పరిశుభ్రత పేరుతో చర్మాన్ని పాడుచేసుకోకండి! రోజుకు 2 సార్లు స్నానం చేయడం వల్ల కలిగే అనర్థాలు

Over Bathing: సాధారణంగా వ్యక్తిగత పరిశుభ్రతలో స్నానం చేయడం అనేది అత్యంత కీలకమైన భాగం. ఉష్ణమండల ప్రాంతాల్లో చెమట, దుమ్ము కారణంగా చాలా మంది ఉదయం, సాయంత్రం రెండు సార్లు స్నానం చేయడానికి ఇష్టపడతారు. అయితే.. పరిశుభ్రత పేరిట అతిగా స్నానం చేయడం చర్మంపై ప్రతికూల ప్రభావం పడుతుందని  నిపుణులు హెచ్చరిస్తున్నారు. చర్మంపై ఉండే సహజ నూనెలు,  ఉపయోగకరమైన బాక్టీరియా దెబ్బతినడం వల్ల అనేక సమస్యలు తలెత్తుతాయి. రోజుకు రెండుసార్లు స్నానం చేయడం వల్ల కలిగే సైడ్ ఎఫెక్ట్స్ గురించి వివరంగా ఇప్పుడు తెలుసుకుందాం.

రోజుకు రెండుసార్లు స్నానం చేయడం వల్ల కలిగే సైడ్ ఎఫెక్ట్స్

1. చర్మం పొడిబారడం:
మన చర్మం సహజంగానే సెబమ్ అనే నూనెను ఉత్పత్తి చేస్తుంది. ఇది చర్మాన్ని మృదువుగా ఉంచడమే కాకుండా తేమను కాపాడుతుంది. రోజుకు రెండుసార్లు స్నానం చేయడం వల్ల, ముఖ్యంగా వేడి నీటిని, గాఢమైన సబ్బులను వాడటం వల్ల ఈ సహజ నూనెలు పూర్తిగా తొలగిపోతాయి. దీని వల్ల చర్మం పొడిబారి, పగుళ్లు ఇచ్చే అవకాశం ఉంటుంది.

2. చర్మ రక్షణ కవచం దెబ్బతినడం:
చర్మంపై ఉండే పైపొర ఒక రక్షణ కవచంలా పని చేస్తుంది. ఇది బయటి బ్యాక్టీరియా, వైరస్లు, కాలుష్య కారకాలు శరీరంలోకి ప్రవేశించకుండా అడ్డుకుంటుంది. అతిగా స్నానం చేయడం వల్ల ఈ పొర బలహీన పడుతుంది. దీని ఫలితంగా చర్మం ఎర్రబడటం, దురద, ఇతర ఇన్ఫెక్షన్లకు గురయ్యే ప్రమాదం పెరుగుతుంది.

3. మంచి బ్యాక్టీరియా నశించడం:
మన శరీరంపై ‘మంచి బ్యాక్టీరియా’ ఉంటుంది. ఇది మన రోగ నిరోధక వ్యవస్థకు మద్దతు ఇస్తుంది. అంతే కాకుండా హానికరమైన క్రిములతో పోరాడుతుంది. పదే పదే స్నానం చేయడం వల్ల ఈ సూక్ష్మజీవుల సమతుల్యత దెబ్బతింటుంది. దీని వల్ల చర్మం సెన్సిటివ్ గా మారిపోయి, చిన్న పాటి అలర్జీలకు కూడా తీవ్రంగా స్పందిస్తుంది.

4. ఎగ్జిమా, ఇతర చర్మ వ్యాధులు:
ముందే చర్మ సమస్యలు ఉన్నవారికి, ముఖ్యంగా ఎగ్జిమా లేదా సోరియాసిస్ ఉన్నవారికి రెండు సార్లు స్నానం చేయడం శాపంగా మారుతుంది. పదే పదే నీటితో తడవడం వల్ల చర్మం మరింత దురదకు గురై వ్యాధి తీవ్రత పెరుగుతుంది.చర్మంపై పగుళ్లు ఏర్పడి రక్తం రావడం లేదా మంట పుట్టడం వంటి సమస్యలు తలెత్తుతాయి.

5. జుట్టు ఆరోగ్యం దెబ్బతినడం:
చాలా మంది స్నానం చేసే ప్రతిసారీ తలస్నానం కూడా చేస్తారు. ఇది జుట్టుకు చాలా ప్రమాదకరం. స్కాల్ప్ (తలపై చర్మం) పదే పదే తడవడం వల్ల జుట్టు కుదుళ్లు బలహీనపడతాయి. జుట్టు పొడి బారిపోయి, చిట్లిపోవడం, విపరీతంగా రాలడం జరుగుతుంది.

6. రోగనిరోధక శక్తిపై ప్రభావం:
కొన్ని పరిశోధనల ప్రకారం.. శరీరాన్ని అతిగా శుభ్రంగా ఉంచుకోవడం వల్ల రోగ నిరోధక వ్యవస్థకు క్రిములను గుర్తించే సామర్థ్యం తగ్గుతుంది. చిన్న వయస్సు నుంచే అతిగా స్నానం చేసే అలవాటు ఉన్న పిల్లల్లో భవిష్యత్తులో అలర్జీలు ,ఆస్తమా వచ్చే అవకాశాలు ఎక్కువగా ఉంటాయని ‘హైజీన్ హైపోథెసిస్’ చెబుతోంది.

పరిశుభ్రత ముఖ్యం.. కానీ అది అతి కాకూడదు. మీరు జిమ్‌కు వెళ్లినా లేదా విపరీతమైన కాలుష్యంలో తిరిగినా తప్పనిసరి అయితే తప్ప, రోజుకు ఒకసారి స్నానం చేయడం సరిపోతుంది. ఒకవేళ రెండుసార్లు చేయాల్సి వస్తే.. వేడి నీటిని కాకుండా చల్లని లేదా గోరు వెచ్చని నీటిని వాడండి. తక్కువ కెమికల్స్ ఉన్న సబ్బులను వాడటం, స్నానం చేసిన వెంటనే మాయిశ్చరైజర్ రాసుకోవడం వల్ల నష్టాన్ని కొంతవరకు తగ్గించవచ్చు.

Share

• 
• 
• 
• 
• 
•