చిన్నవయసులోనే ముఖంలో ముసలితనం ఛాయలు.. కారణాలు ఇవే.. ఈ జాగ్రత్తలు పాటించాలి

Facial Ageing Control| వయసుతోపాటు ముఖంలో ముడతలు రావడం లేదా చర్మం పలచబారిపోవడం సహజంగా జరిగే ప్రక్రియ. దీన్నే ముఖం ముసలిబారిపోవడం అని అంటారు. అయితే మంచి ఆరోగ్య అలవాట్లతో ముఖంలో ముసలితన ఛాయలు త్వరగా రాకుండా ఆలస్యం చేయవచ్చు. తద్వారా యవ్వనాన్ని మరికొంత కాలం పొడిగించవచ్చు.

ముఖం ముసలిబారడం అంటే ఏమిటి?

ముఖం ముసలిబారడం అనేది ముఖ చర్మం, కండరాలు, ఎముకల నిర్మాణాన్ని ప్రభావితం చేసే సహజ ప్రక్రియ. ఇది కేవలం ముఖంపై వచ్చే ముడతలు మాత్రమే కాదు. చర్మం లోపలి పొరల నుంచే ముసలిబారడం ప్రారంభమవుతుంది. అయితే కాలక్రమేణా నెమ్మదిగా అది బయటకు కనిపిస్తుంది. చర్మ వ్యాధి వైద్య నిపుణులు డాక్టర్ థామస్ పలోస్చి ముఖంలో త్వరగా కనిపించే ముసలితనం ఛాయలకు గల కారణాలను వివరించారు.

ముఖం ముసలిబారడానికి ప్రధాన కారణాలు

1. కొలాజెన్ తగ్గడం
కొలాజెన్ అనేది చర్మంలో పటుత్వం, మ‌ృదువుగా ఉంచే ప్రోటీన్. వయసు పెరిగేకొద్దీ దీని ఉత్పత్తి తగ్గుతుంది. దీని వల్ల ముడతలు, చర్మం సాగిపోయి వేలాడడం, పలచబారిపోవడం జరుగుతుంది.

2. ఎండ ప్రభావం
సూర్యరశ్మి అంటే ఎండలో ఉంటే యువి రేస్ (అతినీలలోహిత కిరణాలు) చర్మ కణాలను దెబ్బతీసి కొలాజెన్‌‌ని నాశనం చేస్తాయి. దీనినే ఫోటోఏజింగ్ అంటారు. దీంతో ముఖచర్మంలో త్వరగా ముడతలు, మచ్చలు కనిపిస్తాయి. అలాగే చర్మం రఫ్‌గా మారడానికి కారణమవుతుంది.

3. హార్మోన్లలో మార్పులు
హార్మోన్లు చర్మ ఆరోగ్యానికి చాలా ముఖ్యం. ఈస్ట్రోజెన్ స్థాయి తగ్గడం వల్ల చర్మం పలచబడి, అందులో నీటిని నిలుపుకోలేకపోతుంది. దీని వల్ల చర్మం పొడిబారి ముసలిబారడం త్వరగా కనిపిస్తుంది.

4. కొవ్వు, ఎముకల మార్పులు
వయసు పెరిగేకొద్దీ ముఖంలోని కొవ్వు తగ్గి, స్థానం మారుతుంది. దీని వల్ల ముఖం లోతుగా కనిపించి, చర్మం వేలాడుతుంది. ఎముకల సాంద్రత తగ్గడం కూడా ముఖం ఆకారాన్ని మార్చేస్తుంది.

5. జీవనశైలి కారణాలు
ధూమపానం, అధిక చక్కెర తీసుకోవడం, నిద్ర లోపం వంటి అలవాట్లు ముసలిబారడాన్ని వేగవంతం చేస్తాయి. ఇవి కొలాజెన్‌ను దెబ్బతీసి చర్మం నీరసంగా కనిపించేలా చేస్తాయి.

ముఖం ముసలిబారడాన్ని ఎలా నెమ్మది చేయాలి?

1. రోజూ సన్‌స్క్రీన్ ఉపయోగించాలి
సన్‌స్క్రీన్ క్రీమ్.. యువి కిరణాల నుంచి చర్మాన్ని రక్షిస్తుంది. ఇది అత్యంత ప్రభావవంతమైన యాంటీ-ఏజింగ్ చర్య.

2. ఆరోగ్యకరమైన ఆహారం తీసుకోండి
పండ్లు, కూరగాయలు, ప్రోటీన్ ఎక్కువగా తినండి. ఇవి కొలాజెన్ స్థాయిని నిలబెడతాయి.

3. తగినంత నీరు తాగండి
శరీరంలో నీరు.. చర్మాన్ని మృదువుగా, ఫ్రెష్‌గా ఉంచుతుంది.

4. బాగా నిద్రపోవాలి
రోజుకు 7-8 గంటలు నిద్రపోవడం వల్ల చర్మం సరిగ్గా రిపేర్ అవుతుంది.

5. మానసిక ఒత్తిడిని కంట్రోల్ చేయండి
ఒత్తిడి కొలాజెన్‌ను తగ్గిస్తుంది. అందుకే రిలాక్స్ అయ్యే అలవాటు చేసుకోండి.

6. సరైన స్కిన్‌కేర్ వాడండి
ఒక సాఫ్ట్ క్లెన్సర్, మాయిశ్చరైజర్ ఉపయోగించండి. రెటినాయిడ్స్ కొలాజెన్ పెంచడానికి సహాయపడతాయి.

7. వ్యాయామం చేయండి
వ్యాయామం రక్తప్రసరణ మెరుగుపరచి చర్మానికి ఆక్సిజన్ అందిస్తుంది.

8. హానికర అలవాట్లు మానండి
ధూమపానం, మద్యపానం తగ్గించండి లేదా పూర్తిగా మానేయాలి.

Also Read: ఆ దేశంలో టాయ్‌లెట్ సీట్‌కు పూజలు చేస్తున్న ప్రజలు.. ఈ సంప్రదాయం వెనుక విచిత్ర కారణం

ముఖం ముసలిబారడానికి కొలాజెన్ తగ్గడం, సూర్యరశ్మి ప్రధాన కారణాలు. సరైన ఆహారం, సన్‌స్క్రీన్, నిద్ర, వ్యాయామం వంటి అలవాట్లతో దీన్ని ఆలస్యం చేయవచ్చు. ముందస్తుగానే జాగ్రత్తలు తీసుకుంటే యవ్వనం ఎక్కువ కాలం నిలుస్తుంది. నిరంతరం కొనసాగించడమే కీలకం.

ముఖ్య గమనిక: పై కథనంలో ఉన్న సమాచారం డాక్టర్ థామస్ పలోస్చి అభిప్రాయాలు. ఇందులో ఉన్న ఏమైనా తప్పిదాలుంటే ‘బిగ్ టీవీ’ అందుకు బాధ్యత వహించదు.