Priyanka Chopra:నటులకు తమ నటనతో ప్రేక్షకులను మెప్పించే అవకాశాలు చాలానే వస్తుంటాయి. కానీ ఒక సినిమాలోనే ఏకంగా 12 విభిన్న పాత్రలు చేయడం నిజంగా చాలా అరుదైన విషయం. బాలీవుడ్ గ్లోబల్ స్టార్ ప్రియాంక చోప్రా తన నటనతో ప్రపంచ సినీ చరిత్రలోనే చెరిగిపోని రికార్డు సృష్టించిన ఆ ప్రయోగం ఇప్పటికీ ఇండస్ట్రీలో ఒక మైలురాయిగా నిలిచిపోయింది. కమల్ హాసన్ లాంటి మహానటుడి రికార్డును సైతం దాటేసిన ఆ అపూర్వ ప్రయోగం గురించి చూద్దాం..
2009లో అశుతోష్ గోవారికర్ దర్శకత్వంలో వచ్చిన ‘వాట్స్ యువర్ రాశి?’ సినిమా భారతీయ చిత్రసీమలో ఒక సరికొత్త ప్రయోగానికి వేదికైంది. గుజరాతీ నవల ఆధారంగా తెరకెక్కిన ఈ చిత్రంలో రాశిచక్రంలోని 12 రాశుల స్వభావాలకు తగినట్లుగా ప్రియాంక చోప్రా 12 వేర్వేరు అమ్మాయిల పాత్రలను పోషించారు. జర్నలిస్ట్ అంజలి, సంప్రదాయ యువతి చంద్రిక, గ్రామీణ భామ ఝంఖన, డాక్టర్ పూజ, కార్పొరేట్ ఉద్యోగిని రజని.. ఇలా ప్రతీ పాత్రకూ ఒక ప్రత్యేకాత్మకతను తీసుకొచ్చి పన్నెండు వేర్వేరు వెండితెర రూపాలను ఆవిష్కరించారు.
ఒకే సినిమాలో ఎక్కువ పాత్రలు చేయాలంటే, డిఫరెంట్ లుక్ కోసం నటులు సాధారణంగా ప్రోస్థెటిక్ మేకప్ వాడుతారు.కానీ దర్శకుడు అశుతోష్ ఈ సినిమాలో కృత్రిమ మేకప్ అస్సలు వద్దనుకున్నారు. ఇక దీంతో ప్రియాంక చోప్రా కేవలం తన బాడీ లాంగ్వేజ్, వాయిస్ మోడ్యులేషన్, కంటి హావభావాలతోనే ప్రతి పాత్రకూ స్పష్టమైన తేడాను చూపించి నటిగా తనలోని అసలైన విశ్వరూపాన్ని పరిచయం చేశారు. ఏ పాత్రలోనూ మరో పాత్ర ఛాయలు కనిపించకుండా ఆమె చూపిన వైవిధ్యం ప్రశంసలు అందుకుంది.
also read:స్మోకింగ్ చేస్తోన్న నయనతార.. మార్పుకు కారణం?
అప్పటివరకు ‘దశావతారం’ సినిమాలో 10 విభిన్న పాత్రలు వేసి లోకనాయకుడు కమల్ హాసన్, ‘నయా దిన్ నయీ రాత్’లో 9 పాత్రలు వేసి సంజీవ్ కుమార్ నెలకొల్పిన రికార్డులే అతిపెద్దవిగా ఉండేవి. కానీ, ‘వాట్స్ యువర్ రాశీ?’ ద్వారా ప్రియాంక ఏకంగా 12 పాత్రలతో ఆ దిగ్గజాల రికార్డులను సైతం తుడిచిపెట్టేసి గిన్నిస్ బుక్ ఆఫ్ వరల్డ్ రికార్డ్స్లో చోటు సంపాదించారు. ఈ అరుదైన మైలురాయిని సాధించిన తొలి నటిగా చరిత్రకెక్కారు.
సినిమా విడుదలయ్యాక బాక్సాఫీస్ వద్ద అనుకున్నంతగా కమర్షియల్ విజయాన్ని సాధించలేకపోయినా, ఒక నటిగా ప్రియాంక చోప్రా చేసిన ఈ సాహసోపేతమైన ప్రయత్నం ఇప్పటికీ ప్రత్యేకంగా గుర్తుండిపోతుంది. ఇక రొటీన్ హీరోయిన్ పాత్రల సరిహద్దులను బద్దలు కొడుతూ, నటనకు ఉన్న అనంతమైన పరిధిని నిరూపించిన ఈ చిత్రం ప్రతి నటీనటుడికీ ఒక గొప్ప స్ఫూర్తిగా నిలుస్తుందనడంలో ఎలాంటి సందేహం లేదు.
Share
నా చావు కాలేజీకి చెప్పకండి.. సంతోషిస్తారు!.. కన్నీళ్లు పెట్టిస్తున్న స్టూడెంట్ సూసైడ్ నోట్!
ఆరునూరైనా కేసీఆర్ సీఎం.. పోలీసుల తోలుతీసే పనిపైనే మొదటి సంతకం..!
