Boyapati Next Film: బాలీవుడ్ స్టార్ హీరోతో బోయపాటి శ్రీను… స్క్రిప్ట్ మొత్తం సిద్ధం..!

Boyapati Next Film: బాలీవుడ్..టాలీవుడ్ వర్గాల్లో ఓ ఆసక్తికరమైన వార్త హాట్ టాపిక్‌గా మారింది. టాలీవుడ్ మాస్ డైరెక్టర్ బోయపాటి శ్రీను..బాలీవుడ్ స్టార్ రణవీర్ సింగ్‌తో సినిమా చేయబోతున్నాడనే ప్రచారం ఊపందుకుంది. ఈ వార్తకు బలం చేకూర్చేలా బోయపాటి శ్రీను ఇటీవల ముంబై వెళ్లి వచ్చారన్న సమాచారం కూడా బయటికి వచ్చింది. దీంతో ఈ ప్రాజెక్ట్ నిజంగానే ఫైనల్ అవుతుందా అనే చర్చ మొదలైంది.

బోయపాటి శ్రీను అంటేనే భారీ యాక్షన్, మాస్ ఎలివేషన్లు, హీరోయిజం పీక్స్ అన్న ఇమేజ్ ఉంది. అయితే ఆయన ఇటీవల బాలకృష్ణతో చేసిన సినిమా ఆశించిన స్థాయిలో ఆడకపోవడంతో.. బోయపాటికి ఇది ఒక చిన్న దెబ్బలా మారింది. అందుకే ఇప్పుడు రణవీర్ సింగ్ లాంటి నేషనల్ స్టార్‌తో సినిమా అంటే, అది బోయపాటికి చాలా పెద్ద అవకాశం అని ఇండస్ట్రీలో అనుకుంటున్నారు. బాలీవుడ్ మార్కెట్‌లో తన సత్తా చూపించే ఛాన్స్ కూడా ఇదే అవుతుంది.

మరోవైపు రణవీర్ సింగ్ పరిస్థితి చూస్తే, ఇటీవల ధురంధర్ సినిమాతో బ్లాక్‌బస్టర్ హిట్ అందుకున్నాడు. ఆ విజయం తర్వాత రణవీర్‌పై అంచనాలు బాగా పెరిగాయి. ఇప్పటికే అతను ‘ప్రళయ్’ అనే జాంబీ థ్రిల్లర్ సినిమాకు ఓకే చెప్పాడని వార్తలు వస్తున్నాయి. ఆ సినిమా విషయంలో కూడా స్క్రిప్ట్, క్యారెక్టర్ ఫోకస్ మీద చర్చలు జరుగుతున్నాయట. హీరోగా తన పాత్రకే ఎక్కువ ప్రాధాన్యం ఉండాలనే ఆలోచనలో రణవీర్ ఉన్నాడని టాక్.

ఇలాంటి పరిస్థితుల్లో బోయపాటి సినిమా.. విషయంలో రణవీర్ ఎలా ఆలోచిస్తాడనేదే ఇప్పుడు పెద్ద డౌట్. బోయపాటి స్టైల్ సినిమాల్లో హీరో క్యారెక్టర్ చాలా పవర్‌ఫుల్‌గా ఉంటుంది. అదే సమయంలో డైరెక్టర్ పట్టు కూడా బలంగా ఉంటుంది. రణవీర్ లాంటి నటుడు ఆ స్టైల్‌కు ఎలా సరిపోతాడు, అలాగే క్రియేటివ్ విషయాల్లో ఇద్దరి మధ్య ఎలాంటి అవగాహన కుదురుతుంది అనేది చూడాలి.

ఇప్పటికే స్క్రిప్ట్ రెడీగా ఉందని.. హీరోతో చర్చించడమే మిగిలిందని వినిపిస్తోంది. అన్నీ కుదిరితే ఈ ప్రాజెక్ట్ బోయపాటి కెరీర్‌కు టర్నింగ్ పాయింట్ కావచ్చు. అదే సమయంలో రణవీర్‌కు ఇది ఒక కొత్త తరహా మాస్ ఇమేజ్ తీసుకురావచ్చు. కానీ ఫైనల్ నిర్ణయం వచ్చే వరకు ఇది ఆసక్తికరమైన గాసిప్‌గానే కొనసాగనుంది.

ALSO READ: Amardeep Chowdary: ఒక్క ఛాన్స్.. నన్ను ట్రోల్ చేయండి.. అమర్ దీప్‌‌‌‌ మాటలు వింటే జాలేస్తుంది