Loneliness: ఎప్పుడు చనిపోతామో తెలియని ఈ చిన్న జీవితంలో నలుగురితో కలిసి మెలిసి ఉంటేనే సంతోషంగా ఉండగలము అని మన పెద్దలు ఎపుడూ చెబుతుంటారు. చాలామంది తమ కష్ట సుఖాలను ఇతరులతో పంచుకోవాలి అని కోరుకోవడం సహజం. కానీ, ఇంకొందరు మాత్రం ‘నాకంటూ ఎవరూ లేరు.. లోకం నన్ను ఒంటరిని చేసేసింది’ అని తమలో తామే బాధపడుతుంటారు. అయితే, మానసిక నిపుణుల అభిప్రాయం ప్రకారం.. ఒంటరితనం అనేది బయట వ్యక్తుల ద్వారా అనుభవించే శిక్ష కాదు.. అది మన ఆలోచనా తీరు, మనస్తత్వం నుంచి పుట్టుకొచ్చే పరిస్థితి. మనకు తెలియకుండానే మనం చేసే కొన్ని పనులు ఇతరులను మనకు దూరం చేస్తాయి. అవేంటంటే..
ఒకరు మనతో మాట్లాడకపోయినా లేదా ఒక చిన్న మాట అన్నా, దాన్ని పదే పదే తలచుకుంటూ వారు నన్ను కావాలనే అవమానించారు అని నిర్ణయానికి వచ్చేస్తారు. ఈ రకమైన నెగటివ్ ఆలోచనలు ఇతరుల పట్ల ద్వేషాన్ని పెంచి, వారితో కలవకుండా మనల్ని మనం ఒక గీత గీసుకుని ఆగిపోయేలా చేస్తాయి.
చుట్టూ ఉన్నవారు మనపై ఎప్పుడూ ఫోకస్ చేయాలని, అధిక ప్రాధాన్యత ఇవ్వాలని ఎక్కువగా ఆశించడం. ఎదుటి వ్యక్తికి కూడా సొంత సమస్యలు, పనులు ఉంటాయని గుర్తించకపోవడం వల్ల, వారు ఒక్కసారి పలకరించకపోయినా ‘నాకు ఎవరూ లేరు’ అనే నిరాశలోకి వెళ్లిపోతుంటారు కొందరు.
Also Read: అసలు ఏంటి ఈ బ్లూ టర్మరిక్? మనకు తెలిసిన పసుపు కంటే ఇది భిన్నమైందా?
చాలామంది తమ మనసులో ఏముందో స్పష్టంగా చెప్పరు. కానీ ఎదుటివారు తమను అర్థం చేసుకోవాలని కోరుకుంటారు. మనం నోరు విప్పి మాట్లాడనప్పుడు అవతలి వారికి మన ఇబ్బంది ఎలా తెలుస్తుంది? ఈ మౌనం మెల్లగా దూరాన్ని పెంచి, చివరికి ఒంటరితనాన్ని మిగిలుస్తుందనే విషయాన్ని ప్రతి ఒక్కరూ గుర్తుంచుకోవడం చాలా ముఖ్యం.
కొందరిని పలకరిస్తే చాలు.. ఎప్పుడూ తమ కష్టాలు, ఇతరుల మీద కోపాలు, సమాజం మీద అసహనాన్ని వెళ్లగక్కుతుంటారు. ఎప్పుడూ నెగటివ్గా మాట్లాడే వ్యక్తులతో ఎక్కువ సమయం గడపడానికి ఎవరూ ఇష్టపడరనే విషయం తెలుసుకోవాలి. ఇలాంటి అలవాట్ల వలన ఉన్న కొద్దిమంది ఫ్రెండ్స్ కూడా దూరమవ్వచ్చు.
ఎక్కువ మంది చేసే కామన్ మిస్టేక్ ఏమిటంటే.. గతంలో ఎవరో మోసం చేశారని లేదా బాధపెట్టారని, ఇప్పుడు కలిసే ప్రతి వ్యక్తిని అనుమానంగా చూడటం. ఈ క్రమంలో ‘అందరూ ఇంతే’ అనే ఒక ముద్ర వేసేయడం వల్ల కొత్త బంధాలు ఏర్పడవు. అందుకే గతాన్ని వదిలిపెట్టి.. ప్రస్తుతంలో జీవించడం చాలా ముఖ్యం. అప్పుడే చిన్న చిన్న సంతోషాలను మనసారా ఆస్వాదించగలము.
Also Read: ఖాళీ కడుపుతో సోడా తాగుతున్నారా? అయితే ఈ 4 ఆరోగ్య సమస్యల్ని కొని తెచ్చుకున్నట్లే!
Share
Chiranjeevi: ‘పునాదిరాళ్లు’ కోసం కెమెరా ముందు నిలిచిన రోజు.. చిరు ఎమోషనల్ పోస్ట్ వైరల్!
Afternoon Sleep: మధ్యాహ్నం నిద్ర ముంచుకొస్తుందా? ఈ విటమిన్ లోపమే కారణం కావచ్చు!
