మీకు అతిగా చెమట పడుతుందా? అయితే ఈ విషయాలు ఖచ్చితంగా తెలుసుకోవాలి

Excessive Sweating: చెమట పట్టడం అనేది శరీర ఉష్ణోగ్రతను క్రమబద్ధీకరించడానికి ప్రకృతి సిద్ధంగా ఏర్పడిన ఒక ప్రక్రియ. మన శరీరం వేడెక్కినప్పుడు, మెదడులోని హైపోథాలమస్ స్వేద గ్రంధులను ఉత్తేజితం చేసి చర్మం ద్వారా నీటిని బయటకు పంపుతుంది. అయితే.. అందరిలో ఈ ప్రక్రియ ఒకేలా ఉండదు. కొంత మందికి సాధారణ వాతావరణంలో కూడా విపరీతంగా చెమట పడుతుంది. దీనికి జన్యు పరమైన కారణాల నుంచి లైఫ్ స్టైల్ అలవాట్ల వరకు అనేక అంశాలు దోహదపడతాయి. ఈ వ్యత్యాసాల వెనక ఉన్న అసలు కారణాలను వివరంగా తెలుసుకుందాం.

అధికంగా చెమట పట్టడానికి ప్రధాన కారణాలు:

1. జన్యుపరమైన కారణాలు:
కొంత మందికి సహజంగానే ఇతరులకంటే.. ఎక్కువ స్వేద గ్రంధులు ఉంటాయి. ఇది వంశపారంపర్యంగా వచ్చే అవకాశం ఉంది. మీ కుటుంబంలో ఎవరికైనా అతిగా చెమట పట్టే అలవాటు ఉంటే.. అది మీకు కూడా వచ్చే అవకాశం ఉంటుంది. దీనిని ‘ప్రైమరీ ఫోకల్ హైపర్ హైడ్రోసిస్’ అని కూడా అంటారు.

2. శరీర నిర్మాణం, బరువు:
శరీర బరువు ఎక్కువగా ఉన్నవారికి చెమట పట్టే అవకాశం ఎక్కువ. ఎందుకంటే అధిక బరువు ఉన్నప్పుడు శరీరం కదిలినప్పుడు ఎక్కువ శక్తి ఖర్చవుతుంది. దీని వల్ల ఉష్ణోగ్రత పెరుగుతుంది. అంతేకాకుండా.. శరీరంలోని కొవ్వు పొర వేడిని బయటకు వెళ్లకుండా అడ్డుకుంటుంది. దానిని తగ్గించడానికి శరీరం ఎక్కువ చెమటను ఉత్పత్తి చేస్తుంది.

3. శారీరక దృఢత్వం:
ఆశ్చర్యకరంగా.. క్రీడాకారులు లేదా ఫిట్‌గా ఉన్నవారికి త్వరగా చెమట పడుతుంది. వారి శరీరం వేడిని సమర్థవంతంగా నిర్వహించడం నేర్చుకుంటుంది. అంటే.. శరీరం వేడెక్కడం ప్రారంభించిన వెంటనే అది కూల్ అవ్వడానికి త్వరగా స్పందిస్తుంది. అయితే.. వారు సాధారణ స్థితిలో ఉన్నప్పుడు చెమట తక్కువగా పట్టవచ్చు.

4. ఆహారపు అలవాట్లు:
మనం తినే ఆహారం కూడా చెమటపై ప్రభావం చూపుతుంది. ముఖ్యంగా ఘాటైన మసాలాలు, కారం ఎక్కువగా ఉండే పదార్థాలు తిన్నప్పుడు మన నాడీ వ్యవస్థ శరీరానికి “వేడి” అనే సంకేతాన్ని పంపుతుంది. దీని వల్ల ‘గస్టేటరీ స్వెటింగ్’కలుగుతుంది. కెఫైన్ (కాఫీ, టీ)ఆల్కహాల్ కూడా స్వేద గ్రంధులను ప్రేరేపిస్తాయి.

Also Read:

5. ఆరోగ్య సమస్యలు, హార్మోన్లు:
కొన్నిసార్లు అంతర్లీన ఆరోగ్య సమస్యల వల్ల కూడా అతిగా చెమట పడుతుంది.

థైరాయిడ్: హైపర్ థైరాయిడిజం ఉన్నవారిలో జీవక్రియ వేగంగా ఉండటం వల్ల చెమట ఎక్కువగా పడుతుంది.

డయాబెటిస్: రక్తంలో చక్కెర స్థాయిలు తగ్గినప్పుడు విపరీతంగా చెమటలు పట్టవచ్చు.

మెనోపాజ్: మహిళల్లో హార్మోన్ల మార్పుల వల్ల ‘హాట్ ఫ్లాషెస్’ వచ్చి చెమట పడుతుంది.

ఒత్తిడి: ఆందోళన లేదా టెన్షన్ పడినప్పుడు ఎక్రిన్ గ్రంధులు ఉత్తేజితమై అరచేతులు, పాదాల్లో చెమటలు పడతాయి.

6. హైపర్ హైడ్రోసిస్ :
ఇది ఒక ప్రత్యేకమైన స్థితి. ఇందులో స్వేద గ్రంధులు అవసరం లేకపోయినా అతిగా పని చేస్తాయి. ఇది కేవలం అరచేతులు, అడుగులు లేదా చంకల భాగంలోనే ఎక్కువగా ఉండవచ్చు. దీని వల్ల సామాజికంగా ఇబ్బంది కలగవచ్చు.

చెమట పట్టడం అనేది ఆరోగ్యకరమైన ప్రక్రియే అయినప్పటికీ.. అది మీ రోజువారీ పనులకు ఆటంకం కలిగిస్తుంటే లేదా రాత్రిపూట అకస్మాత్తుగా చెమటలు పడుతుంటే డాక్టర్ ను సంప్రదించడం బెస్ట్. తగినంత నీరు తాగడం, కాటన్ బట్టలు ధరించడం, కెఫైన్ తగ్గించడం ద్వారా ఈ సమస్యను కొంతవరకు నియంత్రించవచ్చు.