Ram Charan : నటుడు శివాజీ హీరోయిన్ల దుస్తులపై చేసిన వ్యాఖ్యలు ఇప్పుడు టాలీవుడ్లో ఒక పెద్ద చిచ్చు రాజేశాయి. ఈ వివాదం కేవలం మాటలకే పరిమితం కాకుండా, మెగా పవర్ స్టార్ రామ్ చరణ్ నటిస్తున్న ‘పెద్ది’ సినిమాలోని ఒక పాట వైపు మళ్లడం ఇప్పుడు చర్చనీయాంశమైంది. ‘పెద్ది’ సినిమాలోని ‘చికిరి చికిరి’ పాట దగ్గర ఆగి, కొత్త వాదనలకు తెరలేపింది.
అసలేం జరిగింది?
‘దండోరా’ ఈవెంట్ వేదికగా శివాజీ మాట్లాడుతూ.. హీరోయిన్లు వేసుకునే పొట్టి దుస్తులపై ఘాటు వ్యాఖ్యలు చేశారు. అందం అనేది నిండుగా కప్పుకునే బట్టల్లోనే ఉంటుంది తప్ప, సామాన్లు కనిపించేలా వేసుకుంటే ఉండదు అంటూ ఆయన వాడిన సామాన్లు , ముం**లు అనే పదాలు తీవ్ర దుమారాన్ని రేపాయి. మహిళలను, హీరోయిన్లను కించపరిచారంటూ అనసూయ, చిన్మయి, మంచు లక్ష్మి, ఆర్జీవీ వంటి సెలబ్రిటీలు శివాజీపై నిప్పులు చెరిగారు.
సారీ చెప్పినా తగ్గని వేడి
వివాదం ముదరడంతో శివాజీ సోషల్ మీడియా వేదికగా క్షమాపణలు చెప్పారు. అయితే, ఆ సారీ కేవలం తాను వాడిన రెండు పదాలకేనని, తన సిద్ధాంతానికి మాత్రం కట్టుబడే ఉన్నానని రెండో రోజే ప్రకటించి షాక్ ఇచ్చారు. తాను చెప్పిన భావంలో తప్పేమీ లేదని ఆయన గట్టిగా సమర్థించుకోవడం ఈ వివాదాన్ని మరింత ముదిరేలా చేసింది.
సీన్లోకి ‘పెద్ది’ పాట
ఈ వివాదంలో అనూహ్యంగా రామ్ చరణ్ సినిమా ‘పెద్ది’ చర్చల్లోకి వచ్చింది. శివాజీకి మద్దతు తెలుపుతున్న నెటిజన్లు, కరాటే కళ్యాణి వంటి వారు ఒక ఆసక్తికరమైన ప్రశ్నను సంధిస్తున్నారు.శివాజీ సామాన్లు అంటే తప్పంటున్నారు కదా.. మరి ‘పెద్ది’ సినిమాలో ‘చికిరి చికిరి’ పాటలో వాడిన పదజాలం మీకు తప్పుగా అనిపించలేదా? అని సోషల్ మీడియా వేదికగా నిలదీస్తున్నారు.శివాజీకి వ్యతిరేకంగా మాట్లాడేవారు పాటల్లోని అశ్లీల పదాలపై ఎందుకు మౌనంగా ఉంటున్నారని వారు ప్రశ్నిస్తున్నారు. దీంతో శివాజీ వర్సెస్ హీరోయిన్ల ఇష్యూ కాస్తా, ఇప్పుడు టాలీవుడ్ పాటల్లోని లిరిక్స్ చుట్టూ తిరుగుతోంది.
టాలీవుడ్ రెండుగా విభజన?
ప్రస్తుతం టాలీవుడ్ ఈ విషయంలో రెండు వర్గాలుగా విడిపోయింది. ఒక వర్గం హీరోయిన్లు ఏం వేసుకోవాలో చెప్పే హక్కు ఎవరికీ లేదని, శివాజీ వాడిన భాష అభ్యంతరకరమని వాదిస్తోంది. శివాజీ చెప్పిన దానిలో నీతి ఉందని, కేవలం పదాలను పట్టుకుని విమర్శించడం సరికాదని, పెద్ద పెద్ద సినిమాల్లో అంతకంటే అశ్లీలత ఉందని మరో వర్గం కౌంటర్ ఇస్తోంది. మొత్తానికి శివాజీ చేసిన వ్యాఖ్యలు ఇప్పుడు టాలీవుడ్లో ఒక పెద్ద చర్చకే దారితీశాయి. మరి ఈ వివాదం ‘పెద్ది’ టీమ్ వరకు వెళ్తుందా? లేక ఇక్కడితో ఆగుతుందా? అనేది వేచి చూడాలి.
Share
Saudi Deserts Snowfall: సౌదీ ఎడారులలో మంచు వర్షం.. భారత్ కు పెద్ద హెచ్చరికే!
Pune Municipal Elections: మాకు ఓటేస్తే థాయ్లాండ్ ట్రిప్, కారు ఫ్రీ! పుణె ఎన్నికల్లో 'తాయిలాల' జాతర
