Pregnancy: ఏ వయసులో గర్భం ధరించాలి? పిల్లల్ని కనేందుకు సరైన వయసు ఉందా?

గర్భం ధరించడానికి సరైన వయస్సు ఏది అనే ప్రశ్న చాలా మంది మహిళల్లో సందేహం కలిగిస్తుంది. చాలామంది 20లలోనే గర్భం రావాలి అని అనుకుంటారు, 30 తర్వాత ఆలస్యం అవుతుందని భయపడుతుంటారు. అయితే నిపుణులు చెబుతున్న ప్రకారం పిల్లల్ని కనేందుకు పర్ఫెక్ట్ ఏజ్ అంటూ ఏదీ లేదు. ప్రతి మహిళ పరిస్థితి, ఆరోగ్య స్థితి, మానసిక సిద్ధంగా ఉండడం వంటివన్నీ కలిసి నిర్ణయం తీసుకోవాలి. కుటుంబ పరిస్థితులు, ఉద్యోగం, వ్యక్తిగత లక్ష్యాలు కూడా ఈ నిర్ణయంలో కీలక పాత్ర పోషిస్తాయి.

ఏ వయసులో గర్భం ధరించాలి?
బయాలజీ పరంగా చూస్తే 20లలో గర్భం వచ్చే అవకాశాలు ఎక్కువగా ఉంటాయి. ఈ సమయంలో అండాల నాణ్యత, సంఖ్య బాగుంటాయి. 30 దాటిన తర్వాత క్రమంగా తగ్గుదల కనిపిస్తుంది. 35 తర్వాత ఈ మార్పు వేగంగా ఉంటుంది అని వైద్యులు చెబుతున్నారు. అయినా 35 తర్వాత గర్భం రావడం అసాధ్యం కాదు. సరైన జాగ్రత్తలు తీసుకుంటే 30ల చివరలో కూడా ఆరోగ్యకరమైన గర్భధారణ సాధ్యమే. అందుకే వయస్సు పెరిగినా భయపడాల్సిన అవసరం లేదు.

మహిళల్లో ఒక పెద్ద అపోహ ఉంది. పీరియడ్స్ రెగ్యులర్‌గా వస్తే ఫర్టిలిటీ కూడా బాగానే ఉంటుంది అని అనుకుంటారు. కానీ ఇది పూర్తిగా నిజం కాదు. బయటకు అన్నీ సరిగ్గా కనిపించినా లోపల అండాల నాణ్యత తగ్గి ఉండే అవకాశం ఉంటుంది. అందుకే కొందరికి ఏ సమస్యలూ లేకపోయినా గర్భం రావడంలో ఆలస్యం జరుగుతుంది. ఈ విషయంలో అవసరమైతే డాక్టర్ సలహా తీసుకోవడం మంచిది.

Also read: Oils for skin: ఈ నూనెలు వాడారంటే చర్మం మెరిసిపోతుంది, స్కిన్ గ్లో కోసం బెస్ట్ ఆయిల్స్ ఇవే!

ఎప్పుడు ఐవీఎఫ్?
ఇప్పటి కాలంలో చాలామంది IVF వంటి టెక్నాలజీలపై నమ్మకం పెంచుకున్నారు. ఇవి సహాయం చేస్తాయి కానీ అన్ని సమస్యలకు పూర్తి పరిష్కారం కావు. శరీర పరిస్థితి బాగుంటేనే మంచి ఫలితం ఉంటుంది. అండాల నాణ్యత, పురుషుల్లో వీర్య నాణ్యత, గర్భాశయ ఆరోగ్యం ఇవి కలిసి పనిచేస్తేనే గర్భం సాఫీగా ఉంటుంది. కాబట్టి టెక్నాలజీపై మాత్రమే ఆధారపడటం సరైన విధానం కాదు.
ఇక జీవనశైలి కూడా చాలా ప్రభావం చూపుతుంది. నిద్ర సరిగ్గా లేకపోవడం, ఒత్తిడి, అనారోగ్యకర ఆహారం ఇవి గర్భం వచ్చే అవకాశాలను తగ్గిస్తాయి. అలాగే PCOS, థైరాయిడ్ వంటి సమస్యలు కూడా ప్రభావం చూపుతాయి. కాబట్టి ఆరోగ్యంగా ఉండటం, సమతుల ఆహారం తీసుకోవడం, సరైన వ్యాయామం చేయడం చాలా అవసరం. మొత్తానికి గర్భం కోసం ఒకే వయస్సు లేదు. ఆరోగ్యం, సమయం, సరైన సలహా ఇవే ముఖ్యమైన అంశాలు.