Eye care: అప్పుడప్పుడు మనం ఆకాశం వైపు చూసినప్పుడు లేదా ఖాళీ తెల్లటి గోడ వైపు చూసినప్పుడు, కళ్ల ముందు చిన్న చిన్న చుక్కలు లేదా వెంట్రుకల వంటి ఆకారాలు కదులుతున్నట్లు అనిపిస్తాయి. మనం వాటిని పట్టుకోవాలని చూసినా లేదా కంటిని అటు ఇటు తిప్పినా అవి కూడా కదులుతూ ఉంటాయి. వీటిని ‘ఐ ఫ్లోటర్స్’ అంటారు. చాలా మందికి ఇది సాధారణ సమస్యే అయినప్పటికీ.. కొన్నిసార్లు ఇది తీవ్రమైన కంటి వైఫల్యానికి లేదా రెటినా దెబ్బతినడానికి సంకేతం కావచ్చు. ఈ మార్పుల వెనక ఉన్న కారణాలను ఇప్పుడు తెలుసుకుందాం.
కళ్ల ముందు మచ్చలు – డాక్టర్లు ఏం చెబుతున్నారు?
మన కంటి నిర్మాణంలో ‘విట్రియస్’ అనే జెల్ వంటి పదార్థం ఉంటుంది. ఇది మన కంటికి గుండ్రటి ఆకారాన్ని ఇస్తుంది. మనం వయసు పెరిగే కొద్దీ.. ఈ జెల్ నెమ్మదిగా ద్రవ రూపంలోకి మారుతుంది. ఈ క్రమంలో, ఆ జెల్లోని చిన్న చిన్న ప్రోటీన్ ఫైబర్లు ఒకదానికొకటి అంటుకుని ముద్దలుగా ఏర్పడతాయి. ఇవి కంటి లోపల నీడను కలిగిస్తాయి. మనం చూసేటప్పుడు ఆ నీడలే మనకు చుక్కలు లేదా పురుగుల లాగా కనిపిస్తాయి.
ఫ్లోటర్స్ ఎందుకు వస్తాయి?
వయసు పెరగడం: 50 ఏళ్లు పైబడిన వారిలో ఈ సమస్య ఎక్కువగా కనిపిస్తుంది. విట్రియస్ జెల్ కుంచించుకుపోవడం వల్ల ఈ మచ్చలు ఏర్పడతాయి.
మయోపియా (హ్రస్వదృష్టి): దగ్గరి చూపు తక్కువగా ఉన్నవారిలో.. అంటే కంటి గుడ్డు కాస్త పొడవుగా ఉన్నవారిలో చిన్న వయసులోనే ఫ్లోటర్స్ రావచ్చు.
కంటి వాపు లేదా ఇన్ఫెక్షన్లు: కంటి లోపల పొరల్లో వాపు రావడం వల్ల ఫ్లోటర్స్ ఏర్పడవచ్చు.
డయాబెటిక్ రెటినోపతి: మధుమేహం ఉన్నవారిలో కంటిలోని రక్తనాళాలు దెబ్బతిని, రక్తస్రావం జరిగినప్పుడు కూడా మచ్చలు కనిపిస్తాయి.
ఎప్పుడు ప్రమాదకరం?
చాలా వరకు ఫ్లోటర్స్ ప్రమాదకరం కావు.. కాలక్రమేణా మెదడు వాటిని అలవాటు చేసుకుంటుంది. కానీ, ఈ కింది లక్షణాలు కనిపిస్తే వెంటనే డాక్టరును సంప్రదించాలి.
ఆకస్మికంగా ఫ్లోటర్ల సంఖ్య భారీగా పెరగడం.
కళ్ల ముందు కాంతి మెరుపులు కనిపించడం.
చూపు పక్కన ఒక నల్లటి తెరలాంటిది కప్పేయడం.
కంటిలో నొప్పి లేదా చూపు మసకబారడం.
ఈ లక్షణాలు ‘రెటినల్ డిటాచ్మెంట్’ కు సంకేతం కావచ్చు. అంటే కంటి వెనుక ఉండే నరాల పొర విడిపోవడం. దీనికి వెంటనే చికిత్స చేయకపోతే శాశ్వతంగా చూపు కోల్పోయే ప్రమాదం ఉంటుంది.
Also Read: జెన్-Z కు 4 రెట్లు ఎక్కువ క్యాన్సర్ ముప్పు.. కారణాలు తెలిస్తే షాక్ అవుతారు ?
పరిష్కారాలు ఏంటి?
సాధారణ ఫ్లోటర్లకు ఎటువంటి చికిత్స అవసరం లేదు. కానీ అవి చూపుకు అడ్డంకిగా మారితే ‘వైట్రెక్టమీ’అనే సర్జరీ ద్వారా ఆ జెల్ను తొలగించి కృత్రిమ ద్రవాన్ని నింపుతారు. లేజర్ చికిత్స ద్వారా కూడా ఆ ముద్దలను విచ్ఛిన్నం చేయవచ్చు.
కళ్ల ముందు కనిపించే మచ్చలను చూసి భయపడాల్సిన పనిలేదు.. కానీ వాటిని గమనిస్తూ ఉండటం ముఖ్యం. క్రమం తప్పకుండా కంటి పరీక్షలు చేయించుకోవడం, ఆరోగ్యకరమైన ఆహారం తీసుకోవడం ద్వారా చూపును పదిలపరుచుకోవచ్చు.
Share
Pawan Kalyan: వివాదం వైపు అడుగులు వేస్తున్న సురేందర్ రెడ్డి, పవన్ కళ్యాణ్ సినిమా.. హీరోయినే కారణమా..!
Parvathipuram Manyam: ఆంధ్రప్రదేశ్లో షాకింగ్ ఘటన.. విద్యాసంస్థలో అశ్లీల డాన్సుల కలకలం!
