతే కడుపు లోపల రక్తస్రావం జరగవచ్చు. ఇది అత్యవసర వైద్య పరిస్థితి.

5. ఇంటెస్టినల్ అబ్స్ట్రక్షన్ (పేగు అడ్డంకులు):
మలబద్ధకం, గ్యాస్ పోకపోవడం, కడుపు ఉబ్బరంతో కూడిన నొప్పి పేగుల్లో అడ్డంకులు ఉన్నాయని సూచిస్తుంది. దీనికి వెంటనే శస్త్రచికిత్స అవసరం కావచ్చు. లేదంటే పేగు కణజాలం చనిపోయే అవకాశం ఉంది.

ఎప్పుడు డాక్టర్‌ని సంప్రదించాలి ?

నొప్పి అకస్మాత్తుగా, చాలా తీవ్రంగా ఉంటే.

నొప్పితో పాటు జ్వరం, వణుకు వస్తుంటే.

రక్తంతో కూడిన వాంతులు లేదా మలం వెళ్తుంటే.

కడుపును తాకితే గట్టిగా అనిపిస్తూ.. విపరీతమైన నొప్పి ఉంటే.

శ్వాస తీసుకోవడంలో ఇబ్బంది కలగడం.

కడుపు నొప్పిని కేవలం గ్యాస్ సమస్యగా భావించి ఇంటి చిట్కాలతో కాలక్షేపం చేయడం ప్రమాదకరం. ముఖ్యంగా నొప్పి కొన్ని గంటల కంటే ఎక్కువ సమయం ఉన్నా లేదా పదేపదే వస్తున్నా వెంటనే డాక్టర్‌ను సంప్రదించి పరీక్షలు చేయించుకోవాలి.