Madhavan Interview: హీరో మాధవన్‌ను ఇంటి నుంచి గెంటేసిన భార్య సరిత.. ఏం చేశారంటే?

Madhavan Interview: నటుడు ఆర్. మాధవన్ ఇటీవల ఓ ఇంటర్వ్యూలో తన వ్యక్తిగత జీవితం, కెరీర్ గురించి ఆసక్తికరమైన విషయాలను వెల్లడించారు. ముఖ్యంగా కోవిడ్ లాక్‌డౌన్ సమయంలో తన భార్య సరిత బిర్జే తనను ఎలా ‘బయటకు పంపిందో’ సరదాగా వివరించారు. 2020లో కోవిడ్ కారణంగా లాక్‌డౌన్ విధించినప్పుడు, అందరిలాగే మాధవన్ కూడా ఇంట్లోనే ఉండేవారు. అయితే, ఎప్పుడూ బిజీగా ఉండే మాధవన్ అలా ఖాళీగా కూర్చోవడం చూసి సరిత ఆశ్చర్యపోయారట. ఆమె సరదాగా తనను ఆటపట్టిస్తూ.. “నువ్వు తమిళ కామెడీలు, యాక్షన్ సినిమాలు, ఓటీటీ, హిందీ, ఇంగ్లీష్ సినిమాలు.. ఇలా అన్నీ చేస్తావు కదా, ఇప్పుడు ఇంట్లో ఉండటం చూస్తుంటే ఆశ్చర్యంగా ఉంది. బయటకు వెళ్లి ఏదైనా పని చేసి, డబ్బులు సంపాదించు” అని ముక్కుసూటిగా చెప్పిందట. ఈ విషయాన్ని మాధవన్ “తను నన్ను ఇంటి నుంచి బయటకు గెంటేసింది” అని నవ్వుతూ గుర్తు చేసుకున్నారు.

ఆ మాట వల్లే..

సరిత మాటలు కేవలం సరదాకే పరిమితం కాలేదు. ఆ సమయంలో ఆమె మాధవన్‌తో అన్న ఒక మాట ఆయనను బాగా ఆలోచింపజేసింది. “నీలో ఏదో తేడా ఉంది.. నువ్వు షూటింగ్‌లకు వెళ్తున్నావు కానీ, ఎప్పుడు తిరిగి వచ్చేద్దామా అన్నట్లుగా వెళ్తున్నావు. నీలో పాత ఉత్సాహం కనిపించడం లేదు” అని ఆమె సూటిగా ప్రశ్నించిందట. ఆ మాటలతో మాధవన్ తనను తాను సమీక్షించుకున్నారు. ఆ మాటల ప్రభావంతో మాధవన్ తన కెరీర్‌లో దాదాపు నాలుగేళ్ల విరామం తీసుకున్నారు. కేవలం స్టార్‌డమ్ కోసం కాకుండా, తన మనసుకు నచ్చిన, సవాలుతో కూడిన పాత్రలు చేయాలని నిర్ణయించుకున్నారు. ఈ విరామ సమయంలోనే ఆయన స్విమ్మింగ్ వంటి విషయాల్లో తన కుమారుడికి అండగా ఉండటమే కాకుండా, సాధారణ వ్యక్తులతో గడుపుతూ జీవితంపై కొత్త కోణాన్ని సంపాదించారు.

మాధవన్ తన ఆర్థిక వ్యవహారాల గురించి కూడా మాట్లాడుతూ.. “నా భార్య దృష్టిలో నేను చాలా ఉదారంగా డబ్బు ఖర్చు చేసే పిచ్చోడిని. నేను డబ్బు సరిగ్గా నిర్వహించలేనని ఆమె భావిస్తుంది. కానీ నేను నా పరిమితులకు లోబడే ఖర్చు చేస్తాను. నాకు పెద్దగా ఆస్తులు లేకపోవచ్చు కానీ, ఈ స్టార్‌డమ్ వల్ల కలిగే స్వేచ్ఛను నేను ఆస్వాదిస్తున్నాను” అని తెలిపారు. మాధవన్ సినిమా రంగంలోకి రాకముందే సరితను వివాహం చేసుకున్నారు. 1990లలో ఆయన పర్సనాలిటీ డెవలప్‌మెంట్ క్లాసులు తీసుకుంటున్నప్పుడు సరిత ఆయనకు విద్యార్థిగా పరిచయమయ్యారు. 1999లో వారు వివాహం చేసుకున్నారు. సరిత ఇచ్చిన ఆ ‘ముక్కుసూటి’ సలహా వల్లే తాను మళ్ళీ ఉత్సాహంగా పనిలోకి వచ్చానని, ఇప్పుడు తన వయసుకు తగ్గ పాత్రలు, విభిన్నమైన ప్రాజెక్టులతో బిజీగా ఉన్నానని మాధవన్ ఈ సందర్భంగా తెలిపారు. ప్రస్తుతం ఆయన రణ్‌వీర్ సింగ్‌తో కలిసి ‘ధురందర్’ వంటి చిత్రాల్లో నటిస్తున్నారు.