Chapati: గోధుమ పిండితో చేసే చపాతీ, రోటీ ఎవరు తినకూడదు?

మన దేశంలో గోధుమ పిండితో చేసే చపాతీలు, రోటీలు చాలా మంది రోజూ తినే ప్రధాన ఆహారం. ఉదయం, రాత్రి భోజనంలో వీటిని తప్పనిసరిగా తీసుకుంటారు. గోధుమలో ఫైబర్, విటమిన్లు, ఖనిజాలు ఉండటంతో ఇది ఆరోగ్యానికి మంచిదని భావిస్తారు. అయితే గోధుమలతో చేసే చపాతీ, రోటీ ప్రతి ఒక్కరికీ సరిపోదని వైద్యులు చెబుతున్నారు. గోధుమలో గ్లూటెన్ అనే ప్రోటీన్ ఉంటుంది. కొంతమందికి ఈ గ్లూటెన్ శరీరానికి సరిపోదు. ముఖ్యంగా సీలియాక్ వ్యాధి ఉన్నవారు గోధుమ తింటే పేగులు దెబ్బతింటాయి. అలాంటి వారికి పొట్ట నొప్పి, విరేచనాలు, బలహీనత, రక్తహీనత వంటి సమస్యలు రావచ్చు. ఇలాంటి వారు గోధుమను పూర్తిగా మానేయాలని డాక్టర్లు సూచిస్తున్నారు.

అలాగే కొంతమందికి గ్లూటెన్ సెన్సిటివిటీ ఉంటుంది. వీరికి గోధుమ తిన్న తర్వాత పొట్ట ఉబ్బరం, గ్యాస్, అలసట, తలనొప్పి వంటి సమస్యలు కనిపిస్తాయి. ఈ లక్షణాలు తరచూ వస్తే డాక్టర్‌ను సంప్రదించడం మంచిది. డయాబెటిస్ ఉన్నవారు చపాతీ, రోటీలు ఎక్కువగా తినకూడదని నిపుణులు చెబుతున్నారు. గోధుమలో కార్బోహైడ్రేట్లు ఎక్కువగా ఉంటాయి. ఇవి రక్తంలో చక్కెర స్థాయిని పెంచే అవకాశం ఉంది. అందుకే షుగర్ ఉన్నవారు పరిమిత మోతాదులో మాత్రమే తినాలి. అవసరమైతే డైటీషియన్ సలహా తీసుకోవాలి.

Also read: Baobab Oil: జుట్టు పొడవుగా, నల్లగా పెరగాలా? ఇప్పుడే బావోబాబ్ నూనె కొనేసుకోండి

పీసీఓడీ, పీసీఓఎస్ ఉన్న మహిళలు
హార్మోన్ల అసమతుల్యత సమస్యలు ఉన్న మహిళలు, పీసీఓడీ లేదా పీసీఓఎస్ ఉన్నవారు కూడా గోధుమలతో చేసిన పదార్థాలు ఎక్కువగా తీసుకోవద్దని వైద్యులు చెబుతారు. గోధుమలు అధికంగా తీసుకుంటే ఇన్సులిన్ రెసిస్టెన్స్ పెరిగే అవకాశం ఉంది. దీని వల్ల బరువు పెరగడం, హార్మోన్ల సమస్యలు మరింత పెరగవచ్చు. పొట్టలో మంట, గ్యాస్, అజీర్ణం వంటి సమస్యలు తరచుగా ఉంటే గోధుమ తగ్గించడం మంచిదని వైద్యులు సూచిస్తున్నారు. ప్రతి ఒక్కరి శరీర నిర్మాణం వేరు. అందుకే ఒకరికి సరిపడే ఆహారం మరొకరికి సరిపోకపోవచ్చు.

Also read: Mutton Curry: కొత్తిమీర మటన్ ఇలా వండారంటే గిన్నె మొత్తం ఖాళీ అయిపోతుంది, రెసిపీ ఇదిగో

గోధుమలతో చేసిన చపాతీ, రోటీలకు బదులుగా జొన్న, బాజ్రా, రాగి వంటి మిల్లెట్ల రొట్టులు తీసుకోవచ్చు. ఇవి ఫైబర్ ఎక్కువగా ఉండి జీర్ణానికి మంచివి. రక్తంలో చక్కెర స్థాయిని కూడా నియంత్రించడంలో సహాయపడతాయి. అలాగే పప్పులు, కూరగాయలు ఎక్కువగా తీసుకోవడం మంచిది. అలాగని గోధుమలతో చేసిన ఆహారం పూర్తిగా మంచిది కాదని చెప్పడం లేదు. చాలా మందికి ఇది ఆరోగ్యకరమైన ఆహారమే. కానీ పైన చెప్పిన ఆరోగ్య సమస్యలు ఉన్నవారు తమ పరిస్థితిని బట్టి ఆహారంలో మార్పులు చేసుకోవాలి. డాక్టర్ లేదా న్యూట్రిషనిస్ట్ సలహా తీసుకుని డైట్ ప్లాన్ చేసుకోవడం ఉత్తమం.