పక్కన చికెన్ ఉన్నా వద్దంటారు.. నోటికి కారకారంగా అదిరిపోయే స్టైల్ ఎగ్ మసాలా రోస్ట్!

Masala Egg Roast: బ్యాచిలర్స్ అయినా.. వంటలు కొత్తగా నేర్చుకుంటున్న వారైనా చాలా తక్కువ సమయంలో, ఎంతో రుచిగా చేసుకోగలిగే బెస్ట్ డిష్ మసాలా ఎగ్ రోస్ట్. వేడివేడి అన్నంలోకి, పప్పుచారు కాంబినేషన్‌లోకి లేదా చపాతీ, పూరీ, పరోటాల్లోకి ఈ మసాలా ఎగ్ రోస్ట్ నంజుకుని తింటే ఆ మజానే వేరు. ఇంటికి అకస్మాత్తుగా బంధువులు వచ్చినా లేదా సాయంత్రం వేళ కారకారంగా ఏదైనా తినాలనిపించినా ఈ రెసిపీ చకచకా సిద్ధమైపోతుంది. కోడిగుడ్డులోని ప్రొటీన్లు ఆరోగ్యానికి ఎంత మేలు చేస్తాయో ప్రత్యేకంగా చెప్పక్కర్లేదు. సరైన కొలతలతో ఘాటైన మసాలాలు జోడించి, ఉడికించిన గుడ్లను నూనెలో దోరగా వేయిస్తే వచ్చే ఆ సువాసనే ఆకలిని రెట్టింపు చేస్తుంది. మీరు కూడా నోరూరించే ఈ స్పైసీ ఎగ్ రోస్ట్‌ను పర్‌ఫెక్ట్ రుచితో ఎలా తయారు చేసుకోవాలో ఇప్పుడు చూద్దాం.

కావలసిన పదార్థాలు:

కోడిగుడ్లు – 4 (ఉడికించినవి)

ఉల్లిపాయలు – 3 (సన్నగా పొడవుగా తరిగినవి)

టమోటాలు – 2 (సన్నగా తరిగినవి)

పచ్చిమిర్చి – 3 (నిలువుగా చీల్చినవి)

అల్లం వెల్లుల్లి పేస్ట్ – ఒక టీస్పూన్

కారం – ఒక టీస్పూన్

పసుపు – అర టీస్పూన్

ధనియాల పొడి – ఒక టీస్పూన్

గరం మసాలా – అర టీస్పూన్

జీలకర్ర పొడి – అర టీస్పూన్

నూనె – మూడు టేబుల్ స్పూన్లు

ఆవాలు – అర టీస్పూన్

జీలకర్ర – అర టీస్పూన్

కరివేపాకు – రెండు రెమ్మలు

కొత్తిమీర – కొద్దిగా (సన్నగా తరిగినది)

ఉప్పు – రుచికి సరిపడా

మసాల ఎగ్ రోస్ట్ తయారీ విధానం:

ముందుగా ఉడికించిన కోడిగుడ్ల పెంకు తీసి, వాటికి చాకుతో అక్కడక్కడ చిన్నగా గాట్లు పెట్టుకోవాలి. బాణలిలో ఒక టేబుల్ స్పూన్ నూనె వేసి వేడెక్కాక, చిటికెడు పసుపు, కొద్దిగా కారం, ఉప్పు వేయాలి. అందులో ఉడికించిన గుడ్లను వేసి రెండు నిమిషాలు దోరగా వేయించి వేరే ప్లేట్‌లోకి తీసుకోవాలి.

ఇప్పుడు అదే బాణలిలో మిగిలిన నూనె వేసి ఆవాలు, జీలకర్ర, కరివేపాకు వేసి వేగనివ్వాలి. తర్వాత తరిగిన ఉల్లిపాయలు, పచ్చిమిర్చి వేసి, కొద్దిగా ఉప్పు చల్లి ఉల్లిపాయలు బంగారు రంగులోకి మారేంత వరకు బాగా వేయించాలి. ఉల్లిపాయలు ఎంత బాగా వేగితే మసాలా రోస్ట్‌కు అంత మంచి రుచి వస్తుంది.

ఆ తర్వాత అల్లం వెల్లుల్లి పేస్ట్ వేసి పచ్చివాసన పోయే వరకు వేయించాలి. ఇప్పుడు తరిగిన టమోటా ముక్కలు వేసి మూత పెట్టి, టమోటాలు మెత్తగా గుజ్జులా అయ్యేంత వరకు మగ్గనివ్వాలి. టమోటాలు బాగా మగ్గిన తర్వాత పసుపు, కారం, ధనియాల పొడి, జీలకర్ర పొడి, ఉప్పు వేసి మసాలాలన్నీ బాగా కలిసేలా తిప్పాలి.

ఈ మసాలా మిశ్రమం నుంచి నూనె పైకి తేలే వరకు సన్నని మంటపై బాగా వేయించాలి. మసాలా డ్రైగా అనిపిస్తే రెండు చెంచాల నీళ్లు చిలకరించి కలుపుకోవచ్చు. ఇప్పుడు ముందుగా వేయించి పెట్టుకున్న కోడిగుడ్లను ఈ మసాలాలో వేసి, ప్రతి గుడ్డుకు మసాలా బాగా పట్టేలా మెల్లగా తిప్పుకోవాలి. మంటను చిన్నగా ఉంచి మరొక 3 – 4 నిమిషాలు మూత పెట్టి రోస్ట్ అవ్వనివ్వాలి. చివరిగా గరం మసాలా, సన్నగా తరిగిన కొత్తిమీర చల్లుకుని స్టవ్ ఆపేస్తే ఘుమఘుమలాడే మసాలా ఎగ్ రోస్ట్ సిద్ధమవుతుంది. ఇక వేడివేడిగా వడ్డించుకుంటే అమృతంలో ఉంటుంది.