సమ్మర్‌లో .. బీపీ, షుగర్ పేషెంట్లు తప్పక పాటించాల్సిన జాగ్రత్తలు

Summer health precautions: ఎండ తీవ్రత రోజురోజుకూ పెరిగిపోతోంది. సాధారణ ప్రజలకే ఈ ఉక్కపోత భరించడం కష్టంగా మారుతుంటే.. ఇక బీపీ (రక్తపోటు), షుగర్ (మధుమేహం) వంటి దీర్ఘకాలిక సమస్యలతో.. బాధపడేవారి పరిస్థితి మరింత ఆందోళనకరంగా మారుతుంది. ఎండల ప్రభావం వల్ల శరీరంలో వచ్చే మార్పులు నేరుగా రక్తంలో గ్లూకోజ్ స్థాయిలను, రక్తపోటును తీవ్రంగా ప్రభావితం చేస్తాయి. కాబట్టి ఈ సమ్మర్‌లో ఎలాంటి అనారోగ్య సమస్యల బారిన పడకుండా ఉండటానికి బీపీ, షుగర్ అభ్యర్థులు ప్రత్యేకమైన జాగ్రత్తలు తీసుకోవడం ఎంతో అవసరం. ఆ కీలకమైన హెల్త్ టిప్స్ ఏంటో ఇప్పుడు తెలుసుకుందాం.

డీహైడ్రేషన్ ముప్పు,నీటి ప్రాధాన్యత:
ఎండ కాలంలో బీపీ, షుగర్ పేషెంట్లను వేధించే అతిపెద్ద సమస్య డీహైడ్రేషన్ (శరీరంలో నీటి శాతం తగ్గిపోవడం). విపరీతంగా చెమటలు పట్టడం వల్ల శరీరంలోని లవణాలు, నీరు బయటకు వెళ్లిపోతాయి. షుగర్ ఉన్నవారిలో నీటి శాతం తగ్గితే రక్తంలో గ్లూకోజ్ గాఢత పెరిగి, షుగర్ లెవెల్స్ ఒక్కసారిగా పెరుగుతాయి. అలాగే బీపీ ఉన్నవారిలో డీహైడ్రేషన్ వల్ల రక్త పరిమాణం తగ్గి,రక్తపోటు పడిపోవడం లేదా ఒక్కో సారి గుండెపై భారం పెరిగి బీపీ అకస్మాత్తుగా పెరగడం జరుగుతుంది. అందుకే వీరు దాహం వేయకపోయినా గంట గంటకూ నీళ్లు తాగుతూ ఉండాలి. మంచినీటితో.. పాటు మజ్జిగ, నిమ్మరసం, కొబ్బరినీళ్లు వంటివి తీసుకోవడం వల్ల శరీరానికి తక్షణ శక్తి లభిస్తుంది. అయితే చక్కెర కలిపిన కూల్‌డ్రింక్స్, పండ్ల రసాలకు దూరంగా ఉండాలి.

ఎండ తీవ్రత:
తీవ్రమైన ఎండలు ఉన్నప్పుడు మధ్యాహ్నం 11 గంటల నుండి సాయంత్రం 4 గంటల వరకు అత్యవసరమైతే తప్ప బయటకు రాకపోవడమే మంచిది. వేడి వాతావరణం వల్ల ఇన్సులిన్ తీసుకునే వారి శరీరంలో అది వేగంగా శోషించబడి లో-షుగర్ (హైపోగ్లైసీమియా) వచ్చే ప్రమాదం ఉంది. అంతేకాదు, మీరు వాడే మందులు, ఇన్సులిన్ ఇంజెక్షన్లు, గ్లూకోమీటర్ స్ట్రిప్స్‌ను నేరుగా ఎండ తగిలే చోట లేదా ఎక్కువ వేడిగా ఉండే గదుల్లో ఉంచకూడదు. వేడి వల్ల ఇన్సులిన్ పనితీరు దెబ్బతింటుంది. కాబట్టి వాటిని చల్లని ప్రదేశంలో లేదా ఫ్రిజ్‌లో భద్రపరచాలి. బయటకు వెళ్లాల్సి వస్తే కాటన్ బట్టలు ధరించడం, గొడుగు, సన్‌గ్లాసెస్ వాడటం మర్చిపోవద్దు.

ఆహార నియమాలు ,వ్యాయామంలో మార్పులు:
ఈ సీజన్‌లో జీర్ణశక్తి మందగిస్తుంది కాబట్టి బీపీ, షుగర్ ఉన్నవారు తేలికగా అరిగే ఆహారాన్ని తీసుకోవాలి. ఎక్కువగా నూనెలో వేయించిన పదార్థాలు, మసాలాలు, సాల్ట్ ఎక్కువగా ఉండే పచ్చళ్లను పూర్తిగా తగ్గించాలి. ఉప్పు ఎక్కువైతే బీపీ పెరుగుతుంది. ఆహారంలో దోసకాయ, సొరకాయ, పుచ్చకాయ, ఆకుకూరలు వంటి నీటి శాతం ఎక్కువగా ఉండే కూరగాయలను చేర్చుకోవాలి. ఇక వ్యాయామం విషయానికి వస్తే, ఎండ ఎక్కువగా ఉండే సమయాల్లో వాకింగ్ చేయకూడదు. తెల్లవారుజామున లేదా సాయంత్రం వేళల్లో ఎండ తగ్గిన తర్వాత మాత్రమే నడక సాగించాలి. వ్యాయామం చేసేటప్పుడు కూడా వెంట నీటి బాటిల్ ఉంచుకోవడం తప్పనిసరి.

చివరగా, వేసవి ముగిసే వరకు బీపీ, షుగర్ పేషెంట్లు ఎప్పటికప్పుడు తమ ఆరోగ్య స్థితిని గమనించుకుంటూ ఉండాలి. వారానికి కనీసం రెండు సార్లు ఇంట్లోనే గ్లూకోమీటర్, బీపీ మిషన్ల ద్వారా రీడింగ్స్ చెక్ చేసుకోవడం మంచిది. ఒకవేళ విపరీతమైన అలసట, తలతిరగడం, గుండె దడ, చెమటలు ఎక్కువగా పట్టడం వంటి లక్షణాలు కనిపిస్తే అస్సలు నిర్లక్ష్యం చేయకుండా వెంటనే డాక్టర్‌ను సంప్రదించాలి. వైద్యుల సలహా లేకుండా మందుల మోతాదును అస్సలు మార్చకూడదు. పైన చెప్పుకున్న చిన్న చిన్న జాగ్రత్తలను క్రమం తప్పకుండా పాటిస్తే, ఈ వేసవి కాలంలో కూడా మీ బీపీ, షుగర్ లెవెల్స్‌ను పూర్తిగా అదుపులో ఉంచుకుని ఆరోగ్యంగా ఉండవచ్చు