Steamed Sprouts Vs Raw Sprouts: ఆవిరి పట్టించిన మొలకలు Vs పచ్చి మొలకలు, పోషకాల పరంగా ఏవి బెస్ట్ ?

Steamed Sprouts Vs Raw Sprouts: మొలకలు మన ఆరోగ్యానికి చాలా మేలు చేస్తాయి. వాటిలో ప్రొటీన్లు, ఫైబర్, విటమిన్లు (ముఖ్యంగా C, K), ఖనిజాలు , యాంటీ ఆక్సిడెంట్లు పుష్కలంగా ఉంటాయి. అయితే.. వీటిని పచ్చిగా తినాలా లేక ఆవిరి పట్టించి తినాలా అనే సందేహం చాలా మందిలో ఉంటుంది. ఈ రెండు పద్ధతుల మధ్య తేడాలు, వాటి వల్ల కలిగే ఆరోగ్య ప్రయోజనాలను గురించిన పూర్తి వివరాలను ఇప్పుడు తెలుసుకుందాం.

పచ్చి మొలకలు లాభాలు & నష్టాలు:
పచ్చి మొలకలలో పోషకాలు చాలా అధికంగా ఉంటాయి.

లాభాలు :
పచ్చి మొలకలలో ఎంజైములు , విటమిన్ ‘సి’ వంటి సున్నితమైన పోషకాలు వేడి చేయకపోవడం వల్ల పూర్తిగా అలాగే ఉంటాయి. ఈ ఎంజైములు జీర్ణక్రియకు , జీవక్రియ వేగవంతం కావడానికి సహాయ పడతాయి.

అధిక ఫైబర్: వీటిలో పీచు పదార్థం అధికంగా ఉండి, తక్కువ కేలరీలు కలిగి ఉంటాయి. బరువు తగ్గాలనుకునే వారికి ఇవి చాలా మంచి ఎంపిక.

నష్టాలు:
బ్యాక్టీరియా ప్రమాదం: మొలకెత్తే ప్రక్రియకు వెచ్చని, తేమతో కూడిన వాతావరణం అవసరం. ఇదే వాతావరణం సాల్మోనెల్లా, ఈ. కోలి (E. coli) వంటి హానికరమైన బ్యాక్టీరియా పెరగడానికి కూడా అనుకూలంగా ఉంటుంది. ఈ బ్యాక్టీరియా కారణంగా ఫుడ్ పాయిజనింగ్ వచ్చే ప్రమాదం ఉంది.

జీర్ణ సమస్యలు: పచ్చి మొలకలు కొందరికి జీర్ణం కావడానికి కష్టంగా ఉంటాయి. ముఖ్యంగా సున్నితమైన జీర్ణవ్యవస్థ ఉన్నవారు, వీటిని తిన్న తర్వాత గ్యాస్, ఉబ్బరం లేదా కడుపు నొప్పి వంటి సమస్యలను ఎదుర్కొనే అవకాశం ఉంది.

ఆవిరి పట్టించిన మొలకలు:
పచ్చి మొలకలతో పోలిస్తే.. ఆవిరి పట్టించడం వల్ల పోషకాలు కొద్దిగా తగ్గినా, భద్రత పెరుగుతుంది.

లాభాలు:
మొలకలను ఆవిరి పట్టించడం ద్వారా హానికరమైన బ్యాక్టీరియా చాలా వరకు చనిపోతుంది. దీని వల్ల ఫుడ్ పాయిజనింగ్ ప్రమాదం గణనీయంగా తగ్గుతుంది.

సులభంగా జీర్ణం:ఉడికించిన మొలకలు మెత్తగా ఉండి, సులభంగా జీర్ణమవుతాయి. జీర్ణ సమస్యలు ఉన్నవారికి ఇది ఉత్తమ ఎంపిక.

పోషక శోషణ:ఉడికించడం వల్ల కొన్ని పోషకాలు (ఉదాహరణకు, ప్రోటీన్లు) శరీరం సులభంగా గ్రహించడానికి అనుకూలంగా మారతాయి (బయో-అవైలబిలిటీ పెరుగుతుంది).

నష్టాలు:
విటమిన్ల తగ్గుదల: వేడి చేయడం వల్ల విటమిన్ ‘సి’ వంటి కొన్ని నీటిలో కరిగే విటమిన్లు కొంతవరకు తగ్గిపోతాయి.

తగ్గిన ఎంజైములు: జీర్ణక్రియకు తోడ్పడే సహజ ఎంజైములు వేడికి నశించిపోతాయి.

ఆరోగ్య నిపుణులు చాలా వరకు, ముఖ్యంగా వర్షాకాలం, వర్షాకాలం తర్వాత, ఫుడ్ పాయిజనింగ్ ప్రమాదాన్ని నివారించడానికి మొలకలను కొద్దిసేపు ఆవిరి పట్టించి తినడం సురక్షితమైన మార్గమని సూచిస్తారు.

మీరు మీ రోజువారీ ఆహారంలో మొలకలను చేర్చుకోవడానికి ఆసక్తిగా ఉంటే.. తాజా మొలకలనే ఎంచుకోవడం ముఖ్యం.