ఓట్స్ తింటే కలిగే హెల్త్ బెనిఫిట్స్ ఇవే.. కానీ ఈ పొరపాట్లు అస్సలు చేయకండి!

Oats: నేటి ఉరుకుల పరుగుల జీవితంలో మనకు ఆరోగ్యం, సమయం రెండూ ముఖ్యం. అందుకే తక్కువ సమయంలో తయారయ్యే ‘ఓట్స్’ చాలా మందికి ఇష్టమైన బ్రేక్‌ఫాస్ట్ ఆప్షన్‌గా మారాయి. పీచు పదార్థం పుష్కలంగా ఉండే ఓట్స్ బరువు తగ్గడానికి మాత్రమే కాదు. మొత్తం ఆరోగ్యానికి మేలు చేస్తాయని పోషకాహార నిపుణులు చెబుతుంటారు. అయితే.. ఓట్స్ తింటే కేవలం లాభాలేనా? దీని వల్ల ఏవైనా నష్టాలు ఉన్నాయా ? అనే విషయాలను సరైన అవగాహనతో తెలుసుకోవడం చాలా ముఖ్యం.

ఓట్స్ వల్ల కలిగే ఆరోగ్య ప్రయోజనాలు:
ఓట్స్ ఒక సంపూర్ణ పోషకాహారం. ఇందులో విటమిన్లు, ఖనిజాలు , యాంటీ ఆక్సిడెంట్లు ఎక్కువగా ఉంటాయి.

1. బరువు తగ్గడానికి సహాయం:
ఓట్స్‌లో ‘బీటా-గ్లూకాన్’ అనే కరిగే పీచు పదార్థం ఉంటుంది. ఇది పొట్టను ఎక్కువ సేపు నిండుగా ఉంచుతుంది. దీని వల్ల మీకు త్వరగా ఆకలి వేయదు, ఫలితంగా జంక్ ఫుడ్ తినడం తగ్గి బరువు సులభంగా తగ్గుతారు.

2. గుండె ఆరోగ్యం:
ఓట్స్‌ క్రమం తప్పకుండా తీసుకోవడం వల్ల శరీరంలోని చెడు కొలెస్ట్రాల్ తగ్గుతుంది. ఇది రక్తనాళాల్లో కొవ్వు పేరుకుపోకుండా చూస్తుంది. తద్వారా గుండెపోటు వచ్చే ప్రమాదం తగ్గుతుంది.

3. షుగర్ కంట్రోల్ :
ఓట్స్ కి ‘తక్కువ గ్లైసెమిక్ ఇండెక్స్’ ఉంటుంది. అంటే ఇవి రక్తంలో చక్కెర స్థాయిలను అకస్మాత్తుగా పెంచవు. డయాబెటిస్ ఉన్నవారికి బెస్ట్ ఫుడ్ .

4. జీర్ణక్రియ మెరుగుదల:
పీచు పదార్థం ఎక్కువగా ఉండటం వల్ల మలబద్ధకం సమస్య ఉన్నవారికి ఓట్స్ అద్భుతంగా పనిచేస్తాయి. ఇది పేగుల కదలికను సులభతరం చేసి జీర్ణవ్యవస్థను శుభ్రపరుస్తుంది.

5. చర్మ సౌందర్యం:
ఓట్స్ కేవలం ఆహారంగానే కాదు. ఫేస్ ప్యాక్ లా కూడా వాడతారు. ఇవి చర్మంలోని దురదను, మంటను తగ్గించి చర్మాన్ని మృదువుగా మార్చుతాయి.

ఓట్స్ వల్ల కలిగే సైడ్ ఎఫెక్ట్స్ :
ఏదైనా సరే అతిగా తీసుకుంటే నష్టమే. ఓట్స్ విషయంలో కూడా కొన్ని జాగ్రత్తలు పాటించాలి.

జీర్ణ సమస్యలు: ఓట్స్‌లో ఫైబర్ చాలా ఎక్కువగా ఉంటుంది. ఒక్కసారిగా ఎక్కువ మొత్తంలో ఓట్స్ తినడం మొదలుపెడితే పొట్ట ఉబ్బరం, గ్యాస్, కడుపు నొప్పి వచ్చే అవకాశం ఉంది.

పోషకాల లోపం: రోజూ కేవలం ఓట్స్ మాత్రమే తింటూ ఇతర ఆహారాలు తీసుకోకపోతే శరీరానికి అందాల్సిన కొన్ని ముఖ్యమైన ప్రొటీన్లు, కొవ్వులు అందవు.

గ్లూటెన్ అలర్జీ: సహజంగా ఓట్స్ గ్లూటెన్-రహితమైనవే అయినప్పటికీ.. గోధుమలు లేదా బార్లీ పండించే చోటే వీటిని ప్రాసెస్ చేయడం వల్ల గ్లూటెన్ కలిసే ప్రమాదం ఉంది.’సెలియాక్’ వ్యాధి ఉన్నవారు జాగ్రత్తగా ఉండాలి.

తయారీ విధానం: ఇన్ స్టంట్ ఓట్స్ లేదా ఫ్లేవర్డ్ ఓట్స్ లో చక్కెర, ప్రిజర్వేటివ్స్ ఎక్కువగా ఉంటాయి. ఇవి ఆరోగ్యానికి మేలు చేయకపోగా బరువు పెరగడానికి కారణమవుతాయి.

ఓట్స్ తీసుకోవడానికి చిట్కాలు:
నీరు ఎక్కువగా తాగండి: ఓట్స్ తిన్నప్పుడు నీరు బాగా తాగాలి. లేదంటే పీచు పదార్థం వల్ల మలబద్ధకం పెరిగే ప్రమాదం ఉంది.

పండ్లను చేర్చండి: ప్లెయిన్ ఓట్స్ లో డ్రై ఫ్రూట్స్, నట్స్ లేదా తాజా పండ్లను కలుపుకోవడం వల్ల పూర్తి స్థాయి పోషకాలు అందుతాయి.

సరైన రకాన్ని ఎంచుకోండి: వీలైనంత వరకు ‘స్టీల్ కట్ ఓట్స్’ లేదా ‘రోల్డ్ ఓట్స్’ ఎంచుకోండి. ఇన్‌స్టంట్ ప్యాకెట్ల కంటే ఇవే మేలు.