ప్రభాస్ ‘ఫౌజీ’ సెట్స్ నుండి ఫోటోలు లీక్.. వారికి వార్నింగ్ ఇచ్చిన మేకర్స్!

Fauji Leak: రెబల్ స్టార్ ప్రభాస్ ప్రస్తుతం వరుస పాన్ ఇండియా ప్రాజెక్టులతో బిజీగా ఉన్నారు. అందులో అత్యంత ఆసక్తిని రేకెత్తిస్తున్న చిత్రం ‘ఫౌజీ’ (వర్కింగ్ టైటిల్). ‘సీతారామం’ వంటి క్లాసిక్ హిట్ అందించిన దర్శకుడు హను రాఘవపూడి దర్శకత్వంలో తెరకెక్కుతున్న ఈ సినిమాపై భారీ అంచనాలు ఉన్నాయి. అయితే, తాజాగా ఈ సినిమా షూటింగ్ సెట్స్ నుండి కొన్ని ఫోటోలు సోషల్ మీడియాలో లీక్ అవ్వడం చిత్ర యూనిట్‌ను తీవ్ర అసహనానికి గురిచేసింది.

సీరియస్ అయిన మేకర్స్

ఈ లీకులపై స్పందించిన నిర్మాణ సంస్థ మైత్రీ మూవీ మేకర్స్, సోషల్ మీడియా వేదికగా ఒక బహిరంగ హెచ్చరికను జారీ చేసింది. “మా దృష్టికి వచ్చిన సమాచారం ప్రకారం, కొంతమంది ‘ఫౌజీ’ షూటింగ్ సెట్స్ నుండి లీక్ అయిన ఫోటోలను సర్క్యులేట్ చేస్తున్నారు. ఇది చాలా తీవ్రమైన విషయం. ఇలాంటి కంటెంట్‌ను షేర్ చేసే వారిపై కఠిన చర్యలు తీసుకుంటాం. ఏవైనా ఖాతాలు ఇలాంటి లీకులను ప్రోత్సహిస్తే, వాటిని రిపోర్ట్ చేయడమే కాకుండా చట్టపరమైన చర్యలు కూడా చేపడతాము” అని స్పష్టం చేశారు. సినిమా చూసేటప్పుడు ప్రేక్షకులకు కలిగే ఆశ్చర్యం ఈ లీకుల వల్ల దెబ్బతింటుందని, వెండితెరపై వచ్చే దృశ్యాలు అంతకంటే అద్భుతంగా ఉంటాయని, కాబట్టి అభిమానులు ఎవరూ వీటిని షేర్ చేయవద్దని కోరారు.

దర్శకుడు విజ్ఞప్తి

ఈ విషయంపై దర్శకుడు హను రాఘవపూడి కూడా స్పందించారు. “మేము మా హృదయాన్ని పెట్టి ఈ సినిమాను నిర్మిస్తున్నాము. ఎంతో కష్టపడి క్రియేట్ చేస్తున్న ఈ మ్యాజిక్‌ను లీకులతో పాడు చేయకండి. సినిమాను ఎలా అనుభవించాలో అలా థియేటర్లలోనే చూసి ఆనందిద్దాం” అని ఆయన ఎమోషనల్ అయ్యారు.

‘ఫౌజీ’ సినిమా ప్రత్యేకతలు

ఈ సినిమా పీరియాడిక్ యాక్షన్ డ్రామాగా రూపొందుతోంది. దీనికి సంబంధించి కొన్ని ఆసక్తికర విషయాలు ఇప్పటికే బయటకు వచ్చాయి. ఈ సినిమా రెండు భాగాలుగా రానుంది. రెండవ భాగం మొదటి భాగానికి ప్రీక్వెల్‌గా ఉంటుందని దర్శకుడు ఇప్పటికే స్పష్టం చేశారు. భారత దేశ వలసరాజ్యాల కాలం నాటి చారిత్రక అంశాల ఆధారంగా ఒక కల్పిత గాథగా ఈ సినిమాను మలుస్తున్నారు. ఈ సినిమాతో ఇమాన్వి టాలీవుడ్ ఇండస్ట్రీకి పరిచయం అవుతోంది. 2026లో తెలుగు, హిందీ, తమిళ, కన్నడ మలయాళ భాషల్లో ఈ సినిమాను గ్రాండ్‌గా విడుదల చేసేందుకు ప్లాన్ చేస్తున్నారు. ప్రభాస్ గత చిత్రం ‘ది రాజా సాబ్’ మిశ్రమ స్పందన పొందినప్పటికీ, హను రాఘవపూడి మేకింగ్‌పై అభిమానుల్లో గట్టి నమ్మకం ఉంది. అందుకే ఈ సినిమా చిన్న అప్‌డేట్ వచ్చినా అది సోషల్ మీడియాలో సెన్సేషన్ అవుతోంది. అయితే ఇలాంటి లీకులు సినిమా క్రేజ్‌ను తగ్గించే అవకాశం ఉన్నందున, అభిమానులు కూడా లీకులను అరికట్టాలని కోరుకుంటున్నారు.